TV
బైక్‌ ఢీకొని వ్యక్తి మృతి
ఎమ్మిగనూరురూరల్‌: స్థానిక వ్యవసాయ మార్కెట్‌ యార్డ్‌ సమీపంలో శుక్రవారం జరిగిన రోడ్డు ప్రమాదంలో ఓ వ్యక్తి మృతి చెందాడు. దేవనకొండ మండలం తెర్నేకల్‌ గ్రామానికి చెందిన రామకృష్ణ (57) పత్తిని విక్రయించేందుకు ఎమ్మిగనూరు వచ్చాడు. యార్డు సమీపంలో రోడ్డు దాటుతుండగా బైక్‌ ఢీ కొని తీవ్రంగా గాయపడ్డాడు. చికిత్స కోసం ప్రభుత్వాసుపత్రికి తరలించగా కొద్దిసేపటికి మృతి చెందాడు. బంధువుల ఫిర్యాదు మేరకు కేసు నమోదు చేసినట్లు ట్రాఫిక్‌ పోలీసులు తెలిపారు.
లారీ దగ్ధం
పెద్దకడబూరు: హులికనుమ గ్రామ బస్టాండ్‌ సమీపంలో లారీ దగ్ధమైన సంఘటన శుక్రవారం తెల్లవారుజామున చోటు చేసుకుంది. తెలంగాణ రాష్ట్రం తాండూరు నుంచి కేరళకు నాపరాతి లారీ లోడ్‌ పెద్దకడబూరు మండలంలోని హులికనుమ గ్రామ బస్టాండ్‌ సమీపంలో వెళ్తుండగా లారీ ఇంజన్‌ నుంచి పొగలు వచ్చి మంటలు చెలరేగాయి. అప్రమత్తమైన డ్రైవర్‌ లారీని నిలిపి కిందకు దిగిపోయాడు. మంటలు లారీ మొత్తం వ్యాపించాయి. లారీ డ్రైవర్‌ కేకలు వేయగా పక్కన ఉన్న హులికనుమ గ్రామస్తులు అక్కడికి చేరు కుని అగ్నిమాపక అధికారులకు సమాచారం ఇచ్చారు. ఫైరింజ్‌ చేరుకుని మంటలను అదుపు చేసింది. ఈ ప్రమాదంలో లారీ ఇంజిన్‌ పూర్తి కాలిపోయింది.
