సాక్షి, హైదరాబాద్‌: రాష్ట్ర కాంగ్రెస్‌ పార్టీ నేతలు, కేడర్‌ ఎప్పుడెప్పుడా అని ఎదురుచూస్తున్న నామినేటెడ్, పార్టీ పదవుల భర్తీపై ముఖ్య నేతల మధ్య ఏకాభిప్రాయం కుదిరింది. సీఎం రేవంత్‌రెడ్డి, పార్టీ రాష్ట్ర వ్యవహారాల ఇన్‌చార్జి మీనాక్షి నటరాజన్, పీసీసీ అధ్యక్షుడు బి.మహేశ్‌కుమార్‌గౌడ్‌లు బుధవారం సమావేశమయ్యారు. ఉదయం 11 గంటల నుంచి నాలుగున్నర గంటలపాటు సుదీర్ఘంగా జరిగిన భేటీలో పలు కీలక నిర్ణయాలు తీసుకున్నారు. జిల్లాల వారీగా నేతల పేర్లను వడబోసిన ముగ్గురు నేతలు.. పలు కీలక పదవుల విషయంలో ఏకాభిప్రాయానికి వచ్చినట్టు తెలిసింది. ముఖ్యంగా కుల సమాఖ్యలకు చైర్మన్లు, పాలకవర్గం నియామకాల విషయంలో ఏకాభిప్రాయానికి రావడంతో రజక, నాయీ బ్రాహ్మణ, వడ్డెర, సగర, వాల్మీకిబోయ, కృష్ణ బలిజ (పూసల), భట్రాజ, కుమ్మరి శాలివాహన, విశ్వబ్రాహ్మణ, మేదరి, గీత, గొర్రెలు, మేకల తదితర పారిశ్రామిక ఫెడరేషన్లకు చైర్మన్లు, పాలకవర్గాలను నియమిస్తూ రెండు, మూడురోజుల్లో ఉత్తర్వులు విడుదల కానున్నాయి. మరోవైపు ఖాళీగా ఉన్న పలు కార్పొరేషన్లకు చైర్మన్ల నియామకం, జిల్లా స్థాయి నేతలకు కార్పొరేషన్‌ డైరెక్టర్‌ పదవుల గురించి కూడా చర్చించిన నేతలు ఆయా పోస్టులను ఎవరికి కేటాయించాలి? ఏయే సామాజిక వర్గాలకు ఎలా ప్రాతినిధ్యం ఇవ్వాలి? ఏ జిల్లాకు ఎన్ని పదవులు ఇవ్వాలనే దానిపై కూడా ఓ అంగీకారానికి వచ్చారని, అయితే ఆ పోస్టులను జూన్‌ నెలలో ప్రకటించాలని నిర్ణయించినట్టు సమాచారం. కార్పొరేషన్లను ఎమ్మెల్యేలకు కేటాయించే విషయంలో కూడా ఏకాభిప్రాయం కుదిరిందని తెలిసింది. నాలుగు వర్కింగ్, ప్రచార కమిటీపై కూడా పార్టీ పదవులపై కూడా రేవంత్, మీనాక్షి, మహేశ్‌గౌడ్‌లు చర్చించారు. ముఖ్యంగా టీపీసీసీ వర్కింగ్‌ ప్రెసిడెంట్లు ఎవరన్న దానిపై చర్చ ఓ కొలిక్కి వచ్చిందని, ఈసారి పీసీసీకి నలుగురు వర్కింగ్‌ ప్రెసిడెంట్లను నియమిస్తారని, రెడ్డి, ఎస్సీ, ఎస్టీ, బీసీ మహిళకు అవకాశం ఇవ్వాలని నిర్ణయించినట్టు తెలుస్తోంది. ఈ జాబితాలో వరంగల్‌ జిల్లాకు చెందిన ఓ ఎమ్మెల్యే, అదే ఉమ్మడి జిల్లాకు చెందిన ఓ ఎంపీ, ఓ ఏఐసీసీ కార్యదర్శి, అదే జిల్లాకు చెందిన మహిళా నేత ఉన్నట్టు తెలుస్తోంది. ప్రచార