న్యూఢిల్లీ: జమియత్‌ ఉలేమా–ఇ–హింద్‌ అధ్యక్షుడు మహమూద్‌ మదానీ వివాదాస్పద వ్యాఖ్యలు చేశారు. అణచివేత ఉన్నచోట జిహాద్‌ తప్పదని తేల్చిచెప్పారు. మైనార్టీల హక్కులను న్యాయ వ్యవస్థ, ప్రభుత్వం నిరాకరిస్తున్నాయని ఆరోపించారు. బాబ్రీ మసీదు, ట్రిపుల్‌ తలాఖ్‌ కేసుల్లో సుప్రీంకోర్టు ఇచ్చిన తీర్పులను ఆయన తప్పుపట్టారు. ప్రభుత్వ ఒత్తిడి మేరకే న్యాయ వ్యవస్థ పనిచేస్తోందని విమర్శించారు. భారత రాజ్యాంగం మైనార్టీలకు ఇచ్చిన హక్కులను బహిరంగంగా ఉల్లంఘించేలా కోర్టు తీర్పులు ఉంటున్నాయని ఆక్షేపించారు. రాజ్యాంగాన్ని పరిరక్షించినంత వరకే సుప్రీంకోర్టును ‘సుప్రీం’అని పిలవాలని తేల్చిచెప్పారు. అలా పరిరక్షించలేకపోతే ‘సుప్రీం’అని పిలిపించుకొనే అర్హత ఆ కోర్టుకు ఉండదని పేర్కొన్నారు. మదానీ తాజాగా ఓ కార్యక్రమంలో మాట్లాడారు. భారత్‌లో ముస్లింల పట్ల ప్రజల వైఖరిని వెల్లడించారు. ముస్లింలకు దేశ జనాభాలో 10 శాతం మంది మద్దతిస్తున్నారని, 30 శాతం మంది వ్యతిరేకిస్తున్నారని, 60 శాతం మంది నిశ్శబ్దంగా ఉండిపోతున్నారని చెప్పారు. ఇలా నిశ్శబ్దంగా ఉంటున్న 60 శాతం మందితో సంబంధాలు బలోపేతం చేసుకోవాలని ముస్లింలకు పిలుపునిచ్చారు. మన సమస్యలను వారికి వివరించాలని అన్నారు. ఒకవేళ ఆ 60 శాతం మంది ముస్లింలకు వ్యతిరేకంగా మారితే మాత్రం దేశంలో అతిపెద్ద ప్రమాదం ముంచుకొస్తుందని చెప్పారు. ఇతరులకు మంచి చేయడమే జిహాద్‌ జిహాద్‌కు వక్రభాష్యాలు చెబుతున్నారని, తప్పుడు అర్థాలు తీసుకొస్తున్నారని మదానీ మండిపడ్డారు. ఇందులో మీడియాతోపాటు ప్రభుత్వం బాధ్యత ఉందని ధ్వజమెత్తారు. కుట్రలో భాగంగానే లవ్‌ జిహాద్, ల్యాండ్‌ జిహాద్, స్పిట్‌(ఉమ్మి) జిహాద్‌ను తెరపైకి తెచ్చారని విమర్శించారు. జిహాద్‌కు అసలైన అర్థం అది కాదని అన్నారు. జిహాద్‌ ఎప్పటికీ పరమ పవిత్రమైనదని వెల్లడించారు. ఇతరులకు మంచి చేయడం, వారి జీవితాలను మెరుగుపర్చడమే జిహాద్‌ అని వివరణ ఇచ్చారు. అణచివేత ఉన్నచోట జిహాద్‌ కచ్చితంగా ఉంటుందని వ్యాఖ్యానించారు. మన దేశంలో రాజ్యాంగం ప్రకారం లౌకిక ప్రజాస్వామ్య వ్యవస్థ ఉందని గుర్తుచేశారు. ముస్లింలు రాజ్యాంగానికి విధేయులుగానే ఉంటున్నారని తెలిపారు. పౌరుల హక్కులను కాపాడడం ప్రభుత్వ బాధ్యత అని ఉద్ఘాటించారు. ఆ పని ప్రభుత్వం చేయకపోతే తదుపరి పరిణామాలకు ప్రభుత్వమే బాధ్యత వహించాలని స్పష్టంచేశారు. జాతీయ గీతం వందేమాతరంపైనా మదానీ సంచలన వ్యాఖ్యలు చేశారు. మృతప్రాయంగా మారిన ఓ సమూహం