TV
డీసీసీ అధ్యక్షుడిగా అయూబ్‌ఖాన్‌
వరంగల్‌: జిల్లా కాంగ్రెస్‌ పార్టీ అధ్యక్షుడిగా మహ్మద్‌ అయూబ్‌ఖాన్‌ నియమితులయ్యారు. వరంగల్‌ నగరానికి చెందిన అయూబ్‌ జిల్లా కాంగ్రెస్‌ మైనార్టీ సెల్‌ అధ్యక్షుడిగా పనిచేస్తున్నారు. కాంగ్రెస్‌ నుంచి పలువురు నాయకులు పార్టీలు మారినా ఆయన మారలేదు. టీపీసీసీ ఇచ్చిన పిలుపుమేరకు పార్టీ కార్యక్రమాలు చేపట్టి విధేయత చాటుకున్నారు. జిల్లాలోని ఎమ్మెల్యేలు రెండు వర్గాలుగా వేర్వేరు పేర్లను అధిష్టానానికి పంపించారు. అందరికీ అందుబాటులో ఉంటూ, అగ్రనాయకత్వానికి విధేయుడైనందుకే ఆయనకు డీసీసీ పదవి కట్టబెట్టినట్లు తెలిసింది. రాష్ట్రంలో మైనార్టీకి డీసీసీ అధ్యక్ష పదవి ఇవ్వాలని అధిష్టానం భావించగా అదే కోటాలో అయూబ్‌ఖాన్‌కు పదవి దక్కింది. ఈ మేరకు ఏఐసీసీ జనరల్‌ సెక్రటరీ కేసీ వేణుగోపాల్‌ ఉత్వర్వులు జారీ చేశారు. డీసీసీ అధ్యక్షుడిగా నియమితులైన అయూబ్‌ఖాన్‌ను కాంగ్రెస్‌ నాయకులు కాశిబుగ్గలో శాలువాతో సన్మానించి శుభాకాంక్షలు తెలిపారు.