కమిటీ చైర్మన్‌ పేరుపై కూడా ఏకాభిప్రాయానికి వచ్చినట్లు సమాచారం. పార్టీ కోశాధికారిగా ఉమ్మడి హైదరాబాద్‌ పరిధిలోని సీఎం సన్నిహితుడిని నియమించే అంశంపైనా చర్చ జరిగినట్టు తెలిసింది. అలాగే పెండింగ్‌లో ఉన్న ఉపాధ్యక్షులు, ప్రధాన కార్యదర్శులు, కొత్త అధికార ప్రతినిధులు, కార్యదర్శులు, పెండింగ్‌లో ఉన్న సంగారెడ్డి, రంగారెడ్డి జిల్లా«ల అధ్యక్షులు, పలు జిల్లా కమిటీలపై కూడా చర్చ జరిగిందని, అన్ని పదవుల విషయంలో ముగ్గురు నేతలూ ఒక అభిప్రాయానికి వచ్చారని గాం«దీభవన్‌ వర్గాల ద్వారా తెలిసింది. పదవుల జాబితాకు అధిష్టానం ఆమోదం పొందిన తర్వాత అధికారికంగా ప్రకటించాలని నిర్ణయించారు. మంత్రులపై ఆరోపణల గురించి చర్చ? రాష్ట్రంలో రాజకీయ పరిణామాలపై కూడా నేతలు చర్చించారని తెలుస్తోంది. ముఖ్యంగా జీవన్‌రెడ్డి ఎపిసోడ్‌తో పాటు ఇటీవలి కాలంలో రాష్ట్ర మంత్రివర్గ సభ్యులపై వస్తున్న ఆవినీతి ఆరోపణల గురించి చర్చించినట్టు సమాచారం. మరోవైపు డీలిమిటేషన్‌ బిల్లుపై తెలంగాణ పక్షాన ప్రత్యేక వాదన తెరపైకి తెచ్చిన నేపథ్యంలో ఈ బిల్లు గురించి అవసరమైతే క్షేత్రస్థాయి ఆందోళనకు పార్టీ కేడర్‌ను సిద్ధం చేయాలని కూడా నిర్ణయించారు. టీపీసీసీ రాజకీయ వ్యవహారాల కమిటీ (పీఏసీ) సమావేశం వీలైనంత త్వరగా నిర్వహించాలని నిర్ణయించారు. డీసీసీ అధ్యక్షుల నేతృత్వంలో పీఏసీలు కాంగ్రెస్‌ పార్టీ సంస్థాగత నిర్మాణంలో మరో కొత్త కమిటీ చేరనుంది. రాష్ట్ర స్థాయిలో ఉన్న రాజకీయ వ్యవహారాల కమిటీ (పీఏసీ) తరహాలోనే జిల్లా స్థాయిలోనూ ఏర్పాటు చేస్తున్నారు. డీసీసీ అధ్యక్షుల నేతృత్వంలో ఏర్పాటు కానున్న ఈ పీఏసీల్లో జిల్లాలోని ఎమ్మెల్యేలు, ఎంపీలు, ఎమ్మెల్సీలు, కార్పొరేషన్‌ చైర్మన్లు, మున్సిపల్‌ చైర్మన్లు, కార్పొరేషన్‌ మేయర్లు, మాజీ ఎమ్మెల్యేలు, ఎంపీలు, ఎమ్మెల్సీలు, అనుబంధ సంఘాల అధ్యక్షులను సభ్యులుగా నియమించనున్నారు. ఆయా జిల్లాల్లో జరిగే ముఖ్య రాజకీయ పరిణామాలు, ఎన్నికల సందర్భంగా తీసుకునే నిర్ణయాల్లో పీఏసీలు కీలకంగా వ్యవహరించనున్నాయి. అయితే,ఆయా జిల్లాల పీఏసీల్లో తమకు స్థానం కల్పించకపోవడంపై పలువురు రాష్ట్ర కమిటీ నేతలు అసంతృప్తి వ్యక్తం చేస్తున్నట్టు తెలిసింది.


