అంధ మహిళా ఉద్యోగి దారుణ హత్య

ఇరిగేషన్‌ శాఖలో పనిచేస్తున్న, అంధురాలైన మహిళా ఉద్యోగి దారుణహత్యకు గురయ్యారు. ఒంగోలు ఆర్టీసీ డిపో వెలుపలి వైపు ఓ లాడ్జిలో బుధవారం రాత్రి చోటుచేసుకున్న ఈ హత్య స్థానకంగా కలకలం రేపింది. పోలీసుల కథనం మేరకు.. సీఎస్‌పురం మండలం బొడ్డువారిపల్లికి చెందిన ఆదిలక్ష్మి(38) ప్రస్తుతం ఒంగోలు ఎన్‌జీఓ కాలనీలో నివాసం ఉంటున్నారు. ఆమె ఆరేళ్ల క్రితం అంధుడైన వరప్రసాద్‌ను కులాంతర వివాహం చేసుకుంది. వీరికి ఐదేళ్ల కుమారుడు ఉన్నాడు. మంగళవారం విధులకు వెళ్లిన ఆదిలక్ష్మి ఇంటికి తిరిగి రాకపోవడంతో కుటుంబ సభ్యులు ఆందోళన చెందారు. బంధువులు కార్యాలయం సహా పలు ప్రాంతాల్లో గాలించినా ఆచూకీ లభించకపోవడంతో మంగళవారం రాత్రి పోలీసులకు ఫిర్యాదు చేశారు. ఆదిలక్ష్మి ఫోన్‌ సిగ్నల్‌ ఆధారంగా ఆమె శ్రీరామ్‌ లాడ్జిలో ఉన్నట్లు పోలీసులు గుర్తించారు. కీ రిజిస్టర్‌లో ఆదిలక్ష్మి సమీప బంధువు వెంకటరమణ పేరుతో ఒక గది బుక్‌ అయి తాళం వేసి ఉంది. దీంతో అనుమానం వచ్చిన పోలీసులు కొంతసేపు నిందితుడి రాక కోసం వేచిచూశారు. మరో తాళంతో గది తలుపులు తెరిచి చూడగా ఆదిలక్ష్మి రక్తపు మడుగులో శవమై కనిపించింది. ఆమెను గొంతు కోసి హత్య చేసినట్లు పోలీసులు ప్రాథమికంగా నిర్ధారించారు. సమీప బంధువు వెంకటరమణతో ఆదిలక్ష్మి సన్నిహితంగా ఉంటుందన్న విషయం తెలియడంతో ఆ కోణంలోనూ పోలీసులు విచారణ చేపట్టారు. పరారైన వెంకటరమణ కోసం పోలీసులు గాలింపు చర్యలు చేపట్టారు. సంఘటన స్థలాన్ని ఎస్పీ హర్షవర్థన్‌ రాజు పరిశీలించారు. పోస్ట్‌మార్టం నిమిత్తం మృతదేహాన్ని జీజీహెచ్‌కు తరలించారు. ఒన్‌టౌన్‌ పోలీసులు కేసు దర్యాప్తు చేస్తున్నారు.