pinda pradanalu

బోధ్‌గయ: బాలీవుడ్ నటుడు రాజేశ్ కుమార్ పితృపక్ష మేళా సందర్భంగా బిహార్‌లోని గయా చేరుకున్నారు. బోధ్‌గయలోని ధర్మారణ్య వేదిక వద్ద తన పూర్వీకులకు పిండప్రదానం, తర్పణం నిర్వహించారు. నేపాల్‌లో ప్రకృతి విపత్తుల్లో ప్రాణాలు కోల్పోయిన వారి ఆత్మశాంతి కోసం కూడా ప్రార్థనలు చేశారు. గయ జిల్లాలోని గురువా ప్రాంతానికి చెందిన రాజేశ్ కుమార్ శనివారం ధర్మారణ్య వేదిక వద్ద పూర్వీకులను స్మరించుకున్నారు. అనంతరం సీతాకుండ్‌లో దర్శనం, పూజలు చేశారు. తన జీవితంలో తొలిసారి పితృపక్ష మేళాలో పాల్గొనే అవకాశం రావడం సంతోషంగా ఉందని ఆయన తెలిపారు.పితృపక్షం కేవలం మతపరమైన ఆచారాలకు మాత్రమే పరిమితం కాదని, పూర్వీకులను గుర్తు చేసుకుని వారికి కృతజ్ఞతలు తెలిపే సమయమని రాజేశ్ కుమార్ పేర్కొన్నారు. గయకు తరచూ వస్తున్నప్పటికీ ఇంతకుముందు పితృపక్ష మేళాకు రాలేకపోయానని చెప్పారు. ఫల్గు నదిలో నీటి ప్రవాహాన్ని చూసి సంతోషం వ్యక్తం చేశారు. తన పూర్వీకులతో పాటు నేపాల్‌లో ప్రకృతి విపత్తుల్లో ప్రాణాలు కోల్పోయిన వారి ఆత్మశాంతి కోసం కూడా రాజేశ్ కుమార్ పిండప్రదానం, తర్పణం నిర్వహించారు. వారికి మోక్షం కలగాలని ప్రార్థించారు.పితృపక్షం తొలి రోజున ఫల్గు నది ఘాట్ల వద్ద భారీగా భక్తులు తరలివచ్చారు. వర్షం పడుతున్నప్పటికీ పిండప్రదానం కోసం తీర్థయాత్రికులు పెద్ద సంఖ్యలో కనిపించారు. జొన్నలు, బియ్యం, పాలతో తయారు చేసిన ఖీర్‌తో పిండాలను తయారు చేసి, సంప్రదాయ పద్ధతిలో పూజలు నిర్వహించారు. శనివారం భక్తుల సంఖ్య 65 వేలకుపైగా ఉన్నట్లు నిర్వాహకులు తెలిపారు. పితృపక్షం రెండో రోజైన ఆదివారం ప్రేతశిల, బ్రహ్మకుండ్, రామకుండ్, రామశిల తదితర వేదికల వద్ద పిండప్రదానం నిర్వహించనున్నారు. ప్రేతశిల వద్ద పిండప్రదానం చేస్తే ప్రేతయోని నుంచి విముక్తి లభిస్తుందని భక్తుల విశ్వాసం. పూజల అనంతరం భక్తులు విష్ణుపాద ఆలయంలో శ్రీ విష్ణుచరణాలను దర్శించుకున్నారు.ఇదీ చదవండి: యూపీలో వర్ష బీభత్సం..15 మంది మృతి

