TV
స్వచ్ఛోత్సవ్‌ అభియాన్‌ ప్రారంభం
హొసపేటె: స్వచ్ఛతా హీ సేవ ప్రచారం ద్వారా జిల్లాలోని అన్ని గ్రామ పంచాయతీల్లో ప్రజా సహకారంతో అవగాహనను చురుకుగా సృష్టించాలని జెడ్పీ చీఫ్‌ ఎగ్జిక్యూటివ్‌ ఆఫీసర్‌ నోంగ్‌జోయ్‌ మహ్మద్‌ అక్రమ్‌ షా అన్నారు. నగరంలోని జిల్లా పంచాయతీ కార్యాలయ ప్రాంగణంలో స్వచ్ఛోత్సవ్‌ ప్రచారాన్ని ప్రారంభించిన తర్వాత ఆయన మాట్లాడారు. జిల్లా కేంద్రంలో ఈ ప్రచారాన్ని ప్రతీకాత్మకంగా ప్రారంభించారు. గ్రామీణ, పట్టణ ప్రాంతాల్లోని ప్రజల్లో పారిశుధ్యం, పరిశుభ్రతను కాపాడుకోవడానికి ప్రాధాన్యత ఇవ్వడంపై అవగాహన కల్పించడం ఈ ప్రచార లక్ష్యం. గ్రామీణ ప్రాంతాల్లోని భారీ చెత్త కుప్పలను గుర్తించి వాటిని శుభ్రం చేయడం, చారిత్రక ప్రదేశాలు, మతపరమైన ప్రదేశాల పరిశుభ్రతను మెరుగుపరచడానికి శ్రమదానం నిర్వహిస్తారు. పారిశుధ్య కార్మికులకు ఆరోగ్య శిబిరాలను నిర్వహించడంతో పాటు ప్రభుత్వం అమలు చేస్తున్న సంక్షేమ పథకాల గురించి సమాచారం అందించడానికి శిబిరాలు నిర్వహిస్తారు. సెప్టెంబర్‌ 25న అందరూ కలిసి ఏక్‌ దిన్‌, ఏక్‌ ఘంటా, ఏక్‌ సాథ్‌ అనే నినాదంతో ఒక రోజు ఒక గంట శ్రమదానం చేయాలి. ఈ ప్రచారం విజయవంతం కావడానికి అన్ని ప్రజా సంఘ సంస్థలు చేతులు కలపాలని ఆయన అన్నారు. అనంతరం జెడ్పీ సిబ్బంది అందరితో ప్రమాణ స్వీకారం చేయించారు. జెడ్పీ డిప్యూటీ సెక్రటరీ కే.తిమ్మప్ప, గ్రామీణ తాగునీరు, పారిశుధ్య విభాగం ఈఈ దీప, జేజేఎం ప్రాజెక్ట్‌ జిల్లా మేనేజర్‌ సీఎం.మహేశ్వరి, జిల్లా కన్సల్టెంట్‌, సిబ్బంది పాల్గొన్నారు.
