TV
నేడు మార్కెట్‌లోకి విజయ డెయిరీ కొత్త ప్యాకింగ్‌
హన్మకొండ చౌరస్తా: తెలంగాణ ప్రభుత్వ రంగ సంస్థ విజయ డెయిరీ పాలు, పెరుగు ఉత్పత్తులను నేటి (శనివారం) నుంచి కొత్త ప్యాకింగ్‌లో వినియోగదారులకు అందుబాటులోకి తీసుకొస్తున్నట్లు వరంగల్‌ యూనిట్‌ డీడీ శ్రవణ్‌కుమార్‌ శుక్రవారం ఓ ప్రకటనలో తెలిపారు. నూతనంగా ప్యాకింగ్‌ ఉత్పత్తులను ములుగురోడ్‌ సమీపంలోని విజయ డెయిరీ ఆవరణలో ఉదయం 11గంటలకు డెయిరీ చైర్మన్‌ గుత్తా అమిత్‌రెడ్డి, వరంగల్‌ ఎంపీ డాక్టర్‌ కావ్య, ఎమ్మెల్యేలు నాయిని రాజేందర్‌రెడ్డి, రేవూరి ప్రకాష్‌రెడ్డిల చేతుల మీదుగా మార్కెట్‌లోకి విడుదల చేయనున్నట్లు పేర్కొన్నారు. 150 ఎంఎల్‌ టోన్డ్‌ మిల్క్‌, 120, 400 టీఎం పెరుగు ప్యాకెట్లతోపాటు 900 గ్రాములు, 1 కేజీ, 5కేజీ, 10కేజీ డీటీఎం పెరుగు బకెట్లను అందుబాటులోకి తీసుకొస్తున్నట్లు వివరించారు.
ఎంబీఏ పరీక్షల పరిశీలన
కేయూ క్యాంపస్‌: కాకతీయ యూనివర్సిటీ పరిధిలో ఎంబీఏ నాల్గవ సెమిస్టర్‌ పరీక్షలు కొనసాగుతున్నాయి. శుక్రవారం క్యాంపస్‌లోని కామర్స్‌అండ్‌ బిజినెస్‌ మేనేజ్‌మెంట్‌ విభాగం పరీక్ష కేంద్రాన్ని రిజిస్ట్రార్‌ వి.రామచంద్రం సందర్శించారు. పరీక్షలు నిర్వహిస్తున్న తీరును పరిశీలించారు. ఆయనవెంట కళాశాల ప్రిన్సి పాల్‌ పి.అమరవేణి, డాక్టర్‌ ప్రగతి ఉన్నారు.
బాలికను దత్తత తీసుకున్న
అమెరికా దంపతులు
హన్మకొండ అర్బన్‌: జిల్లా మహిళాభివృద్ధి శిశు సంక్షేమ శాఖ అనుంబంధ శిశు గృహ, బాల సదనంలో ఆశ్రయం పొందుతున్న పదేళ్ల బాలికను అమెరికా దేశానికి చెందిన దంపతులకు ఇంటర్‌ కంట్రీ అడాప్షన్‌ ఇచ్చినట్లు జిల్లా సంక్షేమాధికారి జయంతి తెలిపారు. గతంలోనే ఈ దంపతులు అంతర్రాష్ట్ర దత్తత కోసం దరఖాస్తు చేసుకున్నట్లు.. దరఖాస్తును పరిశీలించిన కేంద్ర దత్తత వనరుల విభాగం వారికి సీనియార్టీ ప్రకారం శిశు గృహ, బాలసదనంలో రక్షణ సంరక్షణ పొందిన బాలికను నిబంధనల మేరకు కలెక్టర్‌ ఆధ్వర్యంలో దత్తత అందించినట్లు తెలిపారు. ఈసందర్భంగా కలెక్టర్‌ మాట్లాడుతూ.. మాతృత్వం ఒక వరమని అందుకు చట్టబద్ధమైన దత్తత ప్రధాన మార్గమన్నారు. కార్యక్రమంలో చైల్డ్‌ వెల్ఫేర్‌ కమిటీ సభ్యుడు సందసాని రాజేంద్రప్రసాద్‌, బాలరక్షా భవన్‌ కో–ఆర్డినేటర్‌ సీహెచ్‌ అవంతి, సూపరింటెండెంట్‌ కళ్యాణి, జిల్లా బాలల పరిరక్షణ ఇన్‌చార్జ్‌ అధికారి ప్రవీణ్‌కుమార్‌, ప్రొటెక్షన్‌ ఆఫీసర్‌ మౌనిక, దత్తత కేంద్రం సోషల్‌ వర్కర్‌ సంగి చైతన్య పాల్గొన్నారు.
కొనసాగుతున్న
ఇంటర్‌ పరీక్షలు
విద్యారణ్యపురి: ఇంటర్‌ అడ్వాన్స్‌డ్‌ సప్లిమెంటరీ పరీక్షలు కొనసాగుతున్నాయి. హనుమకొండ జిల్లాలో ఉదయం నిర్వహించిన ఇంటర్‌ ప్రథమ ఫస్టియర్‌ పరీక్షలకు 2,127మంది విద్యార్థులకుగాను 1,851మంది (87శాతం)హాజరుకాగా 276మంది గైర్హాజరయ్యారని డీఐఈఓ గోపాల్‌ తెలిపారు. మధ్యాహ్నం జరిగిన సెకండియర్‌ పరీక్షలకు 152మందికిగాను 75మంది హాజరుకాగా, 77మంది విద్యార్దులు గైర్హాజరయ్యారని పేర్కొన్నారు.
వరంగల్‌ జిల్లాలో 91మంది గైర్హాజరు...
వరంగల్‌ జిల్లాలో ఇంటర్‌ ఫస్టియర్‌లో 559మందికి 499మంది హాజరుకాగా, 60మంది విద్యార్థులు గైర్హాజరయ్యారని డీఐఈఓ డాక్టర్‌ శ్రీధర్‌సుమన్‌ తెలిపారు. సెకండియర్‌ పరీక్షల్లో 131మందికిగాను 110మంది హాజరుకాగా, 31మంది విద్యార్థులు గైర్హాజరయ్యారని పేర్కొన్నారు.
భరతనాట్యంలో ధనశ్రీ ప్రతిభ
ఎల్కతుర్తి: భీమదేవరపల్లి మండలం ముల్కనూర్‌కు చెందిన రామారపు రాజు–సంధ్యారాణి దంపతుల కుమార్తె ధనశ్రీ భరతనాట్యంలో రాణిస్తోంది. ఈ మేరకు భూటాన్‌ దేశం రాజధాని తింపు నగరంలోని ప్రసిద్ధి గాంచిన ప్రముఖ బౌద్ధ ఆలయంలో గురువారం జరిగిన సాంస్కృతిక కార్యక్రమాల్లో హనుమకొండ మయూరి నాట్య కళాక్షేత్రం గురువు కుండే అరుణ రాజ్‌కుమార్‌ ఆధ్వర్యంలో ప్రదర్శించిన భరతనాట్యం, కూచిపూడిలో రాణించి బెస్ట్‌ ఫర్ఫార్మెన్స్‌ అవార్డు సొంతం చేసుకుంది. కాగా, బౌద్ధాలయ ప్రధాన అర్చకుడు ఈ అవార్డు అందజేశారు. గురువు రాజ్‌కుమార్‌ ధనశ్రీని ప్రత్యేకంగా అభినందించారు.
నేడు మార్కెట్‌లోకి విజయ డెయిరీ కొత్త ప్యాకింగ్‌
