పోస్టులు ఖాళీ.. పని భారీ

పోస్టులు ఖాళీ.. పని భారీ

రాయవరం మండలం కురకాళ్లపల్లిలో రెండు అంగన్‌వాడీ కేంద్రాలున్నాయి. ఒక కేంద్రంలో వర్కర్‌, హెల్పర్‌ కూడా లేరు. మరో కేంద్రంలో హెల్పర్‌ లేరు. వీటిని ఓ అంగన్‌వాడీ కార్యకర్త నిర్వహిస్తోంది. ఆ రెండింటినీ ఆమె ఒక్కరే ఎలా సమర్థవంతంగా నిర్వహించగలరన్నది ప్రశ్నార్థకం. జిల్లాలో మరిన్ని అంగన్‌వాడీ కేంద్రాల్లో ఇదే పరిస్థితి ఉంది.

రాయవరం: ప్రతి అంగన్‌వాడీ కేంద్రానికి ఒక టీచర్‌, ఒక ఆయా ఉండాలి. టీచర్‌ ప్రతి రోజు చిన్నారులకు ఆటపాటలతో కూడిన విద్యను అందించాలి. అదే సమయంలో చిన్నారులకు పౌష్టికాహారంగా గుడ్డు, పాలు, ఆకుకూరలతో కూడిన భోజనం అందిస్తారు. అలాగే గర్భిణులు, బాలింతలకు టేక్‌ హోమ్‌ రేషన్‌ (టీహెచ్‌ఆర్‌) రెండు విడతల్లో పౌష్టికాహారం అందజేస్తారు. అంగన్‌వాడీ కేంద్రాల్లో అవసరమైన సిబ్బంది లేకపోవడంతో ఈ కార్యక్రమాలేవీ సక్రమంగా జరగడం లేదు.

జిల్లాలోని అంగన్‌వాడీ కేంద్రాల్లో చాలా పోస్టులు ఖాళీగా ఉన్నాయి. టీచర్‌, ఆయా పోస్టులను భర్తీ చేయకపోవడంతో ప్రభుత్వం ఆయా కేంద్రాల పరిధిలోని బాలింతలు, గర్భిణులు, పిల్లలు ఇబ్బంది పడుతున్నారు. టీచర్‌ పోస్టులు ఖాళీగా ఉన్న కేంద్రాల నిర్వహణ బాధ్యతను పక్క కేంద్రాల వారికి అప్పగించడంతో వారిపై అదనపు భారం పడుతోంది. దీంతో కేంద్రాలు సమస్యలకు నిలయాలుగా మారుతున్నాయనే విమర్శలు వస్తున్నాయి.

ఏటా కోట్లాది రూపాయలు

చిన్నారులకు, గర్భిణులు, బాలింతలకు అంగన్‌వాడీల ద్వారా పోషకాహారం, టీకాలు అందించేందుకు కేంద్ర, రాష్ట్ర ప్రభుత్వాలు ఏటా కోట్లాది రూపాయలు కేటాయిస్తున్నాయి. వివిధ సామగ్రి అందిస్తున్నాయి. చాలా కేంద్రాల్లో టీచర్‌, ఆయా పోస్టులు ఏళ్ల తరబడి ఖాళీగా ఉండటంతో చిన్నారులకు, బాలింతలు, గర్భిణులకు పౌష్టికాహారం సక్రమంగా అందడం లేదన్న విమర్శలున్నాయి.

ఎదురుచూస్తున్న నిరుద్యోగులు

ఖాళీగా ఉన్న అంగన్‌వాడీ టీచర్‌, ఆయా పోస్టులను ఎప్పుడు భర్తీ చేస్తారా అని నిరుద్యోగ యువతులు ఎదురు చూస్తున్నారు. వీటికి సంబంధించిన నోటిఫికేషన్‌ ఎప్పుడు విడుదల చేస్తారా అని వారు వేయి కళ్లతో నిరీక్షిస్తున్నారు.

జిల్లాలో పరిస్థితి ఇదీ..

కోనసీమ జిల్లాలో 22 మండలాలున్నాయి. జిల్లా సీ్త్ర, శిశు సంక్షేమ శాఖ పరిధిలో రాజోలు, అమలాపురం, ముమ్మిడివరం, పి.గన్నవరం, కొత్తపేట, మండపేట, రామచంద్రపురం ఐసీడీఎస్‌ ప్రాజెక్టులున్నాయి. వీటి పరిధిలో 1,726 అంగన్‌వాడీ కేంద్రాలు ఉన్నాయి. ఈ కేంద్రాల పరిధిలో 7,725 మంది గర్భిణులు, 5,848 మంది బాలింతలు, ఆరు నెలల లోపు చిన్నారులు 901 మంది, ఆరు నెలల నుంచి మూడేళ్ల లోపు చిన్నారులు 7,017 మంది ఉన్నారు. ఇదిలా ఉంటే జిల్లాలో మొత్తం 18 అంగన్‌వాడీ కార్యకర్తల పోస్టులు ఖాళీలున్నాయి. వీటిలో న్యాయస్థానం పరిధిలో మూడు పోస్టులు ఉండగా, మరో తొమ్మిది పోస్టులు పదోన్నతుల్లో భాగంగా భర్తీ చేయాల్సి ఉంది. ఆరు పోస్టులు క్లియర్‌ వేకెన్సీ ఉన్నాయి. అలాగే, 77 అంగన్‌వాడీ ఆయా పోస్టులు ఖాళీగా ఉన్నాయి. రిటైర్మెంట్‌ వయస్సు 62 సంవత్సరాలుగా ఉండడంతో త్వరలో జరగనున్న ఉద్యోగ విరమణలతో మరిన్ని ఖాళీలు ఏర్పడే అవకాశాలున్నాయి.

ఇబ్బందులివీ..

● పూర్తి స్థాయిలో సిబ్బంది అంగన్‌వాడీ కేంద్రంలో లేకపోవడం వల్ల సమర్థవంతంగా చిన్నారులకు విద్యను అందించలేకపోతున్నారు.

● అలాగే పౌష్టికాహారం అందించడం కష్టసాధ్యంగా మారుతోంది.

● ఆరోగ్యవంతమైన సమాజానికి ఆటంకాలు ఏర్పడుతున్నాయి.

● కార్యకర్తలపై పనిభారం అధికమవుతోంది.

● ప్రీ స్కూల్‌ కార్యక్రమాలపై పూర్తి స్థాయిలో దృష్టి సారించలేకపోతున్నారు.

● సెలవులు పెట్టుకునే అవకాశాలున్నా, ఆ హక్కును సిబ్బంది కోల్పోతున్నారు.

అంగన్‌వాడీ కేంద్రాల్లో సిబ్బంది కొరత

గర్భిణులకు, బాలింతలకు

అందని పోషకాహారం

చిన్నారులకు అందని ప్రాథమిక విద్య

జిల్లాలో 18 టీచర్‌,

77 ఆయా పోస్టులు ఖాళీ

వేరే కేంద్రాల టీచర్లకు అదనపు బాధ్యతలు

పని భారంతో సిబ్బందికి అవస్థలు

రెండు కేంద్రాలకు ఒకే కార్యకర్త

1/1

పోస్టులు ఖాళీ.. పని భారీ