TV
ప్రభుత్వ ఆస్పత్రి.. బినామీ వైద్యుడు!
● అర్హత లేని వ్యక్తితో వైద్య సేవలు
● రోగుల ప్రాణాలతో చెలగాటం
● నిర్లక్ష్యంగా వైద్యశాఖ అధికారులు
నారాయణపేట రూరల్‌: వైద్యో నారాయణో హరి అంటారు. కానీ ఓ మహిళ వైద్యురాలు అందుకు భిన్నంగా వ్యవహరిస్తూ వైద్య వృత్తికే కళంకం తెస్తుంది. అర్హత లేని వ్యక్తిని ఆస్పత్రిలో ఏర్పాటు చేసి వైద్యం చేయిస్తూ ప్రజల ప్రాణాలతో చెలగాటమాడుతుంది. జిల్లా వైద్యాధికారి కార్యాలయానికి కేవలం 10 కిలోమీటర్ల దూరంలోనే ఈ సంఘటన చోటు చేసుకోవడం అధికారుల నిర్లక్ష్యానికి నిదర్శనంగా మారింది. గ్రామస్తులు తెలిపిన వివరాలు.. ఊట్కూరు మండల కేంద్రంలోని ప్రభుత్వ ప్రాథమిక ఆరోగ్య కేంద్రంలో వైద్యరాలిగా సంతోషిని ప్రభుత్వం నియమించింది. మొదటి నుంచి విధుల పట్ల నిర్లక్ష్యంగా వ్యవహరిస్తూ పలు ఆరోపణలు ఎదుర్కుంటూ వస్తోంది ఆ మహిళ వైద్యురాలు. పీజీ పరీక్షలకు సన్నద్ధమవుతున్నందున ఆస్పత్రిలో అర్హత లేని వ్యక్తితో వైద్య సేవలు చేయిస్తూ ఆస్పత్రిలోనే చదువుకుంటున్నట్లు తెలిపారు. ఈ నేపథ్యంలో సోమవారం రోజు అత్యధికంగా ఓపీ ఉండటంతో వారంలో ఒక రోజు పగిడిమరి వైద్యురాలిని రప్పించుకుంటున్నట్లు తెలిసింది. ఈ క్రమంలో ఆస్పత్రికి వచ్చే రోగులకు అర్హత లేని ఆ బినామీ వ్యక్తే గర్భిణులు, బాలింతలు, వృద్ధులు, పిల్లలకు వైద్యం చేస్తున్నాడు. ఇంత జరుగుతున్న జిల్లా వైద్యశాఖ అధికారులు పట్టించుకోకపోవడం తీవ్ర విమర్శలకు తావిస్తోంది. సదరు బినామీ డాక్టర్‌ అక్కడే విధులు నిర్వహిస్తున్న ఏఎన్‌ఎం కుమారుడు, కర్ణాటకలో బీఏఎంఎస్‌ చేస్తున్నట్లు సమాచారం. ఇలా బినామీ వైద్యుల చేతిలో రోగుల ప్రాణాలు పణంగా పెట్టిన వైద్యురాలిపై చర్యలు తీసుకోవాలని ప్రజలు కోరుతున్నారు.
సొంత ఆస్పత్రికి రెఫర్‌..
అదే విధంగా జిల్లాలో మరో వైద్యురాలు తమ కుటుంబ సభ్యులకు చెందిన ప్రైవేటు ఆస్పత్రికి రోగులు, గర్భిణులను పంపాలని ఒత్తిడి చేస్తున్నట్లు ఆరోపణలు వినిపిస్తున్నాయి. మక్తల్‌ పట్టణంలోని పల్లె దవాఖానాలో ఇటీవల నియమితులైన వైద్యురాలు శ్రీచందన కుటుంబ సభ్యులకు ఓ ప్రైవేట్‌ ఆస్పత్రి ఉంది. అయితే వైద్యం కోసం వచ్చే వారికి మెరుగైన చికిత్సలు అవసరమైతే దగ్గరలోని సీహెచ్‌సీకి పంపాలి. కానీ వారిని కుటుంబ సభ్యుల ఆస్పత్రికి వెళ్లాలని సూచిస్తున్నట్లు ఆరోపణలు ఉన్నాయి. అదే విధంగా ప్రసవాలకు సైతం ప్రభుత్వ ఆస్పత్రికి కాకుండా సొంతంగా ఉన్న ప్రైవేటు దవాఖానాకు పంపించాలని వైద్య సిబ్బందికి సూచించినట్లు తెలుస్తోంది. వీటిపై జిల్లా వైద్య ఆరోగ్య శాఖ అధికారులు దృష్టి సారించాల్సిన అవసరం ఎంతైనా ఉంది. ఇదిలా ఉండగా ఈ వైద్యురాలి తల్లి గతంలో జిల్లాలో వైద్యశాఖ ఉన్నత అధికారిగా పనిచేయడం కొస మెరుపు.
ప్రభుత్వ ఆస్పత్రి.. బినామీ వైద్యుడు!
