ఈ ఏడాది తెలుగు నాట ధనుష్ హవా నడుస్తోంది. రఘువరన్ బీటెక్, అనేకుడులాంటి అనువాద చిత్రాలతో విజయాలు అందుకున్న ధనుష్ ఇప్పుడు ‘మరియన్’గా తెలుగు ప్రేక్షకుల ముందుకు రానున్నారు. భరత్ బాల దర్శకత్వంలో రూపొందిన ఈ చిత్రం తమిళంలో ఘనవిజయం సాధించింది. అదే టైటిల్‌తో ఎస్వీఆర్ మీడియా శోభారాణి తెలుగులోకి విడుదల చేస్తున్నారు. ఎ.ఆర్. రహమాన్ స్వరపరచిన ఈ చిత్రం పాటలను ఈ నెల 29న విడుదల చేయనున్నారు. ఈ సందర్భంగా శోభారాణి విలేకరులతో మాట్లాడుతూ -‘‘మరియన్ అంటే మరణం లేనివాడు అని అర్థం. యముడు కూడా తనను ఏమీ చేయలేడనే మనోనిబ్బరం ఉన్న వ్యక్తి అతను. ఈ పాత్రను ధనుష్ అత్యద్భుతంగా చేశారు. విదేశాల్లో కిడ్నాప్‌కు గురైన ముగ్గురు భారతీయులు, 21 రోజుల తర్వాత కిడ్నాపర్ల చెర నుంచి ఎలా బయటపడ్డారు? అనేది ఈ చిత్రకథ. ఏప్రిల్ మొదటి వారంలో చిత్రాన్ని విడుదల చేస్తాం’’ అని చెప్పారు.
  


 చిత్రం:  రఘువరన్ బి.టెక్.
 తారాగణం: ధనుష్, అమలా పాల్, శరణ్య, సముద్రకణి
 సంగీతం: అనిరుధ్,
 మాటలు: కిశోర్ తిరుమల
 పాటలు: రామజోగయ్యశాస్త్రి,
 నిర్మాత: 'స్రవంతి' రవికిశోర్
 దర్శకత్వం: వేల్‌రాజ్
  
  ఆ మధ్య నాలుగేళ్ళుగా అనువాద చిత్రాలు మన నేరు తెలుగు చిత్రాలకు గట్టి పోటీనిస్తూ వచ్చాయి. పెపైచ్చు, కమలహాసన్, రజనీకాంత్‌లతో పాటు చివరకు యువతరం హీరోలు సూర్య, కార్తి, విశాల్‌లు సైతం నేరు తెలుగు హీరోలకు తక్కువ కాదన్నంతగా క్రేజూ సంపాదించారు. కానీ, చిత్రంగా ఇటీవలే ముగిసిన 2014వ సంవత్సరంలో మాత్రం డబ్బింగ్ చిత్రాల ఆట సాగలేదు. విక్రమ్ 'పూజ' చిన్న సినిమా 'భద్రమ్' లాంటివి మాత్రమే బాక్సాఫీస్ వద్ద హల్‌చల్ చేశాయి. అయితే, ఈ గడ్డుకాలంలో సైతం ఒక ధోరణి విడవకుండా సాగుతోంది. క్రేజున్న తమిళ హీరోల చిత్రాలతో పాటు, కాస్తంత తెలుగువారికి ముఖపరిచయమున్న హీరోలైతే చాలు అక్కడ బాగా ఆడినవి కాస్త అటూ ఇటూగా తెలుగులోకి అనువాదం అవుతున్నాయి. అంతేతప్ప, రీమేక్ బాట పట్టడం లేదు. ముఖ్యంగా, తమిళంలో కాస్తంత రొటీన్‌కు భిన్నమైన కథలు తెరకెక్కినప్పుడు, రిస్కీ రీమేక్ కన్నా ఉన్నంతలో డబ్బింగే శ్రేయస్కరమని కూడా తెలుగు నిర్మాతలు భావిస్తున్నారు. సరిగ్గా ఆ బాటలో వచ్చినదే తాజా 'రఘువరన్ బి.టెక్' చిత్రం.
 
