సందీప్, శివ, విశ్వాస్, ఠాగూర్, సాన్య, జోయా ముఖ్య తారలుగా గంటాడి కృష్ణ దర్శకత్వంలో ఓ సినిమా తెరకెక్కనుంది. గడ్డం రవి సమర్పణలో గంటాడి కృష్ణ, సురేష్‌ రెడ్డి నిర్మిస్తున్న  ఈ సినిమా గురువారం ప్రారంభమైంది. తెలంగాణ సినిమాటోగ్రఫీ మంత్రి తలసాని శ్రీనివాస యాదవ్‌ పూజా కార్యక్రమాల్లో పాల్గొన్నారు. ముహూర్తపు సన్నివేశానికి టీఆర్‌ఎస్‌ నాయకుడు కంచర్ల చంద్రశేఖర్‌ రెడ్డి  కెమెరా స్విచ్చాన్‌ చేయగా, ఎమ్మెల్యే బేతి సుభాష్‌ రెడ్డి క్లాప్‌ ఇచ్చారు. గంటాడి కృష్ణ మాట్లాడుతూ– ‘‘మంచి కథ, కథనాలతో సంగీత ప్రధానంగా సాగే సస్పెన్స్‌ థ్రిల్లర్‌ చిత్రమిది’’ అన్నారు. ‘‘ఓ కొత్త కథతో కృష్ణ ఈ సినిమాని తెరకెక్కిస్తున్నారు’’ అన్నారు సురేష్‌ రెడ్డి. ‘‘కచ్చితంగా హిట్‌ కొడతామనే నమ్మకం ఉంది’’ అన్నారు సందీప్, విశ్వాస్‌. మాజీ ఎమ్మెల్యే కూసుకుంట్ల ప్రభాకర్‌రెడ్డి పాల్గొన్నారు. ఈ చిత్రానికి కెమెరా: జగదీష్‌ బామ్మిశెట్టి, సహ నిర్మాతలు రాధాకృష్ణ, మహేష్‌ కల్లె, ఎగ్జిక్యూటివ్‌ ప్రొడ్యూసర్స్‌: రాహుల్, పరిటాల.


  సంగీత దర్శకుడు  ఘంటాడి కృష్ణ నిర్మాతగా మారారు. యాక్షన్ కట్ ఎంటర్‌టైన్‌మెంట్ అనే నిర్మాణ సంస్థను స్థాపించి ‘6టీన్స్-2’ చిత్రాన్ని నిర్మించనున్నారు. నేడు ఘంటాడి కృష్ణ పుట్టిన రోజు. ఈ సందర్భంగా ఓ ప్రకటన ద్వారా ఈ విషయాన్ని వెల్లడించారు. ‘‘సినిమాల జయాపజయాలు టెక్నీషియన్స్‌పై ప్రభావం చూపుతాయి. నేను చేసిన పాటలు బాగున్నా... నా సినిమాలు సరిగ్గా ఆడకపోవడం వల్ల కాస్త వెనుకబడ్డ మాట నిజం. త్వరలో నేను మొదలు పెట్టబోతున్న నా సొంత సినిమాలో అలనాటి ప్రముఖ హీరోయిన్ తనయుడు హీరోగా నటిస్తాడు. ఇదిలావుంటే... కోడి రామకృష్ణ దర్శకత్వంలో నేను సంగీతం అందించిన  ‘అవతారం’ చిత్రం త్వరలో రానుంది. అలాగే ఓ ప్రముఖ సంస్థ నిర్మిస్తున్న ద్విభాషా చిత్రానికి సంగీతం అందించబోతున్నాను’’ అని తెలిపారు ఘంటాడి కృష్ణ.