మహారాష్ట్రలో రాజకీయాల్లో మరోసారి నాటకీయ పరిణామాలు చోటు చేసుకున్నాయి. ఎన్సీపీ సీనియర్‌ నేత మాణిక్‌రావ్‌ కోకాటే.. క్రీడా శాఖ మంత్రి పదవికి రాజీనామా చేశారు. అసెంబ్లీ వర్షాకాల సమావేశాల్లో సభలోనే ఆన్‌లైన్‌ రమ్మీ ఆడి.. రమ్మీ మినిస్టర్‌గా ఈయన పేరు పొందిన సంగతి తెలిసే ఉంటుంది. ఆ సమయంలో కోకాటేను వ్యవసాయ శాఖ నుంచి తప్పించి క్రీడా శాఖకు మార్చడమూ తీవ్ర చర్చనీయాంశంగా మారింది. అయితే.. మూడు దశాబ్దాల నాటి హౌసింగ్‌ స్కాం కేసులో నాసిక్‌ సెషన్స్‌ కోర్టు బుధవారం మాణిక్‌రావ్‌ కొకాటే(Manikrao Kokate)ను దోషిగా తేల్చి.. శిక్షను ఖరారు చేసింది. దీంతో.. ఆయన ఎమ్మెల్యే సభ్యత్వం, మంత్రి పదవి రద్దయ్యే పరిస్థితులు ఏర్పడ్డాయి. ఈ పరిస్థితుల నడుమ ముందుగానే ఆయన తన మంత్రి పదవికి రాజీనామా చేయాల్సి వచ్చింది. అయితే.. కోకాటే రాజీనామా లేఖ ఇంకా సీఎం పేషీకి చేరలేదు. దీంతో.. ప్రస్తుతానికి ఆయన పోర్ట్‌ఫోలియో లేని మంత్రిగా ఉన్నారు.కేసు ఏంటంటే.. 1995లో హౌజింగ్‌ సొసైటీలకు సంబంధించి ఆర్థిక బలహీన వర్గాల (EWS) కోసం కేటాయించిన 10% కోటాను దుర్వినియోగం చేశారని మాణిక్‌రావ్‌, ఆయన సోదరుడు విజయ్‌పై కేసులు నమోదు అయ్యాయి. ఈ కేసులో.. ఛీటింగ్‌, ఫోర్జరీలకు పాల్పడడ్డారని తేలడంతో ఇద్దరికీ రెండు సంవత్సరాల జైలు శిక్ష పడింది. తీర్పు ఇచ్చిన వెంటనే కోర్టు అరెస్ట్‌ వారెంట్‌ జారీ చేసింది. ప్రజాప్రతినిధుల చట్టం, 1951 సెక్షన్‌ 8 ప్రకారం.. క్రిమినల్‌ కేసుల్లో ప్రజాప్రతినిధులకు(ఎమ్మెల్యే/ఎంపీ) రెండేళ్లు.. అంత కంటే ఎక్కువ శిక్ష పడితే తక్షణమే సభ్యత్వం రద్దు అవుతుంది. ఒకవేళ పైకోర్టులు వాటిపై స్టే విధిస్తే వాళ్లకు ఊరట దక్కుతుంది. దీంతో.. బుధవారం నాడే బాంబే హైకోర్టులో నాసిక్‌ కోర్టు తీర్పును కోకాటే బ్రదర్స్‌​ సవాల్‌ చేశారు. అత్యవసర విచారణను శుక్రవారం జరుపుతామని కోర్టు తేల్చి చెప్పింది. ఈలోపు అనారోగ్యం పేరిట ముంబైలోని లీలావతి కొకాటే చేరడంతో అరెస్ట్‌ తాత్కాలికంగా వాయిదా పడింది. అత్యవసర భేటీ, ఆపై.. కోర్టు తీర్పు నేపథ్యంలో ఎస్పీపీ చీఫ్‌ అజిత్‌ పవార్‌.. సీఎం దేవేంద్ర ఫడ్నవిస్‌తో భేటీ అయ్యారు. శివసేన, బీజేపీ ఒత్తిళ్ల మేరకు కొకాటేను తొలగించాల్సిందేనని ఫడ్నవిస్‌ పవార్‌కు స్పష్టం చేశారు. దీంతో ఎన్సీపీ అత్యవసర సమావేశం నిర్వహించి కీలక నేతలతో అజిత్‌ పవార్‌ చర్చలు జరిపారు. అనంతరం.. కొకాటే తన రాజీనామా ప్రకటన చేశారు. కొకాటే రాజీనామాతో క్రీడా శాఖ బాధ్యతలు ప్రస్తుతం ఉప ముఖ్యమంత్రి అజిత్‌ పవార్‌ వద్దకు వెళ్లింది.మరోవైపు.. ఈ పరిణామంపై కాంగ్రెస్‌, శరద్‌ పవార్‌ ఎన్సీపీ వర్గం భగ్గుమంటోంది. మహారాష్ట్ర మహాయుతి ప్రభుత్వం ద్వంద్వ ప్రమాణాలు పాటిస్తోందని ఆరోపిస్తున్నారు. గతంలో.. రాహుల్‌ గాంధీ, సునీల్‌ కేదార్‌(మహారాష్ట్ర మాజీ మంత్రి) కేసుల్లో తీర్పు వెలువడిన వెంటనే డిస్క్వాలిఫికేషన్‌ జరిగిందని, కోకాటే విషయంలో ఆలస్యం ఎందుకు? అని ప్రశ్నించారు..అటు హస్తినలో.. కొకాడే రాజీనామా వ్యవహారం అటు ఢిల్లీలోనూ హాట్‌ టాపిక్‌గా మారింది. అదే సమయంలో ఎన్సీపీ (అజిత్‌ పవార్‌ వర్గం) నేత ధనంజయ్‌ ముండే ఢిల్లీలో కేంద్ర హోం మంత్రి అమిత్‌ షాను కలవడం చర్చనీయాంశంగా మారింది. అయితే.. తనది రాజకీయ భేటీ కాదని ముండే ఆ తర్వాత మీడియాకు స్పష్టత ఇచ్చారు. ఐదుసార్లు ఎమ్మెల్యే..ఈ ఏడాది జులైలో. అసెంబ్లీలో రమ్మీ ఆడుతూ మాణిక్‌రావ్‌ కోకాటేపై కెమెరా కంటికి చిక్కారు. దీంతో.. రైతుల ఆత్మహత్యలను ప్రధానంగా ప్రస్తావిస్తూ ప్రతిపక్షాలు విమర్శలు గుప్పించాయి. అయితే తాను ఫోన్‌ ఆపరేట్‌ చేస్తుండగా పాపప్‌ నోటిఫికేషన్‌ వచ్చిందని, ఉద్దేశపూర్వకంగా తాను దానిని తెరవలేదని కోకటే వివరణ ఇచ్చుకున్నారు. అయినప్పటికీ ఆయన్ని వ్యవసాయ శాఖ నుంచి తొలగించి.. క్రీడా మంత్రిత్వ శాఖతో పాటు యువజన సంక్షేమ, మైనారిటీ సంక్షేమ శాఖలను కేటాయించింది ఫడ్నవిస్‌ ప్రభుత్వం. సిన్నార్‌ ఎమ్మెల్యే అయిన కోకటే.. ఇప్పటి దాకా ఐదుసార్లు ఎమ్మెల్యేగా గెలుపొందారు. “#जंगली_रमी_पे_आओ_ना_महाराज…!”सत्तेतल्या राष्ट्रवादी गटाला भाजपला विचारल्याशिवाय काहीच करता येत नाही म्हणूनच शेतीचे असंख्य प्रश्न प्रलंबित असताना, राज्यात रोज ८ शेतकरी आत्महत्या करत असताना सुद्धा काही कामच नसल्याने कृषिमंत्र्यांवर रमी खेळण्याची वेळ येत असावी.रस्ता भरकटलेल्या… pic.twitter.com/52jz7eTAtq— Rohit Pawar (@RRPSpeaks) July 20, 2025