 ఈ సరికొత్త 2015వ సంవత్సరానికి ప్రారంభ సినిమాగా విడుదలైందీ డబ్బింగ్ చిత్రం. తమిళంలో క్రేజున్న హీరో, రజనీకాంత్ అల్లుడూ అయిన ధనుష్ ఈ చిత్ర హీరో. గత ఏడాది తమిళంలో విడుదలై, ఘనవిజయం సాధించిన ‘వేలై ఇల్లా పట్టదారి’ (వి.ఐ.పి - అంటే పట్టభద్రుడైన నిరుద్యోగి అని అర్థం)కి తెలుగు అనువాదం - ఈ 'రఘువరన్ బి.టెక్'. తెలుగునాట ప్రముఖ చిత్ర నిర్మాణ సంస్థగా పేరున్న 'స్రవంతీ మూవీస్' అధినేత రవికిశోర్ స్వయంగా ఈ చిత్రాన్ని తెలుగులో అందించడం విశేషం.  నిజ జీవితానికి కొంతలో కొంతైనా దగ్గరగా ఉండే కథ, కథనంతో సినిమా చేయడానికి మన హీరోలు కమర్షియల్ చట్రం నుంచి బయటకు రావడానికి జంకే నేపథ్యంలో ఈ డబ్బింగ్ సినిమా మన ప్రేక్షకులకు అలాంటి మామూలు జీవిత కథల్లోని మంచి రుచి ఏమిటో చూపిస్తుంది.
 
  కథ ఏమిటంటే...
 
  ఓ మధ్య తరగతి కుటుంబం. అమ్మ (శరణ్య), నాన్న (తమిళ దర్శక - నటుడు సముద్రకణి), అన్న (ధనుష్), తమ్ముడు. సివిల్ ఇంజనీరింగ్ చదివినా, దానికి సంబంధించిన పనే చేస్తానంటూ అన్నయ్య రఘువరన్ ఉద్యోగం లేక తిరుగుతుంటే, తమ్ముడు కార్తీ సాఫ్ట్‌వేర్ ఉద్యోగం చేస్తూ కుటుంబాన్ని ఆదుకుంటూ ఉంటాడు. నిరుద్యోగం వల్ల ఇంట్లో అమ్మా నాన్నలకు కూడా లోకువైన రఘువరన్, తమ పక్కింటి అమ్మాయి (అమలాపాల్)ను ప్రేమిస్తాడు. ఇంతలో ఒక అనుకోని సంఘటన అతని జీవితంలో మార్పు తెస్తుంది. అక్కడికి చిత్ర ప్రథమార్ధం ముగుస్తుంది. ఆ పరిస్థితుల్లో యాదృచ్ఛికంగా చేతికొచ్చిన ఉద్యోగం, మురికివాడ వాసులకు పక్కా ఇళ్ళ నిర్మాణం ప్రాజెక్ట్ హీరోకు జీవితమవుతాయి. ఆ పరిస్థితుల్లో ఆ ప్రాజెక్ట్‌కు అతను ఎదుర్కొన్న ఇబ్బందులేమిటి? వాటిని అతను ఎలా పరిష్కరించాడు, సమాజంలోని తన లాంటి లక్షలాది నిరుద్యోగులకు అతను చూపిన బాట ఏమిటన్నది మిగతా సినిమా.
 
  ఎలా నటించారంటే...
 
  ఫస్టాఫ్ చాలా ఆసక్తికరంగా నడిచే ఈ కథలో రఘువరన్ పాత్ర ధనుష్‌కు సరిగ్గా అతికినట్లు సరిపోయింది. అటు నిరుద్యోగిగా, ఇటు పక్కింటి అమ్మాయికి సైట్ కొట్టే కుర్రాడిగా, అమ్మ ప్రేమ కోసం తపించే అబ్బాయిగా, విలన్‌పై పోరుకు సిద్ధమైన నవతరం ప్రతినిధిగా - రకరకాల ఎమోషన్స్ నిండిన పాత్రను ధనుష్ చక్కగా పోషించారు. అలాగే, సర్వసాధారణమైన మధ్యతరగతి తల్లితండ్రులుగా శరణ్య, సముద్రకణి నటించారు అనడం కంటే, సమాజంలోని మధ్యతరగతి జీవితాన్ని కళ్ళ ముందు నిలబెట్టారని చెప్పాలి. కేవలం లుంగీ, బనియన్‌లోనే సినిమాలో అధికభాగం కనిపించే దర్శకుడు సముద్రకణి తనలో మంచి నటుడున్నాడని నిరూపించారు. కథానాయికగా అమలాపాల్ తన కళ్ళల్లోని మార్మికత నిండిన అమాయకత్వంతో ప్రేక్షకుల్ని మంత్రముగ్ధుల్ని చేశారు. ప్రసిద్ధ తమిళ కమెడియన్ వివేక్ లాంటి ఒకరిద్దరు కాసేపు నవ్వించే ప్రయత్నం చేస్తారు.
 
