షాకింగ్‌: థియేటర్‌లో నటిని వేధించిన తాగుబోతు!

ముంబై: ప్రముఖ మరాఠీ నటి ప్రియా బెర్డేకు థియేటర్‌లో షాకింగ్‌ అనుభవం ఎదురైంది. ఓ తాగుబోతు ఆమెను లైంగికంగా వేధించాడు. దివంగత నటుడు లక్ష్మికాంత్‌ బెర్డే సతీమణి అయిన ప్రియా బెర్డే తన కూతురిని తీసుకొని శనివారం సాయంత్రం థియేటర్‌కు వచ్చారు. ఆమె పక్క సీటులో కూర్చున్న ఓ వ్యక్తి తరచూ ఆమెను లైంగికంగా తాకడమే కాదు ఆ తర్వాత దాడి చేశారు. దీంతో నటి వెంటనే థియేటర్‌ సెక్యూరిటీ సిబ్బందికి సమాచారం ఇచ్చారు.



పారిపోతున్న అతన్ని సెక్యూరిటీ సిబ్బంది పట్టుకొని పోలీసులకు అప్పగించారు. ఈ ఘటనపై ప్రియా బెర్డే పోలీసులకు ఫిర్యాదు చేశారు. నిందితుడు స్థానిక వ్యాపారి సునీల్‌ జాని (43)గా గుర్తించారు. అతడు తాగిన మైకంలో అసభ్యంగా ప్రవర్తించాడని పోలీసులు ధ్రువీకరించారు. కామెడీ పాత్రలు ప్రముఖంగా చేసే ప్రియాబెర్డే మరాఠీలో, బాలీవుడ్‌లో పలు సినిమాల్లో నటించారు.