  ఉత్తమ్‌కు... టీఆర్‌ఎస్ చెక్
  హుజూర్‌నగర్ నుంచి శ్రీకాంతాచారి తల్లి శంకరమ్మ పోటీ
  ఇప్పటికే వైఎస్సార్ కాంగ్రెస్‌తోనే తంటాలు పడుతున్న కాంగ్రెస్
  చీలిపోనున్న తెలంగాణవాద ఓట్లు
 
  సాక్షిప్రతినిధి, నల్లగొండ : తెలంగాణ పీసీసీ వర్కింగ్ ప్రెసిడెంట్ ఉత్తమ్‌కుమార్‌రెడ్డిపై టీఆర్‌ఎస్ ప్రత్యక్షపోరుకు సిద్ధమైనట్లే కనిపిస్తోంది. ఇప్పటికే తెలంగాణ కాంగ్రెస్ నేతలపై గరంగరం వ్యాఖ్యలు చేసిన ఆ పార్టీ అధినేత కేసీఆర్ పెద్దఎత్తే వేశారు. తెలంగాణ మలిదశ ఉద్యమంలో తొలి అమరుడు కాసోజు శ్రీకాంతాచారి తల్లి శంకరమ్మను హుజూర్‌నగర్ నియోజకవర్గం నుంచి బరిలోకి దింపేందుకు నిర్ణయం తీసుకున్నారు. ఈ మేరకు ఆమెకు గ్రీన్‌సిగ్నల్ కూడా ఇచ్చారు.
 
  వాస్తవానికి మొన్న మొన్నటి దాకా టీఆర్‌ఎస్.. కాంగ్రెస్ పార్టీలో విలీనమవుతుందని ప్రచారం జరిగింది. ఆ తర్వాత పొత్తుల దారులు కూడా మూసుకుపోయాయి.  సార్వత్రిక ఎన్నికల్లో కాంగ్రెస్‌తో పొత్తు ఉండనేఉండదని కేసీఆర్ కుండబద్దలు కొట్టారు. జిల్లాలో ఆయకట్టు ప్రాంతంలో టీఆర్‌ఎస్‌కు అంతగా పట్టులేదని జరుగుతున్న ప్రచారాన్ని తిప్పికొట్టేందుకు, హుజూర్‌నగర్ నుంచి శంకమర్మకు టికెట్ ఇచ్చి తెలంగాణ సెంటిమెంట్‌ను సొమ్ము చేసుకునేందుకు గులాబీ దళపతి వ్యూహాత్మక ఎత్తుగడే వేశారన్న అభిప్రాయం బలంగా వ్యక్తం అవుతోంది.
 
  ఇప్పటికే... వైఎస్సార్ సీపీతో తంటాలు
  వాస్తవానికి గతేడాది ఫిబ్రవరిలో జరిగిన సహకార సంస్థల ఎన్నికల నాటి నుంచే హుజూర్‌నగర్ నియోజకవర్గంలో వైఎస్‌ఆర్ కాంగ్రెస్, అధికార కాంగ్రెస్ పార్టీకి దీటుగా తయారైంది. కాంగ్రెస్‌కు వ్యతిరేకంగా ఉన్న అన్ని పార్టీలను కలుపుకుని వెళుతూ, కలిసి పోతూ వైఎస్‌ఆర్ కాంగ్రెస్ సత్ఫలితాలనే సాధించింది. ఇక, గ్రామ పంచాయతీ ఎన్నికల్లో సైతం కాంగ్రెస్ నాయకుల అంచనాలను తల కిందులు చేస్తూ సర్పంచ్, వార్డుసభ్యుల స్థానాలను కైవసం చేసుకుంది. పంచాయతీ ఎన్నికల తర్వాతే, మంత్రి హోదాలో ఉన్న ఉత్తమ్‌కుమార్‌రెడ్డి నయాన్నో, భయాన్నో  పలువురు సర్పంచ్‌లను బలవంతంగా కాంగ్రెస్‌లోకి లాగే సుకున్నారు.
 
