TV
సరైన మార్గంలో రాష్ట్ర కాంగ్రెస్‌
ఈ నెల 30 నాటికి కొత్త జిల్లా అధ్యక్షుల ప్రకటన
అక్టోబర్‌ 2 నుంచి రాష్ట్ర వ్యాప్తంగా పాదయాత్ర
కాంగ్రెస్‌ నేత కేసీ వేణుగోపాల్‌
భువనేశ్వర్‌: ‘కాంగ్రెస్‌లో అగ్ర, మధ్య, నిమ్న స్థాయి తేడా లేకుండా అందరూ నాయకులే. 2029 మనదే. భక్త చరణ్‌ దాస్‌ నాయకత్వంలో ఒడిశాలో కాంగ్రెస్‌ సరైన మార్గంలో ఉంది. రాహుల్‌ గాంధీ వేల మైళ్లు పాదయాత్రలో నడుస్తుంటే, మనం ఎందుకు చేయలేము?’ అంటూ ఆదివారం స్థానిక కాంగ్రెస్‌ భవన్‌లో జరిగిన సమావేశంలో అఖిల భారత కాంగ్రెస్‌ కమిటీ సంస్థాగత ప్రధాన కార్యదర్శి కేసీ వేణు గోపాల్‌ పార్టీ నాయకులు, కార్యకర్తల్లో ఉత్సాహాన్ని ప్రేరేపించారు. రాహుల్‌ గాంధీ మార్గదర్శకత్వంలో గుజరాత్‌లో జరిగిన 10 రోజుల శిక్షణా శిబిరం తరహాలో ఒడిశా కాంగ్రెస్‌ కూడా ఇలాంటి కార్యక్రమాన్ని నిర్వహిస్తుందని ఆయన తెలియజేశారు.
పార్టీ సీనియర్‌ నాయకులతో కూడిన రాజకీయ వ్యవహారాల కమిటీ (పీఏసీ) సమావేశంలో పార్టీ ఎమ్మెల్యేలు, ఎంపీలందరి సమక్షంలో ప్రజల దృష్టిలో పార్టీ ఇప్పుడు ఒడిశాలో ప్రధాన ప్రతిపక్ష పార్టీగా గుర్తింపు పొందుతుందన్నారు. పార్టీ నాయకులు, కార్యకర్తలు కష్టపడి పనిచేస్తే, భారతీయ జనతా పార్టీ, బిజూ జనతా దళ్‌ రెండింటినీ ఓడించడం సాధ్యమేనని తెలిపారు. ఒడిశాలోని మొత్తం 35 సంస్థాగత జిల్లాల అధ్యక్షుల ఎంపిక ఈ నెల 30 నాటికి పూర్తవుతుందని, కొత్తగా నియమితులైన జిల్లా అధ్యక్షుల పనిని ప్రతి మూడు నెలలకు ఒకసారి సమీక్షిస్తారని తెలిపారు. అక్టోబర్‌లో కాంగ్రెస్‌ అన్ని మండలాలకు చేరుకుంటుందని, నవంబర్‌, డిసెంబర్‌లో ఓటు దొంగతనం అంశాన్ని అట్టడుగు స్థాయికి తీసుకెళ్లాలని, బూత్‌ కమిటీలను ఏర్పాటు చేసే పనిని పూర్తి చేయాలని ఆయన పిలుపునిచ్చారు. పీసీసీ అధ్యక్షుడు ప్రతిపాదించిన గాంధీ జయంతి నుంచి ఏడాది పొడవునా జరిగే రాష్ట్ర వ్యాప్త పాదయాత్రను ఆయన ప్రశంసించారు. క్రియాశీల నాయకులు, కార్మికులు పాల్గొనాలని కోరారు. రాజకీయ వ్యవహారాల కమిటీ సమావేశానికి అధ్యక్షత వహించిన ఏఐసీసీ ఒడిశా వ్యవహారాల ఇన్‌చార్జి అజయ్‌ కుమార్‌ లల్లు మాట్లాడుతూ కాంగ్రెస్‌ ఇప్పుడు రాష్ట్రంలో పురోగమిస్తోందన్నారు. దే చురుకుదనంతో నిరవధికంగా కృషి చేస్తే 2029లో మమ్మల్ని ఆపడం అసాధ్యమని పార్టీ శ్రేణుల్ని ఉత్సాహపరిచారు.
సరైన మార్గంలో రాష్ట్ర కాంగ్రెస్‌
