ఉలిక్కిపడిన విశాఖ

వెల్డింగ్‌ దుకాణంలో పేలిన సిలిండర్‌
● కంపించిన పాతనగరం ● రెండు కిలోమీటర్ల మేర పేలుడు శబ్దం ● ముగ్గురి మృతి.. ముగ్గురికి తీవ్ర గాయాలు ● 9 అడుగుల ఎత్తయిన గోడ దాటి పడిన మృతుల శరీర భాగాలు ● షాపు వెనుక 150 అడుగుల దూరంలో ఉన్న ఇళ్లపై పేలుడు ప్రభావం ● ఓ ఇంట్లో సీలింగ్‌ పడి చిన్నారికి గాయం

పని దొరికింది.. హ్యాపీ అన్నాడు..

ప్రమీలా పని దొరికింది. ఇంత కాలం ఖాళీగానే ఉన్నా. ఇక మనకు పర్వాలేదు. హ్యాపీ అంటూ వెళ్లిన తన భర్త, పేలుడు ఘటనలో గాయపడి చికిత్స పొందుతూ మరణించడంతో చింతకాయల ముత్యాలు భార్య ప్రమీల కేజీహెచ్‌ మార్చురీ వద్ద వెక్కివెక్కి గుండెలవిసేలా రోదించింది. ఆమెను ఓదార్చడం ఎవరితరం కాలేదు. అర్ధంతరంగా వదిలి వెళ్లిపోయావు నాయనా.. పిల్లల్ని ఎవరు చూస్తారంటూ ప్రమీల తల్లి(ముత్యాలు అత్త) వేదన అంతా ఇంతా కాదు. పోస్టుమార్టం కోసం మార్చురీకి తీసుకెళ్తుండగా ముత్యాలు మృతదేహాన్ని చూసి ప్రమీల సొమ్మసిల్లిపోయింది. వీరు ఇద్దరు పిల్లలతో బుక్కావీధిలో ఉంటున్నారు.

అనాథలయ్యాం..

లోలోర 365 వర్క్‌షాప్‌ను 6 నెలల కిందట అప్పు చేసి రూ.3 లక్షలకు గణేష్‌ తీసుకున్నాడు. అంత వరకు టౌన్‌కొత్తరోడ్డు సమీపాన ఓ దుకాణంలో పనిచేశాడు. సొంతంగా దుకాణం పెట్టుకోవడంతో పాటు పలువురికి ఉపాధి కల్పించాడు. ఆరు నెలల్లోనే భగవంతుడు తమ నుంచి దూరం చేశాడంటూ గణేష్‌ భార్య సుధ రోదించిన తీరు అక్కడున్నవారిని కలచివేసింది. సున్నపువీధిలో ఉంటున్న వీరికి టెన్త్‌ చదువుతున్న లక్ష్మీసంపత్‌, 8వ తరగతి చదువుతున్న వర్షిత్‌శ్రీ ఉన్నాడు.

ఒంటరైన శ్రీను భార్య

ఇదే వర్క్‌షాప్‌లో పనిచేస్తున్న ఒడిశాకు చెందిన శ్రీను కూడా మృతి చెందాడు. ఆరేళ్ల కిందట బతుకుతెరువు కోసం విశాఖ వచ్చిన శ్రీను బుక్కావీధిలోనే అద్దెకు ఉంటూ వర్క్‌షాప్‌లో పనిచేస్తున్నాడు. శ్రీను మరణంతో భార్య ఒంటరయింది.

● ఘటనలో తీవ్రంగా గాయపడి కేజీహెచ్‌లో చికిత్స పొందుతున్న ఇప్పిలి రంగారావు(53) బుక్కావీధి, ఫిషింగ్‌ హార్బర్‌ రోడ్డులో స్క్రాప్‌ దుకాణం నడుపుతున్నాడు. తెలకలవీధి, చెంగల్రావుపేటలో నివాసం ఉంటున్నాడు. రంగారావు పెద్ద కుమారుడు జై నగరంలోని పోర్టు ట్రస్ట్‌కు సమీపాన ఓ స్క్రాప్‌ దుకాణం నడుపుతుండగా, రెండో కుమారుడు నవీన్‌ పారిస్‌లో బీబీఏ చదువుతున్నాడు. మూడో కుమారుడు గౌరీశంకర్‌ సీమెన్‌. భార్య భారతి గృహిణి. రంగారావు పరిస్థితి క్రిటికల్‌గానే ఉందని వైద్యులు తెలిపారు.

