భూ సేకరణ పరిహారంలో కోత

సాక్షి, అమరావతి: భూ సేకరణలో పట్టణాలకు దగ్గ­రగా భూములు కోల్పోతున్న రైతులకు చంద్రబాబు ప్రభుత్వం షాక్‌ ఇచ్చింది.  ఈ భూముల­కు గతంలో కంటే భారీగా పరిహారం తగ్గించింది. భూసేకరణ చట్టం–2013 కింద పరిహారం లెక్కింపులో కీలకమైన నిబంధనను సవరిస్తూ బుధవా­రం జీవో 470 జారీ చేసింది. ప్రభుత్వం భూమిని సేకరించిన­ప్పుడు మార్కెట్‌ విలువే కాకుండా దానిపై అదనంగా కొంత శాతం కలిపి ఇస్తారు. ఇప్పటి వరకు గ్రామీణ ప్రాంతాల్లో (షెడ్యూల్డ్‌ ఏరియాలు మినహా) భూమిని సేకరిస్తే ఈ అదనపు పరిహారం 25 శాతంగా (మల్టిప్లికేషన్‌ ఫ్యాక్టర్‌ 1.25) ఉంది. అంటే రూ.10 లక్షల విలు­వైన భూమికి రైతుకు రూ.10 లక్షలతోపాటు అద­నంగా రూ.2.5 లక్షలు లభించేవి. 

ఇప్పుడు ప్రభు­త్వం ఈ 25 శాతాన్ని అందరికీ ఒకేలా ఇవ్వకుండా కార్పొరేషన్లు, మున్సిపాల్టీలు, నగర పంచాయతీల నుంచి ఆ భూమి ఎంత దూరంలో ఉందన్న దాన్ని బట్టి మూడు స్థాయి­లుగా విభజించింది. పట్టణా­నికి 2 కిలోమీటర్ల లోపు ఉన్న భూములకు కేవ­లం 5 శాతం (మల్టిప్లికేషన్‌ ఫ్యాక్టర్‌ 1.05)  అదనంగా ఇవ్వనున్నారు. 2–5 కిలోమీ­టర్ల మధ్య ఉన్న భూములకు 10 శాతమే(మల్టిప్లికేషన్‌ 1.10) లభిస్తుంది. 5 కిలోమీటర్లు దాటిన భూము­లకు మాత్రమే 25 శాతం(మల్టిప్లికేషన్‌ 1.25) కొనసా­గు­తుంది. ఉదాహరణకు రూ.10 లక్షల విలువ ఉన్న భూమిని తీసుకుంటే పట్టణా­నికి దగ్గరగా ఉన్న రైతుకు ఇప్పుడు కేవలం రూ.10.5 లక్షలే వస్తాయి. 

నగర, పట్టణ శివారు భూముల విలువ ఎక్కువగా ఉంటుంది. అలాంటి కీలకమైన భూము­ల­కే ఇప్పుడు ప్రభుత్వం అదనపు పరిహా­రంలో కోత పెట్టి­ంది. పశ్చిమ గోదావరి జిల్లా దేవర­పల్లి మండలానికి చెందిన కాశీరాజు సీతారామ­య్య, మరో 82 మంది రైతులు తమ భూములకు తక్కువ మల్టిప్లికే­షన్‌ వర్తింపజేశారని, పోరంకి రైతులకు ఇచ్చినంత పరిహారం తమకు ఇవ్వలేదని 2017లో హైకోర్టును ఆశ్రయించారు. 2019లో హైకోర్టు వీరికి అనుకూ­లంగా తీర్పునిచ్చింది. ఈ తీర్పు ఆధారంగానే సవరణ తెచ్చినట్లు ప్రభుత్వం ఉత్తర్వుల్లో తెలిపింది. ఆ తీర్పు రైతు­లకు ఎక్కువ పరిహారం ఇవ్వాలని చెబితే ప్రభుత్వం మాత్రం పట్టణాలకు దగ్గరగా ఉన్న భూములకు పరిహారాన్ని తగ్గించేలా నిబంధన మార్చింది. దీనిపై 15 రోజుల్లోగా అభ్యంతరాలు, సలహాలు ఇవ్వాలని ఉత్తర్వుల్లో పేర్కొంది.