లొంగిపోయిందని అన్నారు. ఎవరైనా వందేమాతరం అని అంటే ఆ సమూహం ఆ గీతం పాడుతోందని ఆక్షేపించారు. తాము సజీవంగా ఉన్న సమూహమని, ఎలాంటి పరిణామాలైనా సరే ఎదుర్కోవడానికి సిద్ధంగా ఉన్నట్లు తేల్చిచెప్పారు. కొత్త జిన్నాలు పుట్టుకొస్తున్నారు: బీజేపీ మహమూద్‌ మదానీ వ్యాఖ్యలపై మధ్యప్రదేశ్‌ బీజేపీ ఎమ్మెల్యే రామేశ్వర్‌ శర్మ తీవ్ర ఆగ్రహం వ్యక్తంచేశారు. ముస్లింలను ఉద్దేశపూర్వకంగా రెచ్చగొడుతున్నారని, రాజ్యాంగబద్ధమైన సంస్థలను సవాలు చేస్తున్నారని ఆరోపించారు. దేశంలో కొత్త జిన్నాలు పుట్టుకొస్తున్నారని విమర్శించారు. మదానీ వ్యాఖ్యలపై సుప్రీంకోర్టు సుమోటోగా విచారణ చేపట్టాలని, అతడిని కఠినంగా శిక్షించాలని డిమాండ్‌ చేశారు. రాజ్యాంగాన్ని ఉల్లంఘించడం మానుకోవాలని, ఇప్పటికైనా హద్దుల్లో ఉండాలని మదానీని హెచ్చరించారు. దేశంలో మదానీ లాంటి వ్యక్తులే ఉగ్రవాదులను, జిహాదీలను, రేపిస్టులను ఉత్పత్తి చేస్తున్నారని, లవ్‌ జిహాద్, ల్యాండ్‌ జిహాద్, ఉమ్మి జిహాద్‌కు మద్దతిస్తున్నారని రామేశ్వర్‌ శర్మ దుయ్యబట్టారు. ఉగ్రవాదాన్ని వ్యాప్తిచేసి, అమాయకులను హత్యచేస్తే శిక్షించకుండా బిర్యానీలు పెట్టి మర్యాదలు చేయాలా? అని ప్రశ్నించారు. ముస్లింల పిల్లలు బాగా చదువుకొని డాక్టర్లయితే గౌరవిస్తామని అన్నారు. కానీ, డాక్టర్లుగా మారి బాంబులు విసిరితే అవే బాంబుల్లో కాలిపోతారని హెచ్చరించారు.

న్యూఢిల్లీ: మూకదాడిలో చనిపోయిన వారి కుటుంబాలకు పరిహారం చెల్లించేలా ఉత్తరప్రదేశ్‌ ప్రభుత్వాన్ని ఆదేశించాలంటూ జమియత్‌ ఉలేమా–ఇ–హింద్‌ వేసిన పిటిషన్‌ను సోమవారం సుప్రీంకోర్టు కొట్టి వేసింది. ఈ విషయంలో రాష్ట్ర ప్రభుత్వాన్ని ఆశ్రయించాలంటూ పిటిషనర్‌ను అలహాబాద్‌ హైకోర్టు ఆదేశించడాన్ని సమర్థించింది. దీనిపై తాము జోక్యం చేసుకోజాలమని స్పష్టం చేసింది. తెహ్సీన్‌ పూనావాలా కేసులో అత్యున్నత న్యాయస్థానం జారీ చేసిన మార్గదర్శకాలను రాష్ట్ర ప్రభుత్వం అమలు చేయడం లేదని జమియత్‌ ఉలేమా–ఇ– హింద్‌ తదితర పిటిషనర్లు తెలిపారు. అయితే, జమియాత్‌ ఉలేమా తదితరులు ప్రజా ప్రయోజన వ్యాజ్యం(పిల్‌)ను దాఖలు చేయ డంపై అలహాబాద్‌ హైకోర్టు జూలై 15వ తేదీన చేపట్టిన విచారణ సందర్భంగా తప్పు బట్టింది. మూకదాడి ప్రత్యేకమైన ఘటన అయినందున పిల్‌గా స్వీకరించలేమని తెలిపింది. అయితే, అత్యున్నత న్యాయస్థానం జారీ చేసిన మార్గదర్శకాల అమలు గురించి బాధితులు సంబంధిత ప్రభుత్వ యంత్రాంగాన్ని ఆశ్రయించవచ్చని సూచించింది.