● లోలోర 365 వర్క్‌షాప్‌ యజమాని గణేష్‌ వద్ద పని చేస్తున్న యర్రా ఎల్లాజీకి తీవ్ర గాయాలయ్యాయి. పరిస్థితి విషమంగా ఉందని వైద్యులు చెప్తున్నారు. ఎల్లాజీ భార్య లక్ష్మి, ఇద్దరు కుమారులతో మధురవాడలో ఉంటున్నాడు. పెద్దకుమారుడు గణేష్‌ పౌండ్రీలో పనిచేస్తుండగా, చిన్నోడు హరికృష్ణ ఏసీ మెకానిక్‌.

అరగంట దాటి ఉంటే..

రోజూ సాయంత్రం 5 గంటల సమయంలో లోలోర 365 వర్క్‌షాప్‌(గణేష్‌ దుకాణం) వద్దకు పరిసర దుకాణాల నుంచి పదుల సంఖ్యలో చేరుకుంటారు. కాసేపు పిచ్చాపాటి మాట్లాడుకునే వారు. దుర్ఘటన అరగంట ముందుగా జరగడంతో చాలా మంది ప్రాణాలు దక్కినట్లేనని స్థానికులు ‘సాక్షి’కి తెలిపారు.

భూమి అదిరింది..

సాయంత్రం 4.30 సమయంలో ఇంటి పనులు చేసుకుంటున్నాం. ఒక్కసారిగా పెద్ద సౌండ్‌ వచ్చింది. భూకంపం మాదిరి భూమి అదిరింది. పై ఫ్లోర్‌లో ఉన్న నేను భయంతో కిందికి వచ్చేశాను. పక్కనే నల్లటి పొగ కనిపించింది. ఇంతలో వెల్డింగ్‌ షాపు నుంచి పొగలు కమ్ముకున్నాయి. పెద్దపెద్ద అరుపులు, ఆర్తనాదాలు వినిపించాయి. ఫైర్‌ ఇంజన్‌ వచ్చి మంటలు ఆర్పిన తర్వాతే గ్యాస్‌ సిలిండర్‌ పేలినట్లు తెలిసింది. – స్థానికురాలు

విశాఖ సిటీ/డాబాగార్డెన్స్‌ : విశాఖ నగరం ఒక్కసారిగా ఉలిక్కిపడింది. భారీ విస్ఫోటనంతో పాత నగరం భూకంపం వచ్చినట్లు అదిరింది. గురువారం సాయంత్రం 4.30 గంటలకు ఫిషింగ్‌ హార్బర్‌ రోడ్డులో ఒక వెల్డింగ్‌ దుకాణంలో గ్యాస్‌ సిలిండర్‌ పేలింది. ఈ పేలుడు ధాటికి ఇద్దరి వ్యక్తుల శరీర భాగాలు 9 అడుగుల ఎత్తయిన గోడపై నుంచి ఎగిరి అవతల పడ్డాయి. పేలుడు కారణంగా సంభవించిన మంటల్లో చిక్కుకున్న నలుగురు తీవ్రంగా కాలిపోయారు. దీంతో వన్‌టౌన్‌ ప్రాంతంలో విషాద ఛాయలు అలుముకున్నాయి. రెండు కిలోమీటర్ల మేర ప్రజలను ఈ పేలుడు శబ్దం భయాందోళనకు గురిచేసింది.