  ఇక, అక్టోబరులో కురిసిన భారీ వర్షాలకు నష్టపోయిన రైతాంగాన్ని పరామర్శించేందుకు పర్యటన పెట్టుకున్న వైఎస్సార్ కాంగ్రెస్ గౌరవాధ్యక్షురాలు విజయమ్మ పర్యటనను అడ్డుకున్నారు. మంత్రి పదవిని అడ్డంపెట్టుకుని అధికార దుర్వినియోగానికి పాల్పడినట్లు ఆరోపణలూ ఎదుర్కొన్నారు. ఈ ఎన్నికల్లో తనకు వైఎస్‌ఆర్ కాంగ్రెస్ నుంచి కచ్చితంగా ఇబ్బంది ఉంటుం దని బలంగా నమ్మిన ఆయన ఎక్కడికక్కడ సమస్యలు సృష్టించారన్నది వైఎస్సార్ కాంగ్రెస్ నేతల వాదన. కేవలం తెలంగాణవాదాన్ని ముందు పెట్టి విజయమ్మ పర్యటనను అడ్డుకున్న ఉత్తమ్ ఇపుడు టీపీసీసీ వర్కింగ్ ప్రెసిడెంట్ కూడా అయ్యారు.
 
 ఆయనా తెలంగాణవాద ఓటుపై ఆశలు పెట్టుకున్నారు. అయితే, తెలంగాణ ఉద్యమంలో ఏమంత చురుగ్గా పాల్గొన్నాడని, తెలంగాణవాదులు ఆయన గురించి ఆలోచిస్తారని టీఆర్‌ఎస్ నాయకత్వం ప్రశ్నిస్తోంది. తెలంగాణ అమరవీరుల కుటుంబాలు, వివిధ జేఏసీల ఆధ్వర్యంలో తెలంగాణ ఉద్యమం లో ముందువరుసలో ఉన్న వారికి టికెట్లు ఇవ్వాలని నిర్ణయించి, ఆ మేరకు పావులు కదుపుతోంది. జిల్లాలో వారికి కనీసం రెండు స్థానాలు ఇవ్వనున్నారు. దీనిలో భాగంగానే హుజూర్‌నగర్ స్థానం నుంచి తెలంగాణ అమరుడు శ్రీకాంతాచారి తల్లికి ఈ సీటును కేటాయించినట్లు జిల్లా టీఆర్‌ఎస్ వర్గాలు తెలి పాయి. ఒకవైపు వైఎస్సార్ కాంగ్రెస్, మరోవైపు టీఆర్‌ఎస్ దాడిని టీపీసీసీ వర్కింగ్ ప్రెసిండెంట్ ఎలా ఎదుర్కొంటారో వేచి చూడాలి.
 
 
  26 లోగా నియోజకవర్గ  బాధ్యతలు
  వరంగల్ జిల్లా పాల కుర్తి టికెట్ కావాలని టీఆర్‌ఎస్ అధినేత కేసీఆర్‌ను అడిగా. అయితే ఆయన నన్ను ఎమ్మెల్సీగా పంపిస్తానని చెప్పారు. వద్దని తిరస్కరించా... నాకు పరిచయం ఉన్న నాలుగైదు నియోజకవర్గాలో ఏదోఒకచోట సీటివ్వాలని అడిగా. దాదాపు అన్నిచోట్ల అభ్యర్థుల ఎంపిక పూర్తయిందని, హుజూర్‌నగర్ నుంచి పోటీకి దిగమని కేసీఆరే స్వయంగా సూచించారు. ఈ నెల 26వ  తేదీలోగా ఆ నియోజకవర్గ బాధ్యతలు అప్పగించే అవకాశం ఉంది.  - శ్రీకాంతాచారి తల్లి శంకరమ్మ