ముంబై: మహారాష్ట్రలో అధికార ఎన్‌సీపీ నేత, వ్యవసాయ శాఖ మంత్రి మాణిక్‌రావ్‌ కొకటే మరో వివాదంలో చిక్కుకున్నారు. అసెంబ్లీ సమావేశాల సమయంలో సెల్‌ఫోన్‌లో రమ్మీ ఆడుతూ దొరికిపోయారు. ఇందుకు సంబంధించిన వీడియోను ప్రతిపక్ష ఎన్‌సీపీ(ఎస్‌పీ) ఎమ్మెల్యే రోహిత్‌ పవార్‌ ఎక్స్‌లో పోస్ట్‌ చేయడంతో గందరగోళం మొదలైంది. బీజేపీని సంప్రదించకుండా ఎన్‌సీపీ పక్షం ఏపనీ చేయలేకపోతోంది.దీంతో, పనిలేక ఆ పార్టీ మంత్రులు మొబైల్‌ గేమ్స్‌ ఆడుకుంటున్నారని ఆరోపించారు. అన్నదాతల సమస్యల పరిష్కారంపై అధికార పక్షానికి శ్రద్ధ లేదని కాంగ్రెస్‌ నేత విజయ్‌ వడెట్టివార్‌ మండిపడ్డారు. విమర్శలపై కొకటే స్పందించారు. ‘అసెంబ్లీ సమావేశాల తీరును తెల్సుకునేందుకు నా సెల్‌ఫోన్‌ను తీశా. అయితే, అప్పటికే డౌన్‌లోడ్‌ చేసిన గేమ్‌ సడన్‌గా ఓపెనైంది. దాన్ని క్లోజ్‌ చేశాను.ఇదంతా కేవలం 5, 10 సెకన్లలోనే జరిగిపోయింది. అంతేతప్ప, గేమ్‌ను ఆడటానికి ఓపెన్‌ చేయలేదు’అని వివరణ ఇచ్చుకున్నారు. కాగా, కొకటే ఏప్రిల్‌లోనూ ఓ వివాదంలో చిక్కుకున్నారు. రైతులు ప్రభుత్వ వ్యవసాయ పథకాల ద్వారా అందిన డబ్బును వివాహాలకే ఖర్చు చేస్తున్నారంటూ చేసిన వ్యాఖ్యలు వివాదాస్పదమయ్యాయి. దీంతో, ఆయన క్షమాపణ చెప్పాల్సి వచ్చింది.