చెల్లాచెదురైన శరీర భాగాలు

సున్నపువీధి ప్రాంతానికి చెందిన చల్లా గణేష్‌(44) వెల్డింగ్‌ పనులు చేస్తూ జీవనం సాగిస్తున్నాడు. ఆరు నెలల క్రితమే బుక్కా వీధిలో ఫిషింగ్‌ హార్బర్‌ రోడ్డులో వెల్డింగ్‌ దుకాణాన్ని తెరిచాడు. ఒడిశాకు చెందిన శ్రీను హెల్పర్‌గా పనిచేస్తున్నాడు. గురువారం హెల్పర్‌ శ్రీను(29)తో పాటు మరో ఇద్దరు వర్కర్లు ఎర్ర ఎల్లాజీ(45), సన్యాసిరావు(46)లను పనికి పెట్టుకున్నాడు. వీరు ఎప్పటిలాగే వెల్డింగ్‌, గ్యాస్‌ కటింగ్‌ పనులు చేస్తుండగా సాయంత్రం 4.30 గంటలకు సిలిండర్‌ పేలిపోయింది. అక్కడే ఉన్న యజమాని గణేష్‌, హెల్పర్‌ శ్రీనుల మృతదేహాలు చెల్లాచెదురుగా ఎగిరిపడ్డాయి. వెల్డింగ్‌ షాపు నామరూపాలు లేకుండా తునాతునకలైంది. పేలుడు ధాటికి మంటలు వ్యాపించాయి. అక్కడే పనిచేస్తున్న వర్కర్లు ఎర్ర ఎల్లాజీ, సన్యాసిరావుతో పాటు పక్కన ఉన్న స్క్రాప్‌ దుకాణంలో పనిచేస్తున్న చింతకాయల ముత్యాలు(27), ఇప్పిలి రంగారావు(53) ఆ మంటలకు తీవ్రంగా గాయపడ్డారు.

ఆటోలో క్షతగాత్రుల తరలింపు

భారీ ప్రమాదం జరిగినప్పటికీ ఘటనా స్థలానికి 108 అంబులెన్సులు రాకపోవడం గమనార్హం. కేవలం మృతదేహాల తరలింపు కోసం మాత్రమే అంబులెన్సును తీసుకొచ్చారు. నలుగురు క్షతగాత్రులను ఆటోలో తరలించడంపై స్థానికులు సైతం ఆగ్రహం వ్యక్తం చేశారు. మంటల్లో 90 శాతానికి పైగా కాలిన శరీరంతో బాధను తట్టుకోలేక.. ఆర్తనాదాలు పెడుతూ ఆటో ఎక్కడం అక్కడున్న వారందరినీ కలిచివేసింది.

ఇద్దరి పరిస్థితి విషమం

ఘటనా స్థలంలోనే ఇద్దరు మృతి చెందగా నలుగురికి తీవ్ర గాయాలయ్యాయి. క్షతగాత్రులు ఎర్ర ఎల్లాజీ(45), సన్యాసిరావు(46), చింతకాయల ముత్యాలు(27), ఇప్పిలి రంగారావు(53)లను చికిత్స కోసం కేజీహెచ్‌కు తరలించారు. వీరిలో చింతకాయల ముత్యాలు చికిత్స పొందుతూ ఆస్పత్రిలో మరణించాడు. ఎల్లాజీ 95 శాతం, రంగారావు 75 శాతం మేర కాలిపోయారు. వీరి పరిస్థితి విషమంగా ఉన్నట్లు వైద్యులు తెలిపారు. 18 శాతం కాలిన గాయాలైన సన్యాసిరావును చికిత్స కోసం మెడికవర్‌ ఆస్పత్రికి తరలించారు.

కంపించిన ఇళ్లు.. చిన్నారిపై పడిన సీలింగ్‌

ఒక్కసారిగా భారీ శబ్ధంతో భూమి అదరడంతో స్థానికులు తీవ్ర భయాందోళనకు గురయ్యారు. ఆ సమయంలో సుమారు 200 మీటర్ల వరకు ఉన్న ఇళ్లు కంపించాయి. వెల్డింగ్‌ దుకాణానికి 150 అడుగుల దూరంలో ఉన్న ఒక ఇంట్లో సీలింగ్‌ కూలింది. ఆ ఇంట్లో గాయత్రీ అనే చిన్నారి(11)పై ఆ పెచ్చులు పడ్డాయి. దీంతో ఆమె తలకు గాయమైంది. మరికొన్ని ఇళ్లు కూడా స్వల్పంగా దెబ్బతిన్నట్లు స్థానికులు చెబుతున్నారు.