 టెక్నీషియన్స్ ఎలా చేశారంటే...
  
 తెలుగు హీరో రామ్‌తో తాజా సినిమా చేస్తున్న యువ దర్శకుడు కిశోర్ తిరుమల ఈ చిత్రానికి అందించిన మాటలు బాగున్నాయి. అనిరుధ్ స్వరాల్లో పాటలు ఫరవాలేదు. హీరో హీరోయిన్ల మధ్య రొడ్డకొట్టుడు యుగళగీతాలు, గ్రూప్ డ్యాన్సులు కాకుండా, మాంటేజ్ పాటలతో మెప్పించడం విశేషం. కెమేరా పనితీరు బాగుంది. విలన్‌తో తలపడే సందర్భంలో ధనుష్ పాత్ర గుక్క తిప్పుకోకుండా చెప్పే సుదీర్ఘమైన డైలాగ్, అందుకు కుదిరిన డబ్బింగ్ తెరపై చూశాక సామాన్య ప్రేక్షకులు హాలులో ఈల వేయక మానడు. ఒక మామూలు కాలనీలో ఇల్లు, భవన నిర్మాణం జరిగే ప్రదేశం - ఇలా చాలా పరిమితమైన లొకేషన్స్‌లోనే కథను ఆసక్తికరంగా ముందుకు నడిపారు. దర్శకుడిగా మారిన కెమేరామన్ వేల్ రాజ్ ఫస్టాఫ్‌లోని వాస్తవికతనూ, సెకండాఫ్‌లోని ముందే ఊహించేయగల రొటీన్ కమర్షియల్ అంశాలనూ చక్కగా మిళితం చేశారని చెప్పాలి.
 
  ఎలా ఉందంటే...
  'రఘువరన్...' చూసి బయటకొస్తుంటే, చాలారోజుల తరువాత ఫరవాలేదనిపించే ఒక సినిమా చూశామన్న అనుభూతి ప్రేక్షకుడికి కలుగుతుంది. ముఖ్యంగా ఒక మధ్యతరగతి కుటుంబ జీవితాన్ని వాస్తవానికి వీలైనంత దగ్గరగా చూపించడంలో దర్శకుడు మంచి మార్కులు కొట్టేశారు. ప్రథమార్ధంలో తెరపై చూపించే జీవితంలో చాలామంది మధ్యతరగతి కుటుంబీకులు తమను తాము చూసుకుంటారు. అలాగే, హీరో, హీరోయిన్ల ప్రేమ కూడా అందంగా సాగిపోతుంది. ద్వితీయార్ధానికి వచ్చేసరికి మాత్రం సినిమా కొంత మూస బాటలోనే నడిచింది.
 
 సామాన్యుడైన హీరో తన లాంటి పలువురు నిరుద్యోగ యువకులతో కలసి అపార ధనవంతుడైన ఒక గర్విష్ఠి విలన్‌పై ఎలా విజయం సాధించాడనే రజనీ మార్కు ఫార్ములాలో గడిచిపోతుంది. జరగబోయేదేమిటని ముందే అర్థమైపోతూ, ఫస్టాఫ్‌తో పోలిస్తే సెకండాఫ్ సో సో అనిపించినా, సినిమా మొత్తం పూర్తయ్యేసరికి ప్రేక్షకుడు కొంత తృప్తిగానే బయటకొస్తాడు. అమ్మ సెంటిమెంట్ ఎప్పుడూ బాక్సాఫీస్ వద్ద పారే మంత్రమని మరోసారి అర్థమవుతుంది. ఇటీవల ఆ మాత్రం తృప్తినిస్తున్న సినిమాలైనా రాకపోవడం ఒక రకంగా ఈ ‘రఘువరన్...’కు బాక్సాఫీస్ వద్ద పట్టిన అదృష్టం! ఒకసారి చూడడానికి ఫరవాలేదనిపించడం ఈ పండుగ సెలవుల సీజన్‌లో కలిసొచ్చే అంశం!!
  - రెంటాల జయదేవ


