‘నీకేంట్రా మగమహారాజువి’.... ఇది పాత మాట. ఇవాళ పురుషుడు తనను తాను పురుషుడని తలుచుకుంటేనే చుట్టుముట్టే సవాళ్లతో ఒత్తిడికి లోనవుతున్నాడు. మూర్ఖంగా, మొండిబలంతో ఉండే పురుషునికి రోజులు చెల్లిపోయాయి. ఇవాళ సంఘ మర్యాదలు, చట్టాలు, సామాజిక మార్పులు... పురుషుణ్ణి ఆచి తూచి అడుగేసేలా చేస్తున్నాయి. మొర పెట్టుకునేందుకు మనిషి లేని ఒంటరివాణ్ణి చేస్తున్నాయి. నేటి పురుషుడు ఎదుర్కొంటున్నపది సవాళ్లు... ఆధునిక జీవనవిధానంలో మగవారి కష్టాలు నానాటికీ పెరుగుతున్నాయి. అవి గమనింపుకు రాకుండానే మరుగున పడుతున్నాయి. బయటకు చెప్పుకోలేక, సమస్యలకు పరిష్కారం వెతుక్కోలేక వారు ఇబ్బంది పడుతున్నారు. ప్రభుత్వాలు, సమాజం అన్ని సమూహాలను గుర్తించి, వారి సమస్యలు ఏమిటా అని చూస్తుందిగానీ పురుషుల్ని ఒక సమూహంగా చూసి వారి సమస్యలు ఏమిటా అని చూడటం జరగదు. అందువల్ల పురుషులు సతమతమవుతున్నారు. కొందరు డిప్రెషన్ లోకి వెళ్లి పోయి, ఆత్మహత్యల వరకూ వెళుతున్నారు. నేటి పురుషుడి ఎదుర్కొనే 10 సవాళ్లు ఏమిటి?⇒ ఉద్యోగం పురుష లక్షణంఇది పురుషుణ్ణి వదలని, వెంటాడే లక్షణం. చదువు పూర్తి కాగానే ఉద్యోగం దొరక్క పోతే ఇంటా బయటా మగవారికి అవమానాలు తప్పడం లేదు. ఇప్పటి తల్లిదండ్రులు ఇన్‌టర్న్‌గా చేస్తూనే లక్షకు పైగా జీతం సంపాదించాలని కూడా అంటున్నారు. ఇది ఎంత ఒత్తిడి! ఆసక్తుల కోసం విరామం తీసుకున్నా, సొంతగా ఏదైనా చేయాలన్నా ప్రోత్సహించక ‘ఉద్యోగంలో పడితే’ అనే ధోరణి మగాణ్ణి వెంటాడుతూ ఉంది. దాంతో అతను ఉద్యోగం నిలబెట్టుకోవడం కోసం కూడా ఎన్నో అవమానాలు ఎదుర్కొనాల్సి వస్తోంది. ఎప్పటికప్పుడు వచ్చే మార్పులు కత్తిమీద సాములా ఉన్నా కుటుంబం, సమాజం ‘సర్దుకుని చేస్తూ ఉండు’ అనడం మగాడికి ఎప్పటికీ ఒక సవాలు.⇒ పెళ్లెప్పుడు?పెళ్లి చేసుకోకుండా ఉండే ఆప్షన్‌ ఈ సమాజంలో స్త్రీ, పురుషులకు ఇంకా పూర్తిగా రాలేదు. స్త్రీలకు పెళ్లి కాలేదంటే ఏవైనా ఆర్థికపరమైన సమస్యలు ఉన్నాయనుకుంటారుగానీ పురుషుడు పెళ్లి చేసుకోక పోతే ‘ఏదో లోపం ఉంది’ అనే ప్రచారం ఎదుర్కొనాలి. తల్లిదండ్రులు పెళ్లి కాని అబ్బాయిలను చూసి తీవ్ర ఆందోళనలో ఉంటున్నారు. అబ్బాయి పెళ్లి గురించి ప్రశ్నలు అడగని పౌర మర్యాద ఒక్కటే ఈ పరిస్థితి నుంచి పురుషుణ్ణి బయట పడేయగలదు.