Pitru Paksha: ప్రస్తుతం దేశంలోని హిందువులు తమ పెద్దలకు తలచుకుని వారికి తర్పణాలు అందించే పితృపక్షం రోజులు కొనసాగుతున్నాయి. సెప్టెంబర్ 21న అమావాస్యతో ఇవి ముగియనున్నాయి. పితృ పక్షం చివరి రోజున చాలామంది తమ పూర్వీకులకు పిండ ప్రదానం చేస్తుంటారు. దేశం నలుమూలలా పిండ ప్రదానాలు చేసేందుకు ‍ప్రసిద్ధి చెందిన కొన్ని ప్రాంతాలు ఉన్నాయి.ఫాల్గు నది, గయ (బీహార్)గయ.. పిండ ప్రదానాలకు ప్రసిద్ధి చెందిన ప్రదేశంగా పరిగణిస్తుంటారు. ఇక్కడ పిండ ప్రదానాన్ని సమర్పించడం వలన పూర్వీకుల ఆత్మలకు మోక్షం లభిస్తుందని నమ్ముతారు. గయలోని ఫాల్గు నది ఒడ్డున వేలాది మంది పిండ ప్రదానాన్ని నిర్వహిస్తారు. స్కంద పురాణం, విష్ణు పురాణంలో ఈ ప్రదేశం ప్రస్తావన కనిపిస్తుంది.బ్రహ్మకపాల్, బద్రీనాథ్ (ఉత్తరాఖండ్)ఉత్తరాఖండ్‌లోని నాలుగు పవిత్ర స్థలాలలో ఒకటైన బద్రీనాథ్ ధామ్ సమీపంలోని బ్రహ్మకపాల్ ఘాట్.. పూర్వీకులకు పిండ ప్రదానాన్ని అందించేందుకు ఉత్తమ ప్రదేశంగా భావిస్తారు.సిద్ధవట్‌, ఉజ్జయిని (మధ్యప్రదేశ్)ఉజ్జయినిలోని సిద్ధవట్‌ మందిరం పిండ ప్రదానంతో పాటు శార్ద కర్మలకు ప్రసిద్ధి చెందింది. ఇక్కడ ఒక పెద్ద మర్రి చెట్టు ఉంది. దాని కింద పిండ ప్రదానం చేయడం పూర్వీకుల ఆత్మలను సంతృప్తిపరుస్తుందంటారు. ఇక్కడి మహాకాళేశ్వర జ్యోతిర్లింగాన్ని సందర్శించడంతో పాటు సిద్ధవత్‌లో పిండ ప్రదానం చేయడం పుణ్యప్రదమని భక్తులు భావిస్తారు.త్రయంబకేశ్వర్, నాసిక్ (మహారాష్ట్ర)మహారాష్ట్రలోని నాసిక్ జిల్లాలో ఉన్న త్రయంబకేశ్వర్ జ్యోతిర్లింగం పితృ కర్మలకు ప్రసిద్ధి చెందింది. ఇక్కడి గోదావరి నది ఒడ్డున పెద్దలకు తర్పణాలివ్వడం వలన వారి ఆత్మలు మోక్షాన్ని పొందుతాయని చెబుతారు.ప్రయాగ్‌రాజ్ (ఉత్తరప్రదేశ్)గంగా, యమున, సరస్వతి నదుల సంగమ స్థలమైన ప్రయాగ్‌రాజ్.. పూర్వీకులకు పిండ ప్రదానాలు ఆచరించే పవిత్ర స్థలంగా పేరొందింది. ఈ సంగమంలో పిండ ప్రదానం చేయడం వల్ల పూర్వీకుల ఆత్మలు శాంతించి, కుటుంబం బాధలు తొలగిపోతాయని పలువురు నమ్ముతారు.రామేశ్వరం (తమిళనాడు)రామేశ్వరం.. దక్షిణ భారతదేశంలో ఈ పవిత్ర ప్రాంతంలో పిండ ప్రదానం సమర్పించడం అనేది ఆచారంగా కొనసాగుతోంది. ఇక్కడ పిండ ప్రదానం చేయడం వలన పూర్వీకుల శాపాలు ఏవైనా ఉంటే తొలగిపోతాయని చెబుతారు.హుగ్లీ నది ఘాట్లు (పశ్చిమ బెంగాల్)పశ్చిమ బెంగాల్ రాజధాని కోల్‌కతాలోని హుగ్లీ నది వెంబడి ఉన్న ఘాట్‌లు పిండ ప్రదానాలకు ప్రసిద్ధి చెందినవి. పెద్ద సంఖ్యలో ప్రజలు ఇక్కడికి వచ్చి, తమ పూర్వీకులకు తర్పణాలు విడుస్తారు.

న్యూఢిల్లీ: బీహార్‌లోని గయలో జరుగుతున్న పితృపక్ష మేళాకు ప్రధాని మోదీ హాజరుకానున్నారు. సెప్టెంబరు 17న ప్రధాని మోదీ గయ చేరుకుని, దివంగత తన తల్లికి పిండప్రదానం చేయనున్నారు. అలాగే తన పూర్వీకులకు తర్పణాలు అర్పించనున్నారు.ఈ పర్యటనలో ప్రధాని మోదీ రోడ్‌షో నిర్వహించడంతోపాటు పూర్ణియా విమానాశ్రయాన్ని, పట్నా మెట్రోను ప్రారంభించనున్నారు. ప్రధాని రాక సందర్భంగా పట్నా జిల్లా అధికారులు, మున్సిపల్ కార్పొరేషన్ సిబ్బంది పోలీసులు సమన్వయంతో వివిధ ఏర్పాట్లు చేస్తున్నారు.మరోవైపు పితృపక్ష మేళాకు పోలీసు అధికారులు పటిష్ట బందోబస్తు ఏర్పాట్లు చేస్తున్నారు. కాగా పట్నా మెట్రో బీహార్ అభివృద్ధిలో ఒక మైలురాయి కానుంది. ప్రధాని మోదీ పర్యటన వివరాలను ప్రధాని కార్యాలయం ఇంకా ధృవీకరించనప్పటికీ, పలు సూచనల మేరకు బీహార్‌ అధికారులు ‍ప్రధాని రాకకు ఏర్పాట్లు చేస్తున్నారు.


 రాజమండ్రి/కొవ్వూరు: ఎడారిలో సైతం ఇసుకను అమ్మే నైపుణ్యం కొందరు వ్యాపారుల సొంతం. అలాంటివారు పుష్కరాల వంటి మహదవకాశాన్ని వదులుకుంటారా! అందుకే గడ్డి పరకకు, వరి పిండికి కూడా అడ్డగోలుగా ధరలు నిర్ణయించేసి భక్తులను నిలువు దోపిడీ చేస్తున్నారు.
 
 తూర్పుగోదావరి, పశ్చిమ గోదావరి జిల్లాల్లో పుష్కరాల్లో పిండ ప్రదానాల నిర్వహణకు అవసరమైన దర్భగడ్డి, వరి పిండి అమ్మకాలతో భారీగా ఆర్జిస్తూ భక్తుల నమ్మకాన్ని కొందరు వ్యాపారులు సొమ్ము చేసుకుంటున్నారు. భక్తులు పితృదేవతలకు పిండాలు సమర్పించే వస్తువులకు భారీగా వసూళ్లు చేస్తున్నప్పటికీ కార్యక్రమం నిర్వహించేందుకు ఖర్చులు భరిస్తున్నారు.