స్థానికం.. సందిగ్ధం

స్థానికం.. సందిగ్ధం

నిర్మల్‌చైన్‌గేట్‌: స్థానిక సంస్థల ఎన్నికల్లో బీసీలకు 42 శాతం రిజర్వేషన్లు కల్పించడంపై ఆందోళనలు వ్యక్తమవుతున్నాయి. ఈ అంశం హైకోర్టు పరిధిలో ఉండటంతో ఆశావహుల్లో అనిశ్చితి నెలకొంది. ఎన్నికల కమిషన్‌ షెడ్యూల్‌ విడుదల చేసినప్పటికీ, స్థానిక పదవుల కోసం ఏడాదిన్నరగా ఎదురుచూస్తున్నవారిలో ఉత్సాహం కనిపించడం లేదు. రాజ్యాంగపరమైన సమస్యలతో ముడిపడిన ఈ పరిస్థితిలో ఎన్నికలు జరుగుతాయా? లేదా?.. జరిగితే ప్రస్తుత రిజర్వేషన్ల ప్రకారమా లేక పాత విధానంతోనా అన్న చర్చ జరుగుతోంది. రిజర్వేషన్లు అనుకూలంగా వచ్చినప్పటికీ ఆశావహులు ధైర్యంగా అడుగులు వేయడం లేదు. కోర్టు తీర్పు వరకు వేచి ఉండాల్సిన పరిస్థితి నెలకొంది. ఈ విషయంపై స్పష్టత కోసం మరో నాలుగు రోజులు ఆగాల్సిందే. అనుకూల ఫలితాలు వచ్చినవారు కూడా తదుపరి అడుగులు ఎలా వేయాలో తెలియక గందరగోళంలో పడ్డారు.

తీర్పు ప్రతికూలమైతే..

జిల్లాలో 18 జెడ్పీటీసీ స్థానాలు, 157 ఎంపీటీసీ స్థానాలు, 400 గ్రామ పంచాయతీలు, 3,368 వార్డులు ఉన్నాయి. పార్టీ గుర్తులపై జరిగే జెడ్పీటీసీ, ఎంపీటీసీ స్థానాలకు అధికార కాంగ్రెస్‌, ప్రతిపక్ష బీజేపీ, బీఆర్‌ఎస్‌, బీఎస్పీల నుంచి అభ్యర్థులు పోటీ పడే అవకాశం ఉంది. వీరితోపాటు స్వతంత్రులు కూడా బరిలోకి దిగే అవకాశం ఉంది. ఒక్కో స్థానానికి కనీసం పది మంది అభ్యర్థులు పోటీలో ఉండనున్నారు. జిల్లా వ్యాప్తంగా జెడ్పీటీసీలకు 200 మంది, ఎంపీటీసీలకు 2 వేల మంది బరిలో దిగుతారని అంచనా. పార్టీ గుర్తులకు అతీతంగా జరిగే సర్పంచ్‌ స్థానాలకు ముగ్గురు నుంచి నలుగురు చొప్పున సుమారు 2 వేల మంది, వార్డులకు ఇద్దరు ముగ్గురు చొప్పున పది వేల మంది పోటీ చేసే అకాశం ఉంది.

8న కోర్టు తీర్పు..

స్థానిక సంస్థల ఎన్నికలు ఏడాది కాలంగా వాయిదా పడుతూ ఎట్టకేలకు షెడ్యూల్‌ వచ్చేసింది. అన్నీ సవ్యంగా జరిగితే మొదటి దశ నామినేషన్లు మరో ఐదు రోజుల్లో ప్రారంభమవుతాయి. రిజర్వేషన్ల అంశం కోర్టు పరిధిలో ఉండటంతో ఆశావహులు అక్టోబర్‌ 8 వరకు వేచి ఉండాలి.ఈ పరిస్థితిలో ముందుకు అడుగేయడమే సరైనదని కొందరు భావిస్తున్నారు. ఖర్చుల విషయంలో కూడా జాగ్రత్తగా ఉంటున్నారు. ఇప్పటి నుంచి పెట్టుబడి పెడితే, పరిస్థితి ప్రతికూలమైతే నష్టపోతామని కొందరు భావిస్తున్నారు.