⇒ విఫల ప్రేమమగవారి మెదళ్లలో ఈ కెమికల్‌ రియాక్షన్‌ గురించి ఆది నుంచి ఎన్నో కథలు, గాథలు ఉన్నాయి. జూలియట్, మజ్నూ, దేవదాసు... ఈ విఫల ప్రేమికుల మానసిక ధోరణి మగవారికి నేటికీ ఉంది. ఒక వేళ ప్రేమలో వంచింపబడితే తమను తాము తిరిగి నిలబెట్టుకోవడం వారికి నరకంగా మారుతోంది. ఇలాంటివి మామూలే అని చెప్పక సాహిత్యం, సినిమాలు విఫల ప్రేమికుల ఆరాధనను మరింత పెంచుతున్నాయ్‌. ఇందువల్ల కొందరు ఆత్మహత్యలకు, కొందరు హింసాత్మక ఘటనలకు పాల్పడుతుంటే, మరికొందరు దురలవాట్లకు బానిసలుగా మారుతున్నారు.⇒ కెరీర్‌లో పరుగులుఅదే ఉద్యోగంలో రిటైర్‌ అయితే మగవాణ్ణి ఇంట్లో కూడా గౌరవించడం లేదు. ఉద్యోగం రావడంతో పని అయి పోదు. ఆ ఉద్యోగంలో ఉన్నతి సాధించాలి. అప్పుడే కెరీర్‌ ముందుకు సాగుతున్నట్లు లెక్క. ఈ లెక్కల్లో మగవారికి పరుగులు తప్పటం లేదు. కాస్తంత దారితప్పినా తోటివారు వీరిని దాటేస్తున్నారు. భయం ఆవరిస్తుంది. నిరాశ చుట్టుముడుతుంది. దీంతో తీవ్ర ఒత్తిడికి గురవుతున్నారు.⇒ ఇంటి బాధ్యతలుకొడుకంటే ఇంటికి వారసుడని, అన్ని బాధ్యతలూ చూసుకోవాలనుకునే సంస్కృతి మనది. తోబుట్టువుల చదువులు, పెళ్లిళ్లు, వారి మంచీచెడూ, బంధువులతో సత్సంబంధాలు, సమాజంలో కుటుంబానికి గౌరవం తెచ్చే వ్యవహారాలు... అన్నీ కలిపి మగవారిపై భారాన్ని పెంచుతున్నాయి. ఎన్ని చేసినా ఇంకా మరేదో చేయాలన్న మాట వస్తుండటం వారిని కలవరపెడుతుంది. దీంతో వారు మానసికంగా కుంగి పోతున్నారు.⇒ వయసు మీరాక పెళ్లి చాలామంది కెరీర్‌లో స్థిరపడి, సొంత ఇల్లు, కారు సమకూర్చుకున్నాకే పెళ్లి చేసుకోవాలన్న ఆలోచనతో ఉంటున్నారు. దాంతో వారి వయసు ముప్పై దాటేస్తుంది. ఆలస్యంగా పెళ్లి చేసుకోవడం కూడా మగవారిపై తీవ్ర ఒత్తిడిని పెంచుతోంది. ఊడుతున్న జుట్టు, ముదురుతున్న వయసు వారిని మరింత కంగారు పెడుతున్నాయి. దీంతో పెళ్లి మీదే కొందరు విరక్తి చెందుతున్నారు. ⇒ ఆలస్యంగా పిల్లల బాధ్యతలుఇటీవల కాలంలో ఆలస్యంగా పిల్లలు కలగడం కూడా మగవారిని మానసిక ఇబ్బందులకు గురిచేస్తోంది. బిడ్డ పుట్టడం వారికి సంతోషకరమైన విషయమే అయినా, ఆ తర్వాత జరిగే పరిణామాలు, పని