  రజనీకాంత్ అల్లుడు ధనుష్ అని కాకుండా.. హీరోగా తనకంటూ ఓ ప్రత్యేకమైన ఇమేజ్‌ని సొంతం చేసుకున్నారు ధనుష్. తమిళంలో మంచి మాస్ హీరో అనిపించుకోవడంతో పాటు ఉత్తమ నటుడిగా జాతీయ అవార్డు కూడా అందుకున్నారు. ‘రాన్‌జనా’తో హిందీ రంగానికి పరిచయమై, ప్రస్తుతం అక్కడ అమితాబ్ బచ్చన్ కాంబినేషన్‌లో ‘షమితాబ్’ చేస్తున్నారు. ‘3’ చిత్రం తర్వాత  ‘రఘువరన్ బీటెక్’ సినిమా ద్వారా మళ్లీ తెలుగు తెరపై ధనుష్ కనిపించనున్నారు. శ్రీ స్రవంతి మూవీస్ పతాకంపై ‘స్రవంతి’     రవికిశోర్ జనవరి 1న ఈ చిత్రాన్ని విడుదల చేస్తున్నారు. ఈ సందర్భంగా ధనుష్‌తో జరిపిన ప్రత్యేక ఇంటర్వ్యూ...
  
  తమిళంలో మీరు నటించి, నిర్మించిన ‘వేలై ఇల్లా పట్టదారి’ తెలుగులో ‘రఘువరన్ బీటెక్’గా వస్తోంది. ఈ చిత్రం ప్రత్యేకత ఏంటి?
  ఇంజినీరింగ్ చదువుకుని ఉద్యోగాన్వేషణలో ఉండే కుర్రాడి కథ ఇది. ఇంజినీరింగ్ విద్యార్థులు మాత్రమే కాదు.. ప్రతి యువతీ యువకుడూ కనెక్ట్ అయ్యే కథ. మన కళ్లెదుట జరుగుతున్న కథలా ఉంటుంది. అందుకే చేశాను. ‘నీకేదైనా లక్ష్యం ఉంటే.. దాన్ని చేరుకోవడానికి త్రికరణ శుద్ధిగా పని చెయ్’ అని అంతర్లీనంగా చిన్నపాటి సందేశం ఉన్న కథ ఇది.
  
  ఛాయాగ్రాహకుడు వేల్‌రాజ్ దర్శకత్వంలో ఈ చిత్రం చేయడానికి కారణం?
  వేల్‌రాజ్ నాకు మంచి స్నేహితుడు. తమిళపరిశ్రమలో కెమెరామేన్‌గా ఆయనకు మంచి పేరుంది. కానీ, ఆయన దర్శకుడు అవుతాడని నేనెప్పుడూ అనుకోలేదు. సడన్‌గా ఒకరోజు వచ్చి, ఈ కథ చెప్పి, దర్శకత్వం వహిస్తానంటే ఆశ్చర్యపోయాను. చేయగలుగుతాడా? లేదా అని సందేహపడ్డాను కూడా. కానీ, కథ నచ్చడంతో చేశాను. ఆయన ఈ చిత్రాన్ని అద్భుతంగా తెరకెక్కించారు. తమిళంలో ఘనవిజయం సాధించింది కూడా!
  
  మీకు సొంత నిర్మాణ సంస్థ ఉండగా.. స్రవంతి మూవీస్‌కు అనువాద హక్కులు ఇవ్వడానికి  కారణం ఏంటి? పైగా ‘నాయకుడు’ తర్వాత ఈ సంస్థ విడుదల చేస్తున్న అనువాద చిత్రం ఇదేనేమో?
  స్రవంతి మూవీస్ మంచి సంస్థ అని విన్నాను. కానీ, ‘నాయ కుడు’ తర్వాత విడుదల చేస్తున్న అనువాద చిత్రం ఇదేనని తెలియదు. ఇంత విరామం తర్వాత ఈ సంస్థ నుంచి వస్తున్న తమిళ అనువాద చిత్రం నాదే కావడం ఆనందంగా ఉంది. వాస్తవానికి నాకు తెలుగు మార్కెట్ లెక్కలు తెలియదు. అందుకే, నా తమిళ చిత్రాలను తెలుగులో విడుదల చేయాలనే విషయం మీద పెద్దగా దృష్టి పెట్టను. స్రవంతి మూవీస్ వాళ్లు అడగ్గానే ఓకే అన్నాను.
  
