ట్రెజరీ ద్వారా పెన్షన్లు చెల్లించాలి

ట్రెజరీ ద్వారా పెన్షన్లు చెల్లించాలి

ఆంధ్రప్రదేశ్‌ జిల్లా గ్రంథాలయ సంస్థల పెన్షనర్ల సంఘం డిమాండ్‌

గాంధీనగర్‌(విజయవాడసెంట్రల్‌): జిల్లా గ్రంథా లయ సంస్థల పెన్షనర్లకు ట్రెజరీ ద్వారా (010 పద్దు కింద) పెన్షన్లు చెల్లించాలని ఆంధ్రప్రదేశ్‌ జిల్లా గ్రంథాలయ సంస్థల పెన్షనర్ల సంఘం రాష్ట్ర అధ్యక్ష, ప్రధాన కార్యదర్శులు కోన దేవదాసు, వల్లూరు వెంకట రమణ ప్రభుత్వాన్ని డిమాండ్‌ చేశారు. గ్రాంట్‌ ఇన్‌ ఎయిడ్‌ తీసుకొని గురుకుల పాఠశాలలతో పాటు స్థానిక సంస్థల పెన్షనర్లకు ట్రెజరీ ద్వారా పెన్షన్లు పొందుతుతున్నారని, అదేవిధంగా గ్రంథాలయ సంస్థ పెన్షనర్లకు కూడా వర్తింపచేయాలన్నారు. దీనివలన ప్రభుత్వానికి అదనపు భారం ఉండబోదని స్పష్టం చేశారు. శుక్రవారం విజయవాడలోని ఏపీ ఎన్జీవో హోం నందు రాష్ట్ర జిల్లా గ్రంథాలయ సంస్థల పెన్షనర్ల సంఘం రాష్ట్ర కార్యవర్గ సమావేశం జరిగింది. సమావేశంలో పాల్గొన్న వారు మాట్లాడుతూ పెన్షనర్ల గ్రాట్యూటి రూ. 12 లక్షల నుండి రూ. 16 లక్షలు పెంచారని, దీనిని 2018 జూలై 01కి 2020 డిసెంబర్‌ లోపు రిటైర్‌ అయిన ఉద్యోగులకు వర్తింప చేయాలని డిమాండ్‌ చేశారు. ఉద్యోగి రిటైర్‌ అయిన తర్వాత రోజే జీపీఎఫ్‌ నిల్వ సొమ్మును, ఎర్న్‌ లీవ్‌ వేతన సొమ్మును చెల్లించేందుకు చర్యలు చేపట్టాలన్నారు. పెన్షనర్లకు క్వాంటమ్‌ ఆఫ్‌ పెన్షన్‌ సకాలంలో మంజూరు చేయించేందుకు చర్యలు తీసుకోవాలన్నారు. మరణించిన సిబ్బంది వారసులకు కూడా గ్రూప్‌ ఇన్సూరెన్స్‌ సొమ్ము చెల్లించే ఏర్పాటు చేయాలని డిమాండ్‌ చేశారు.

నూతన అధ్యక్షుడిగా కళ్లేపల్లి మధుసూదనరాజు

సంఘం కార్యవర్గ సమావేశంలో నూతన కార్యవర్గాన్ని ఎన్నుకున్నారు. ఆంధ్రప్రదేశ్‌ జిల్లా గ్రంథాలయ సంస్థల పెన్షనర్ల సంఘం రాష్ట్ర అధ్యక్షుడుగా కళ్లేపల్లి మధుసూదనరాజు, ప్రధాన కార్యదర్శిగా వల్లూరి వెంకట రమణ, కోశాధికారిగా పి.వెంకటేశ్వరరావు, కన్వీనర్‌గా కోన దేవదాసు ఎన్నికయ్యారు. నూతన కార్యవర్గాన్ని ఏపీ ఎన్జీవో సంఘ రాష్ట్ర అధ్యక్షుడు ఎ. విద్యాసాగర్‌ అభినందించారు.

యువకుడి హత్య

చిల్లకల్లు (జగ్గయ్యపేట): పాతకక్షలు, గంజాయి వివాదం నేపథ్యంలో ఎన్టీఆర్‌ జిల్లా జగ్గయ్యపేట మండలం చిల్లకల్లు సమీపంలో గురువారం రాత్రి ఒక యువకుడి హత్య జరిగింది. అలవాల నవీన్‌రెడ్డి (29)ని అతడి స్నేహితుడు పిల్లా సాయి హత్య చేశాడు. వీరిద్దరూ విజయవాడకు చెందినవారు. ఈ ప్రాంతంలో గంజాయి అమ్మకాలు కూడా జరుగుతున్నట్లు తెలిసింది. ఈ హత్యపై పోలీసులు కేసు నమోదు చేసి దర్యాప్తు చేస్తున్నారు.