ఇంజినీరింగ్‌ కోర్సుల దరఖాస్తు గడువు పొడిగింపు

మే 12,13,14,15,18వ తేదీల్లో ఇంజినీరింగ్‌, మే 19, 20వ తేదీల్లో అగ్రికల్చర్‌, ఫార్మసీ ప్రవేశ పరీక్షలు కంప్యూటర్‌ బేస్డ్‌ టెస్ట్‌ (సీబీటీ) విధానంలో జరగనున్నాయి. ఉమ్మడి గుంటూరు జిల్లాలో ఉన్న 40 ఇంజినీరింగ్‌ కళాశాలల పరిధిలో 20 వేల సీట్లుఅందుబాటులో ఉన్నాయి. రూ.వెయ్యి అపరాధ రుసుంతో కలిపి చెల్లించేందుకు ఈనెల 28, రూ.రెండు వేల అపరాధ రుసుంతో ఏప్రిల్‌ ఒకటి, రూ.4000 లతో కలిపి చెల్లించేందుకు ఏప్రిల్‌ 6వ తేదీ, రూ.10వేలతో కలిపి చెల్లించేందుకు ఏప్రిల్‌ 10 వరకు అవకాశం ఉంది.

గుంటూరు, నరసరావుపేట, బాపట్ల జిల్లాల్లోని 36 ఇంజనీరింగ్‌ కళాశాలల్లో కన్వీనర్‌ కోటాలో 30,240 సీట్లు ఉన్నాయి. వీటిలో రెండు ప్రభుత్వ కళాశాలల్లో 780 సీట్లు ఉండగా, 34 ప్రైవేటు ఇంజినీరింగ్‌ కళాశాలల్లో 29,460 సీట్లు అందుబాటులో ఉన్నాయి.

సీనియర్‌ ఇంటర్‌ పరీక్షలు రాసిన ఎంపీసీ, బైపీసీ గ్రూపుల విద్యార్థులు cetr.aprche.ap. gov.in సైట్‌కు లాగిన్‌ అయ్యి ఏపీ ఈఏపీసెట్‌–2026పై క్లిక్‌ చేయాలి. ఏపీఈఏపీసెట్‌ సైట్‌ లో పరీక్ష రాసేందుకు అర్హతలు, దరఖాస్తు పూరింపు ప్రక్రియతోపాటు కోర్సుల వివరాలు, ఏపీఈఏపీ సెట్‌ ముఖ్యమైన తేదీలు, ఇన్‌స్టక్షన్స్‌ మాన్యువల్‌ పూర్తి వివరాలను పొందవచ్చు.

ఏపీఈఏపీసెట్‌–2026 సైట్‌కు లాగిన్‌ అయిన తరువాత ఆన్‌లైన్‌లో దరఖాస్తు చేసేందుకు స్టెప్‌ –1 మొదలు స్టెప్‌–5 వరకు ఐదు దశల్లో కనిపించే ట్యాబ్‌లను వరుస క్రమంలో క్లిక్‌ చేస్తూ, పొందుపర్చిన వివరాలు పూర్తి చేయాల్సి ఉంటుంది.

స్టెప్‌–1 ‘ఎలిజిబుల్టీ క్రైటీరియా అండ్‌ ఫీజు పేమెంట్‌’కు లాగిన్‌ అయ్యి సీనియర్‌ ఇంటర్‌ హాల్‌ టికెట్‌ ఎంటర్‌ చేయాలి. అనంతరం విద్యార్థి పుట్టిన తేదీ, మొబైల్‌ నంబరు, ఆల్టర్నేటివ్‌ మొబైల్‌ నంబరు, ఈ–మెయిల్‌ ఐడీ నమోదు చేయాలి. ఇంజినీరింగ్‌–ఫార్మసీ, అగ్రికల్చర్‌–ఫార్మసీ, బోత్‌ ఇంజినీరింగ్‌, అగ్రికల్చర్‌, ఫార్మసీల వారీగా తాము రాయబోవు ప్రవేశ పరీక్ష, చేర నున్న కోర్సుల వారీగా మూడు ఆప్షన్లలో ఒక దానిని ఎంపిక చేసుకుని, క్లిక్‌ చేయాలి.

తరువాత సామాజిక వర్గాల వారీగా కేటగిరీపై క్లిక్‌ చేసి, ఆన్‌లైన్‌లో క్రెడిట్‌, డెబిట్‌కార్డు, నెట్‌ బ్యాంకింగ్‌ మార్గాల్లో ఫీజు చెల్లించాల్సి ఉంది.

స్టెప్‌–2 నో యువర్‌ పేమెంట్‌ స్టేట్‌స్‌పై క్లిక్‌ చేసి, సీనియర్‌ ఇంటర్‌ హాల్‌ టిక్కెట్‌ నంబరు, మొబైల్‌ నంబరు, పుట్టిన తేదీ వివరాలు పూర్తి చేయాలి. తదుపరి చేరనున్న కోర్సుల వారీగా ఇంజినీరింగ్‌, ఫార్మసీ, అగ్రికల్చర్‌లలో ఏదైనా ఒక దానిని ఎంపిక చేసుకుని క్లిక్‌ చేయడంతో స్టెప్‌–2 దరఖాస్తు ప్రక్రియ పూర్తవుతుంది.

స్టెప్‌–3లో ఫిల్‌ అప్లికేషన్‌లో పేమెంట్‌ చేసిన ఐడీతో పాటు సీనియర్‌ ఇంటర్‌ హాల్‌ టిక్కెట్‌ నంబరు, పుట్టినతేదీ వివరాలు నమోదు చేయాలి. అనంతరం ప్రొసీడ్‌ టు ఫిల్‌ అప్లికేషన్‌పై క్లిక్‌ చేసి స్టెప్‌–4కు వెళ్లాలి. అక్కడ నో యువర్‌ అప్లికేషన్‌ స్టేటస్‌పై క్లిక్‌ చేసి, పూర్తి చేసిన దరఖాస్తు ఫారాన్ని సందర్శించవచ్చు. స్టెప్‌–5పై క్లిక్‌ చేసి ఆన్‌లైన్‌లో సబ్మిట్‌ చేసిన దరఖాస్తు ఫారాన్ని ప్రింట్‌ తీసుకుని భద్రపరచుకోవాలి.

ఫీజు చెల్లించే సమయంలో ఇచ్చిన రిఫరెన్స్‌ ఐడీ, విద్యార్థి పేరు, సీనియర్‌ ఇంటర్‌ హాల్‌ టికెట్‌, పుట్టినతేదీ కీలకంగా మారుతాయి.