  తెలుగులో స్ట్రయిట్ చిత్రం చేసే ఆలోచన ఉందా?
  హిందీ ‘రాన్‌జనా’కి అవకాశం నాకు పెద్ద సవాల్‌లాంటిది. హిందీ భాష మాట్లాడలేను. కనీసం అర్థం కూడా కాదు. కానీ, చేశాను. అలాగే తెలుగులో బ్రహ్మాండమైన కథ కుదిరితే చేస్తాను.
  
  హిందీలో అమితాబ్ బచ్చన్‌తో ‘షమితాబ్’ చేయడం గురించి?
  అమితాబ్‌గారు చాలా అద్భుతమైన వ్యక్తి. ఆయనతో సినిమా చేయడం మంచి అనుభూతినిస్తోంది.  ఒక్క మాటలో ఆయన గురించి చెప్పాలంటే ‘బెస్ట్ కోస్టార్’.
  
  ‘రఘువరన్ బీటెక్’ని రజనీకాంత్‌గారు చూశారా?
  ఆయనకీ కథ చాలా నచ్చింది. ఒకవేళ ఈ కథలో నేను హీరో కాకపోయినా ఆయనకు నచ్చి ఉండేది.
  
  రజనీకాంత్‌లాంటి స్టార్ ఉన్న ఇంట్లో నుంచి వేరే హీరో వస్తే.. ఆయన నీడను దాటుకుని ఇమేజ్ తెచ్చుకోవడం అంత సులువు కాదు.. మీరెలా సాధించారు?
  వాస్తవమే. అదంత సులువు కానే కాదు. సులువు కాకపోయినా సాధించావ్ అని నా దగ్గర వేరేవాళ్లు అన్నప్పుడు నాకు దక్కిన అతి గొప్ప అభినందనగా నేను భావిస్తాను. ఇదంతా నా ఘనత అని నేననుకోవడంలేదు. అంతా దేవుడి ఆశీర్వాదం.
  
  మీరు హీరో మెటీరియల్ అని ఎప్పుడు అనిపించింది?
  ఇప్పటికీ నాకు అనిపించడంలేదు. అసలు నేను హీరో మెటీరియల్ కాదు. ఆ దేవుడి దయ వల్ల ఇప్పటివరకు నా జీవితంలో నేను కలిసినవాళ్లందరూ మంచి వ్యక్తులే. అందుకే నా సినిమా ప్రయాణం ఇంతవరకూ వచ్చింది.
  
  ఇంత బక్కపలచని శరీరంతో అంత పెద్ద మాస్ హీరో అవుతానని ఎప్పుడైనా అనుకున్నారా?
  కలలో కూడా అనుకోలేదు.
  
  కొంచెం బరువు పెరగాలని ఎప్పుడూ అనుకోలేదా.. మీ ఇంట్లో కూడా ఎవరూ చెప్పలేదా?
  బరువు పెరగాలని ఎప్పుడూ అనుకోలేదు. నాకిలా హ్యాపీగా ఉంది. నేనెలా ఉంటే మా ఇంట్లోవాళ్లు అలా ఇష్టపడతారు.
  మా అబ్బాయిలు యాత్ర, లింగ నా సినిమాలు చూస్తారు. అయితే, నా గత రెండు చిత్రాల్లో నా పాత్ర చనిపోతుంది. అలాంటివి చూస్తే, పిల్లలిద్దరూ ఏడుస్తారని ఆ సినిమాలు చూపించలేదు. కానీ, ‘రఘువరన్ బీటెక్’ ఎంటర్‌టైనింగ్‌గా ఉండటంతో పాటు, సినిమా పాజిటివ్‌గా ముగుస్తుంది కాబట్టి, చూపించాం. ఇద్దరూ బాగా ఎంజాయ్ చేశారు.
 - డి.జి. గోల్డీ