మందుల లావాదేవీల నమోదు తప్పనిసరి

హొసపేటె: హొసపేటె సిటీ బస్టాండ్‌ సమీపంలోని మెడికల్‌ షాపులను గురువారం విజయనగర్‌ డీసీ కవితా ఎస్‌ మన్నికేరి, ఎస్పీ జాహ్నవి, డ్రగ్స్‌ కంట్రోల్‌ ఆఫీసర్‌ ఆకస్మికంగా తనిఖీ చేశారు. డాక్టర్‌ ప్రిస్క్రిప్షన్‌ లేకుండా మాత్రలు, మందులు ఇవ్వవద్దని మందుల దుకాణాల యజమానులను హెచ్చరించారు. మందుల దుకాణాల ముందు డ్రగ్స్‌ శాఖ అందించిన నోటీసు బోర్డును ఏర్పాటు చేయాలని ఎస్పీ ఆదేశించారు. మందుల లావాదేవీలను కంప్యూటర్‌, రిజిస్టర్‌ పుస్తకంలో నమోదు చేయాలన్నారు. డాక్టర్‌ రసీదు లేకుండా మాత్రలు, మందులు ఇవ్వకూడదని తెలిపారు. డాక్టర్‌ రసీదు లేకుండా మాత్రలు ఇస్తే కఠిన చర్యలు తీసుకుంటామని తెలిపారు. మందుల దుకాణదారులు విధిగా నిబంధనలు పాటించాలని సూచించారు.