 సాక్షి, ముంబై: 16వ లోక్‌సభ ఎన్నికల కురుక్షేత్రం ప్రారంభమైంది. ఈ మహాసంగ్రామంలో అనేక దిగ్గజాలు మరోసారి పోటీకి దిగాయి. రాష్ట్రంలో అత్యధికంగా లోక్‌సభ ఎన్నికల్లో గెలుపొందినవారిని పరిశీలించినట్టయితే మొత్తం ఆరుగురున్నారు. అయితే వీరిలో రాష్ట్రం నుంచి మాణిక్‌రావ్‌గావిత్ కూడా ఉండడం విశేషం. కాంగ్రెస్ నాయకుడైన మాణిక్‌రావ్ గావిత్ రాష్ట్రంలో నందుర్బార్ నియోజక వర్గంలో గత 34 ఏళ్లుగా ఎంపీగా కొనసాగుతున్నారు. రాష్ట్రంలో ఇప్పటివరకు ఎంపీ అభ్యర్థులుగా విజయం సాధించినవారి వివరాలను పరిశీలిస్తే. ఇందులో తొమ్మిది, ఎనిమిదిసార్లు విజయం సాధించినవారు ఒక్కొక్కరు కాగా ఏడుసార్లు గెలిచినవారు నలుగురు, ఆరుసార్లు విజయఢంకా మోగించినవారు ఇద్దరు, ఐదు సార్లు విజయం సాధించినవారు 14 మంది ఉన్నారు.
 
  నందుర్బార్ లోక్‌సభ నియోజకవర్గం నుంచి ఇప్పటివరకు మాణిక్‌రావ్‌గావిత్ అత్యధికంగా తొమ్మిదిసార్లు విజయం సాధించారు. 1981లో జరిగిన ఏడో లోక్‌సభ ఎన్నికల నుంచి ఇప్పటివరకు వరుసగా ఆయ న విజయం సాధిస్తూనే ఉన్నారు.  నందుర్బార్ జిల్లా దుడిపాడాలో 1934 అక్టోబరు 29న జన్మిం చిన మాణిక్‌రావ్  1965లో మొట్టమొదటిసారిగా నవపూర్ గ్రామపంచాయితీ వార్డు సభ్యుడిగా ఎన్నికయ్యారు. అనంతరం 1980లో విధానమండలి (ఎంఎల్ సీ)గా ఎన్నిైకైన గావిత్ 1981 నుంచి లోక్‌సభకు పోటీ చేస్తున్నారు.
 
  ఇలా అప్పటినుంచి వరుసగా విజయం సాధిస్తూ రికార్డు సృష్టించారు. ఆయన తర్వాతి స్థానంలో ఎనిమిది సార్లు విజయం సాధించిన కోపర్‌గావ్ లోక్‌సభ నియోజకవర్గం ఎంపీ బాలాసాహెబ్ విఖే పాటిల్ నిలిచారు. ఆయన ఇప్పటి వరకు ఎనిమిది సార్లు విజయం సాధించారు.
 
  ఏడుసార్లు లోక్‌సభ ఎన్నికల్లో గెలుపొందినవారిలో కేంద్ర వ్యవసాయశాఖ మంత్రి శరద్ పవార్, మాజీ స్పీకర్ శివరాజ్ పాటిల్, నాగపూర్ ఎంపీ విలాస్ ముత్తెంవార్, పండరీపూర్ ఎంపీ సందీపాన్ థోరాత్‌లున్నారు.  
 
  పీవీదీ అదే పరంపర
  దివంగత మాజీ ప్రధాని పి.వి.నరసింహారావు ఎనిమిదిసార్లు లోక్‌సభ ఎన్నికల్లో విజయం సాధించారు. అయితే రెండుసార్లు ఆయన మహారాష్ట్ర నుంచి విజయం సాధించారు. రామ్‌టెక్ లోక్‌సభ నియోజకవర్గం నుంచి 1984, 1989.. ఇలా వరుసగా రెండుసార్లు పీవీ గెలుపొందారు.