ఏయూలో ఎల్‌ఎల్‌బీ కోర్సు ప్రారంభం

విశాఖపట్నం, న్యూస్‌లైన్ : ఏయూ న్యాయ కళాశాలలో ఈ ఏడాది నుంచి ఎల్‌ఎల్‌బీ ఐదేళ్ల (సెల్ఫ్ ఫైనాన్స్) కోర్సు ప్రారంభించినట్టు ఏయూ వీసీ జి.ఎస్.ఎన్.రాజు తెలిపారు. ఏయూ సెనేట్ హాల్‌లో సోమవారం విలేకరులతో మాట్లాడారు. 10+2 (ఇంటర్) ఉత్తీర్ణులైనవారు ఈ కోర్సుకు అర్హులన్నారు. ఎల్‌ఎల్‌బీలో ఉన్న 60 సీట్లను లాసెట్ కన్వీనర్ ఆదేశాల మేరకు భర్తీ చేయనున్నట్టు చెప్పారు. ఈ కోర్సులో చేరేందుకు ఇతర దేశాల విద్యార్థులు కూడా దరఖాస్తులు చేసుకున్నారని వీసీ చెప్పారు. ఎల్‌ఎల్‌బీలో పది సెమిస్టర్‌లుంటాయని, 24 కంపల్సరీ సబ్జెక్టులు, 6 ఆప్షనల్ సబ్జెక్టులతో పాటు ఇతర సబ్జెక్టులుంటాయని వీసీ వివరించారు. ఈ కోర్సుకు సంబంధించిన పూర్తి వివరాలను లా కళాశాల ప్రిన్సిపాల్ త్వరలో వెబ్‌సైట్‌లో పొందుపర్చుతారని పేర్కొన్నారు.