ఉల్లాస్‌ నిరక్షరాస్యత ఖల్లాస్‌!

ఉల్లాస్‌ నిరక్షరాస్యత ఖల్లాస్‌!

విద్యారణ్యపురి: స్వయం సహాయక సంఘాల్లోని నిరక్షరాస్యులైన మహిళలను అక్షరాస్యులుగా తీర్చిదిదేంద్దుకు కేంద్ర, రాష్ట్ర ప్రభుత్వాలు ‘ఉల్లాస్‌’ అనే కార్యక్రమానికి శ్రీకారం చుట్టాయి. ఇందులో భాగంగా ‘అందరికీ చదువు–అందరి బాధ్యత’ అనే నినాదంతో 1,61,613 మంది నిరక్షరాస్యులను గుర్తించారు. స్వయం సహాయక సంఘాల్లోని మహిళలను అక్షరాస్యులుగా మార్చాలనేది ఈ కార్యక్రమ ముఖ్య ఉద్దేఽశం.

అక్షరాస్యత ఇలా..

స్వయం సహాయక సంఘాల్లోని నిరక్షరాస్యులైన మహిళలకు ముఖ్యంగా ఎఫ్‌ఎల్‌ఎన్‌ (ప్రాథమిక అక్షరాస్యత అభ్యసన సామర్థ్యాలు), జీవన నైపుణ్యాలు, అలాగే సమాంతర విద్యను బోధిస్తారు. ఆ తర్వాత అర్హులకు 3, 5 తరగతులు, ఆపైన ఇప్పటికే చదువుకున్న వారికి ఓపెన్‌ స్కూల్‌ ద్వారా టెన్త్‌లో ప్రవేశాలు కల్పించేలా ప్రోత్సహిస్తారు.

టీచర్లకు శిక్షణ

ఉల్లాస్‌ కార్యక్రమం అమలులో భాగంగా ఇప్పటికే ప్రతి జిల్లా నుంచి ముగ్గురు రెగ్యులర్‌ టీచర్లకు హైదరాబాద్‌లో శిక్షణ ఇచ్చారు. ఉమ్మడి వరంగల్‌ జిల్లా నుంచి 18 మంది టీచర్లు శిక్షణ పొందారు. రాష్ట్రస్థాయి అధికారుల ఆదేశానుసారం గురువారం భూపాలపల్లి జిల్లాతోపాటు వరంగల్‌ రంగశాయిపేట ప్రభుత్వ ఉన్నత పాఠశాలలో వయోజన విద్యాశాఖ ఉమ్మడి జిల్లా ప్రాజెక్టు అధికారి రమేశ్‌రెడ్డి, హనుమకొండలోని సుబేదారి ప్రభుత్వ ఉన్నత పాఠశాలలో జిల్లా కమ్యూనిటీ మొబిలైజింగ్‌ కోఆర్డినేటర్‌ బద్దం సుదర్శన్‌రెడ్డి ఉపాధ్యాయులు, మండల రిసోర్స్‌ పర్సన్లకు శిక్షణ ఇచ్చారు. మిగిలిన మూడు జిల్లాల్లో వెసులుబాటును బట్టి శిక్షణ ఇవ్వనున్నారు. ఈనెల 12న మండల స్థాయిలో ఒక టీచర్‌, అలాగే విలేజ్‌ ఆర్గనైజేషన్‌ అసిస్టెంట్లకు శిక్షణ ఇవ్వనున్నారు. ఈనెల 19న గ్రామస్థాయిలో ఎంపిక చేసిన వలంటీర్‌ టీచర్లకు శిక్షణ పొందిన రెగ్యులర్‌ టీచర్లతో శిక్షణ ఇవ్వనున్నారు.

సామాజిక చైతన్య కేంద్రాల ఏర్పాటు

గ్రామాల్లోని పాఠశాలల్లో సామాజిక చైతన్య కేంద్రాలను ఏర్పాటుచేస్తారు. ప్రతి 8 లే దా 10 మందికి ఒక వలంటీర్‌ విద్యాబోధన చేస్తారు. అంతేకాకుండా టీవీ చానల్స్‌, ఉల్లాస్‌ యాప్‌, ఎస్సీఆర్‌టీఈ రూపొందించిన దీక్ష పోర్టల్‌ ద్వారా వయోజనులకు బోధన చేయనున్నారు.

నిరక్షరాస్యులైన అతివలు

అక్షరాస్యత వైపు..

‘స్వయం సహాయక’ సభ్యులందరికీ చదువు

జిల్లాల్లో టీచర్లకు శిక్షణ షురూ

ఉమ్మడి వరంగల్‌ జిల్లాలో

1,61,613మంది నిరక్షరాస్యుల గుర్తింపు

ఉమ్మడి జిల్లాలో నిరక్షరాస్యుల గుర్తింపు

ఉమ్మడి వరంగల్‌ జిల్లాలోని హనుమకొండ, వరంగల్‌, ములుగు, జనగామ, జయశంకర్‌ భూపాలపల్లి, మహబూబాబాద్‌ జిల్లాల్లో ఉన్న స్వయం సహాయక సంఘాల్లోని నిరక్షరాస్యులైన మహిళలను ఇటీవల అధికారులు గుర్తించారు. వీరని అక్షరాస్యులుగా చేయాలని లక్ష్యంగా పెట్టుకుని ఆదిశగా వయోజన విద్య అధికారులు ముందుకు సాగుతున్నారు. వారి ని ఉల్లాస్‌ యాప్‌లో నమోదు చేస్తారు.

ఉల్లాస్‌ ప్రారంభానికి సన్నాహాలు..

స్వయం సహాయక సంఘాల్లోని 15 ఏళ్లపైబడిన నిరక్షరాస్యులను అక్షరాస్యులుగా తీర్చిదిద్దేందుకే ప్రభుత్వాలు ఉల్లాస్‌ (అండర్‌ స్టాండింగ్‌ ఆఫ్‌ లైఫ్‌ లాంగ్‌ లెర్నింగ్‌ ఫర్‌ ఇన్‌ సొసైటీ) కార్యక్రమాన్ని ప్రారంభించనున్నాయి. ఆగస్టు–సెప్టెంబర్‌లో అధికారికంగా ఈ కార్యక్రమాన్ని ప్రారంభించేందుకు అధికారులు సన్నాహాలు చేస్తున్నారు.