న్యూఢిల్లీ: జమ్మూకశ్మీర్‌కు ప్రత్యేక ప్రతిపత్తిని కల్పించే ఆర్టికల్‌ 370ను రద్దు చేస్తూ కేంద్ర ప్రభుత్వం తీసుకున్న నిర్ణయానికి ప్రముఖ ముస్లిం సంస్థ జమియత్‌ ఉలేమా ఇ హింద్‌ (జేయూహెచ్‌) సంపూర్ణ మద్దతు ప్రకటించింది. భారత్‌లో అంతర్భాగంగా ఉండటంలోనే కశ్మీర్‌ సంక్షేమం ఉందని ఆ సంస్థ పేర్కొంది. జేయూహెచ్‌ జనరల్‌ కౌన్సిల్‌ సమావేశం దేశ రాజధాని న్యూఢిల్లీలో జరిగింది. కశ్మీర్‌లో భారత్‌లో అంతర్భాగమని, అక్కడ ఎలాంటి వేర్పాటువాద ఉద్యమాలు చేసినా అది స్థానిక ప్రజల ప్రయోజనాలను దెబ్బతీస్తాయని పేర్కొంటూ ఈ సమావేశంలో తీర్మానం చేసింది. ‘కశ్మీర్‌ భారత్‌లో అంతర్భాగం. కశ్మీరీలు మన తోటి దేశస్తులు. వేర్పాటువాద ఉద్యమాలు దేశానికే కాదు కశ్మీర్‌ ప్రజలకు కూడా చేటు చేస్తాయి’ అని తీర్మానం పేర్కొంది. భారత్‌లో మమేకమవ్వడంలోనే కశ్మీర్‌ ప్రయోజనాలు ఇమిడి ఉన్నాయని, వేర్పాటువాదంలో కాదని తెలిపింది. అయితే, కశ్మీరీ ప్రజల మానవ, ‍ప్రజాస్వామిక హక్కుల పరిరక్షణ అనేది జాతీయ కర్తవ్యమని తీర్మానం పేర్కొంది. కేంద్రంలోని నరేంద్రమోదీ ప్రభుత్వం ఆర్టికల్‌ 370ను రద్దు చేయడమే కాకుండా.. జమ్మూకశ్మీర్‌ రాష్ట్రాన్ని రెండు కేంద్ర పాలిత ప్రాంతాలుగా విడగొట్టిన సంగతి తెలిసిందే.  


 న్యూఢిల్లీ: బీజేపీ నేతలు తెరలేపిన 'లవ్ జీహాద్' రూమర్లను ఆపేందుకు ప్రధాని నరేంద్రమోడీ నడుంబిగించాలని జమైత్-ఉల్-ఐ-హింద్ జాతీయ కార్యదర్శి మౌలానా మహ్మద్ మదానీ స్పష్టం చేశారు. కొంతమంది  'లవ్ జీహాద్'పేరుతో  ఓట్లను కొల్లగొట్టేందుకు చేసిన యత్నానికి వెంటనే చెక్ పెట్టాల్సిన ఆవశ్యకత ఉందని ఆయన అన్నారు. దీనికి ప్రధానిగా నరేంద్ర మోడీ  బాధ్యత తీసుకోవాలని సూచించారు. ఈ సందర్భంగా జాతీయ వార్తా సంస్థతో మదానీ మాట్లాడారు.
  
 'లవ్ జీహాద్' లో ఎటువంటి వివాదం లేదు. కానీ వాటిని బాగా ప్రాచుర్యంలోకి తీసుకొచ్చారు. ఆ రూమర్లను ఇకనైనా దయచేసి ఆపండి' అంటూ మోడీకి విజ్ఞప్తి చేశారు. ఒకవేళ అదే నిజమైతే ఆ రకమైన చర్యలకు పాల్పడిన వారికి కఠిన శిక్ష విధించాలని మదానీ తెలిపారు.