ఉజ్వల భవిష్యత్తుకు పాలిటెక్నిక్‌..

లక్ష్మణచాంద: ఉజ్వల భవిష్యత్తుకు పాలిటెక్నిక్‌ విద్య పాలిటెక్నిక్‌ బాటలు వేస్తోంది. ఈ విద్యకు ప్రభుత్వం ప్రాధాన్యత ఇస్తోంది. ఇంజినీర్‌గా ఎదగాలనుకునే వారికి ఈ కోర్సు ముఖ్యమైందని నిర్మల్‌ ప్రభుత్వ పాలిటెక్నిక్‌ కళాశాల ప్రిన్సిపాల్‌ డా.రమేశ్‌ తెలిపారు. పాలిటెక్నిక్‌ డిప్లొమా సాంకేతిక విద్యలో ఉద్యోగావకాశాలు మెండుగా ఉంటాయని, ఉమ్మడి జిల్లా విద్యార్థులకు ఇది మంచి అవకాశమని పేర్కొన్నారు.

అందుబాటులో కోర్సులు

డిప్లొమా ఇన్‌ మెకానికల్‌ ఇంజినీరింగ్‌, డిప్లొమా ఇన్‌ సివిల్‌ ఇంజినీరింగ్‌, డిప్లొమా ఇన్‌ ఎలక్ట్రికల్‌ ఇంజినీరింగ్‌, డిప్లొమా ఇన్‌ ఎలక్ట్రానిక్స్‌ అండ్‌ కమ్యూనికేషన్‌ ఇంజినీరింగ్‌, డిప్లొమా ఇన్‌ కంప్యూటర్‌ సైన్స్‌ ఇంజినీరింగ్‌, డిప్లొమా ఇన్‌ కెమికల్‌ ఇంజినీరింగ్‌, ఇతర స్పెషలైజేషన్లు, అగ్రికల్చర్‌, హార్టికల్చర్‌, ఫిషరీస్‌, వెటర్నరీ డిప్లొమా కోర్సులు అందుబాటులో ఉన్నాయి. పాలిసెట్‌ ద్వారానే అడ్మిషన్స్‌ పొందవచ్చు.

ఉద్యోగావకాశాలు

జూనియర్‌ ఇంజినీర్‌: ప్రభుత్వ, ప్రైవేట్‌ రంగాల్లో పని చేయడం, ప్రాజెక్టులను పర్యవేక్షించడం, బృందాలు నిర్వహించడం.

టెక్నీషియన్‌: పరిశోధన, అభివృద్ధి, పరీక్ష, నిర్వహణలో ఇంజినీర్లు, శాస్త్రవేత్తలకు సహాయం చేయడం.

సూపర్‌వైజర్‌: తయారీ పరిశ్రమల్లో ఉత్పత్తి, నాణ్యత నియంత్రణ, నిర్వహణ పర్యవేక్షించడం.

తయారీ రంగం: ఆటోమొబైల్‌, ఏరోస్పేస్‌, హెవీ మెషినరీ, ఎలక్ట్రానిక్స్‌, వివిధ పరిశ్రమలకు డిప్లొమా హోల్డర్లను నియమించుకుంటాయి.

నిర్మాణ రంగం: భవనం, పౌర, మౌలిక సదుపాయాల ప్రాజెక్టులకు నిర్మాణం, ఎలక్ట్రికల్‌ ఇతర మెకానికల్‌ ఇంజినీరింగ్‌లో డిప్లొమా హోల్డర్లు అవసరం.

ఐటీ,ఐటీఈఎస్‌: సాఫ్ట్‌వేర్‌ డెవలప్‌మెంట్‌, టెస్టింగ్‌, మెయింటెనెన్స్‌ కోసం కంప్యూటర్‌ సైన్స్‌, ఎలక్ట్రానిక్స్‌, కమ్యూనికేషన్‌ ఇంజినీరింగ్‌లో డిప్లొమా హోల్డర్లు అవసరం.

జీతం ప్యాకేజీలు: డిప్లొమా హోల్డర్లు పరిశ్రమ, ఉద్యోగ పాత్ర, స్థానాన్ని బట్టి నెలకు రూ.15 వేల నుంచి రూ.30 వేల వరకు జీతం ప్యాకేజీ ఉంది.

విద్యార్థులకు వరంలాంటిది

ఆదిలాబాద్‌, నిర్మల్‌, బెల్లంపల్లి, ఉట్నూర్‌లో మెకానికల్‌, ఎలక్ట్రికల్‌ ఎలక్ట్రానిక్స్‌, కంప్యూటర్స్‌, సివిల్‌ కోర్సులు అందుబాటులో ఉన్నాయి. ఉమ్మడి జిల్లా విద్యార్థులకు పాలిటెక్నిక్‌ విద్య వరంలాంటిది. పాలిసెట్‌ పరీక్ష రాసి డిప్లొమా కోర్సుల్లో అడ్మిషన్‌ పొందాలి. సాంకేతిక విద్యనభ్యసించి ఉద్యోగావకాశాలు పొందాలి. ఈ సంవత్సరం నూతనంగా కంప్యూటర్‌ సైన్స్‌, ఆటోమేషన్‌ రోబోటిక్స్‌ కోర్సులు మంజూరు చేయాలని కోరుతూ ఏఐసీటీకి దరఖాస్తు చేశాం. మరో రెండు కోర్సులు నిర్మల్‌లో అదనంగా అందుబాటులోకి వస్తాయి.

– డా.టి.రమేశ్‌,

ప్రిన్సిపాల్‌, పాలిటెక్నిక్‌ కళాశాల, నిర్మల్‌

పరీక్ష వివరాలు:

అధికారిక వెబ్‌సైట్‌: polycet. sbtet. telangana. gov. inÌ

దరఖాస్తుకు చివరి తేదీ: 20.04.2026

అపరాధ రుసుము: రూ.100 (21.04.26)

అపరాధ రుసుము: రూ.300 (22.04.26)

పరీక్ష తేదీ: మే 13, 2026

రిజిస్ట్రేషన్‌ ఫీజు ఎస్సీ, ఎస్టీలకు: రూ.250

ఇతరులకు: రూ.500

పరీక్ష విధానం: ఆఫ్‌లైన్‌ (పెన్‌–అండ్‌–పేపర్‌ టెస్ట్‌) 2:30 గంటలు, మ్యాథమెటిక్స్‌(60), ఫిజిక్స్‌(30), కెమిస్ట్రీ(30), బయాలజీ(30) నుంచి 150 ప్రశ్నలు ఉంటాయి. అగ్రికల్చర్‌, హార్టికల్చర్‌, ఫిషరీస్‌, వెటర్నరీ డిప్లొమా కోర్సులు చేయాల్సినవారికి బయాలజీ ప్రశ్నలు కూడా ఉంటాయి.

ఉన్నత విద్యావకాశాలు: పాలిటెక్నిక్‌ చేసిన తర్వాత ఇంజినీరింగ్‌ కోర్సుల్లో రెండో సంవత్సరం నేరుగా ఈ సెట్‌ పరీక్ష ద్వారా అడ్మిషన్లు పొందవచ్చు.