ఘటనా స్థలానికి అధికారులు

ఘటనా స్థలాన్ని కలెక్టర్‌ హరేందిర ప్రసాద్‌, సీపీ డాక్టర్‌ శంఖబ్రత బాగ్చి, జీవీఎంసీ కమిషనర్‌ కేతన్‌ గార్గ్‌, జేసీ మయూర్‌ అశోక్‌, ఎమ్మెల్యే వంశీకష్ణ శ్రీనివాస్‌ సందర్శించారు. అక్కడ ప్రమాదం జరిగిన తీరును పరిశీలించారు. అనంతరం కేజీహెచ్‌లో చికిత్స పొందుతున్న బాధితులను పరామర్శించారు. క్షతగాత్రులకు మెరుగైన వైద్య చికిత్స అందించాలని ఆదేశించారు. కేజీహెచ్‌ సూపరింటెండెంట్‌ డాక్టర్‌ వాణి, డీఎంహెచ్‌వో డాక్టర్‌ పి.జగదీశ్వరరావు క్షతగాత్రులకు అందిస్తున్న వైద్యం గురించి వివరించారు.

మృతులు

చల్లా గణేష్‌(44), శ్రీను (29),

చింతకాయల ముత్యాలు(27)

క్షతగాత్రులు

ఎర్ర ఎల్లాజి(45), టి.సన్యాసిరావు(46),

ఇప్పిలి రంగారావు(53)

తీవ్రంగా కలచివేసింది: బొత్స

గ్యాస్‌ సిలిండర్‌ పేలుడు ప్రమాదంలో ముగ్గురు చనిపోవడం తనను తీవ్రంగా కలచివేసిందని శాసనమండలి విపక్షనేత బొత్స సత్యనారాయణ పేర్కొన్నారు. మృతుల కుటుంబాలకు నష్టపరిహారం అందజేసి ప్రభుత్వం ఆదుకోవాలని డిమాండ్‌ చేశారు. మృతుల కుటుంబాలకు ప్రగాఢ సానుభూతి తెలియజేశారు. క్షతగాత్రులకు మెరుగైన వైద్యం అందించాలని డిమాండ్‌ చేశారు.

ప్రమాదంపై కేకే రాజు దిగ్భ్రాంతి

గ్యాస్‌ సిలిండర్‌ పేలుడు ప్రమాదంలో ముగ్గురు మృతి చెందడంపై వైఎస్సార్‌ సీపీ విశాఖ జిల్లా అధ్యక్షుడు కేకే రాజు దిగ్బ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలియజేశారు. క్షతగాత్రులకు మెరుగైన వైద్యం అందించాలని డిమాండ్‌ చేశారు. బాధిత కుటుంబాలకు ప్రభుత్వం తగిన నష్టపరిహారం అందేలా చర్యలు తీసుకోవాలన్నారు.

ఏ సిలిండర్‌ పేలింది?

ఘటనా స్థలంలో ఆక్సిజన్‌ సిలిండర్లతో పాటు డొమెస్టిక్‌ సిలిండర్‌ కూడా ఉంది. వీటిలో ఏ సిలిండర్‌ ప్రమాదానికి కారణమైందన్న విషయం తేలాల్సి ఉంది. సాధారణంగా డొమెస్టిక్‌ సిలిండర్‌ పేలితే అది ముక్కలైపోతుంది. కానీ అక్కడ ఉన్న సిలిండర్‌ బాగానే ఉంది. అలాగే ఆక్సిజన్‌ సిలిండర్లు మూడు ఉండగా.. ఒకదానికి మాత్రం పైన వాల్వ్‌ పడిపోయి ఉంది. సాధారణ సిలిండర్‌ కంటే ఆక్సిజన్‌ సిలిండర్‌ పేలుడు కారణంగానే భారీగా విస్ఫోటనం సంభవిస్తుంది. చదరపు ఇంచ్‌కు 2 వేల పౌండ్ల ఒత్తిడితో సంభవించే ఈ పేలుడుకు భారీ నష్టం వాటిల్లుతుందని అధికారులు చెబుతున్నారు. అలాగే గ్యాస్‌ సిలిండర్‌ పేలితే మాత్రం 5 మీటర్ల పరిధిలో ఉన్న వారికి మృత్యు ప్రమాదం ఉంటుందని, గరిష్టంగా 32 మీటర్ల దూరంలో ఉన్న వారికి గాయాలయ్యే అవకాశం ఉంటుందని చెబుతున్నారు. దీని ప్రకారం ఈ ఘటనలో ఆక్సిజన్‌ సిలిండర్‌ పేలిందా? లేదా గ్యాస్‌ సిలిండర్‌ ప్రమాదానికి కారణమైందన్నది విచారణ చేయాల్సి ఉందని అగ్నిమాపక శాఖ అధికారులు పేర్కొంటున్నారు.

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ

ఉలిక్కిపడిన విశాఖ