సాయిధరమ్ సుప్రీమ్

మెగాస్టార్ కాక ముందు చిరంజీవి ‘సుప్రీమ్’ హీరో. ఆయన మేనల్లుడు సాయిధరమ్ తేజ్ ఇదే టైటిల్‌తో ప్రేక్షకుల ముందుకు రానున్నారు.  శ్రీ వెంకటేశ్వర క్రియేషన్స్ పతాకంపై ‘పటాస్’ ఫేమ్ అనిల్ రావిపూడి దర్శకత్వంలో ‘దిల్’ రాజు నిర్మిస్తున్న ఈ చిత్రం బుధవారం హైదరాబాద్‌లో ప్రారంభమైంది. ముహూర్తపు సన్నివేశానికి హీరో నందమూరి కల్యాణ్‌రామ్ కెమెరా స్విచాన్ చేయగా, నిర్మాత అల్లు అరవింద్ క్లాప్ నిచ్చారు.

హరీశ్ శంకర్ గౌరవ దర్శకత్వం వహించారు. ఈ సందర్భంగా ‘దిల్’ రాజు మాట్లాడుతూ- ‘‘ ‘పటాస్’ టైమ్‌లో అనిల్ నాకు ఓ స్టోరీ లైన్ చెప్పాడు. బాగా నచ్చింది. ఈ సినిమాతో తేజ్‌కు స్టార్ ఇమేజ్ వస్తుంది’’ అన్నారు. ‘‘యాక్షన్‌తో పాటు ఫ్యామిలీ ఎమోషన్స్ పుష్కలంగా ఉన్న సినిమా’’ అని సాయిధరమ్ తేజ్ అన్నారు. దర్శకుడు మాట్లాడుతూ - ‘‘మెగా అభిమానులు సంతోషపడేలా ఈ చిత్రాన్ని రూపొందించనున్నాం. అక్టోబర్ 5 నుంచి షూటింగ్ ప్రారంభిస్తాం’’ అని తెలిపారు.