వార్డుల రిజర్వేషన్లు తారుమారు

వార్డుల రిజర్వేషన్లు తారుమారు

● బీసీలు అధికంగా ఉన్న చోట ఎస్టీకి కేటాయింపు

● ఎస్టీలు ఉన్న చోట అన్‌రిజర్వుడ్‌

● న్యాయం చేయాలంటూ

గ్రామస్తుల వినతి

గండేడ్‌: ఆ గ్రామ పంచాయతీలో బీసీ జనాభా సంఖ్యనే ఎక్కువగా ఉంది. అయినా పంచాయతీ ఎన్నికల్లో ఒక్క వార్డుకు కూడా బీసీ రిజర్వేషన్‌ రాలేదు. దీంతో తమకు న్యాయం చేయాలని బీసీ అభ్యర్థులు ఎంపీడీఓకు ఫిర్యాదు చేశారు. వివరాల్లోకి వెళ్తే.. గండేడ్‌ మండల పరిధిలోని చెన్నాయిపల్లి తండా గ్రామ పంచాయతీ ఉంది. దీని పరిధిలో చెన్నాయిపల్లి, పూలపల్లి కూడా వస్తాయి. తొమ్మిది వందలకు పైగా జనాభా ఉండగా 649 మంది ఓటర్లు ఉన్నారు. ఎనిమిది వార్డులు ఉండగా 1, 2, 3 వార్డులో 220 మంది బీసీ ఓటర్లు, 4వ వార్డులో ఎస్సీలు, 5, 6, 7, 8 వార్డుల్లో ఎస్టీలు అధికంగా ఉన్నారు. అయితే 1, 2, 3, 4 వార్డుల్లో ఎస్టీ రిజర్వేషన్‌ ఇవ్వగా 5, 6, 7, 8 వార్డులు జనరల్‌కు కేటాయించారు. ఈ నేపథ్యంలో శుక్రవారం నామినేషన్‌ వేయడానికి వెళ్లిన బీసీ అభ్యర్థులు రిజర్వేషన్‌ స్థానాలు చూసి ఖంగుతిన్నారు. తాము ఎక్కువ సంఖ్యలో ఉన్నా ఒక్క వార్డు కూడా బీసీకి కేటాయించకపోవడం ఏంటని, న్యాయం చేయాలంటూ ఎంపీడీఓ మంజులకు వినతిపత్రం అందజేశారు. ఈ విషయపై ఎంపీడీఓ మంజులను వివరణ కోరగా రొటేషన్‌ పద్ధతిలో రిజర్వేషన్లు ఖరారైనట్లు తెలిపారు. అన్‌ రిజర్వుడ్‌ కోటాలో బీసీలు, ఎస్టీలు కూడా నామినేషన్‌ వేయవచ్చని పేర్కొన్నారు.