ఒత్తిడి వారిని ఒంటరిని చేస్తున్నాయి. ఖర్చులు పెరగడం, ఇంట్లో పని పెరగడం, నిద్ర తగ్గడం, అందరికీ అన్నీ సమకూర్చడంతోనే అతను అలసి పోతున్నాడు. ఈ క్రమంలో కొందరు డిప్రెషన్ కి లోనవుతున్నారు. ⇒ వివాహబంధంలో సమస్యలుజీవిత భాగస్వామితో సమస్యలు మగవారిని వేధిస్తున్న మరో సమస్య. ఇద్దరూ ఉద్యోగులైన చోట ఈ ఇబ్బంది మరింత తీవ్రమవుతోంది. ఉన్న కొద్దిపాటి సమయాన్ని తమ బంధం కోసం ఎలా వెచ్చించాలో తెలియక మగవారు సతమతమవుతున్నారు. అటు ఆఫీసు పని, ఇటు ఇంటి బాధ్యతలతో తలమునకలవుతున్నారు. దీంతో భార్యతో గొడవలు వస్తున్నాయి. ఈ క్రమంలో సమస్యను వారి కోణం నుంచి పరిశీలించేవారు కరువయ్యారు. ⇒ శారీరక సమస్యలుఒకప్పుడు 50 దాటాక బీపీ, షుగర్‌ వంటి ఆరోగ్య సమస్యలు చుట్టుముట్టేవి. ప్రస్తుతం 30 దాటుతూనే ఈ సమస్యలు వేధిస్తున్నాయి. వేళాపాళా లేని తిండి, నిద్రలేమి, హడావిడి, టెన్షన్‌ తదితర కారణాలతో శారీరక సమస్యలు తెచ్చుకుంటున్నారు. 50కి ముందే తీవ్రమైన ఆరోగ్య సమస్యల బారిన పడుతున్నారు. సమస్యలు వేధిస్తున్నా పని చేయక తప్పని పరిస్థితుల్లో తీవ్రంగా కుంగి పోతున్నారు. ⇒ మానసికంగా ఒంటరితనంనగర జీవనంలో మగవారిని అధికంగా వేధిస్తున్న సమస్య మానసిక ఒంటరితనం. చుట్టూ అందరూ ఉన్నా తమ సమస్యలు ఎవరికి చెప్పుకోవాలో తెలియక అల్లాడుతున్నారు. చెప్తే తనను చిన్నచూపు చూస్తారేమో, తన గురించి చెడు ప్రచారం చేస్తారేమో అన్న భయంతో అన్ని విషయాలు లోపలే దాచుకుంటున్నారు. మానసికంగా ఆందోళనకు గురవుతున్నారు. ఇది వారిలో నిరాశను నింపుతోంది.నవంబర్‌ కాదు మోవంబర్‌!నవంబర్‌ నెలలో మీసాలను పెంచే కార్యక్రమమే... మోవంబర్‌.ఆస్ట్రేలియన్‌ ఇంగ్లీష్‌లో మీసాలకు సంక్షిప్త నామం... మో. దీనికి నవంబర్‌ నెలను జత చేసి ‘మోవంబర్‌’ ను సృష్టించారు. ‘మోవంబర్‌’ సరదా కార్యక్రమేమీ కాదు. దీనికి సామాజిక ప్రయోజనం ఉంది. పురుషుల ఆరోగ్య సమస్యలైన ప్రోస్టేట్‌ క్యాన్సర్‌పై అవగాహన కలిగించడం, పురుషుల ఆత్మహత్యలను నివారించేందుకు అవగాహన కార్యక్రమాలు చేపట్టడం... మొదలైనవి ‘మోవంబర్‌’ లో భాగం.ఆస్ట్రేలియాలోని మెల్‌బోర్న్‌ కేంద్రంగా మోవంబర్‌ ఫౌండేషన్‌ దాతృత్వ కార్యక్రమాలు నిర్వహిస్తోంది.పురుషులు విజయం సాధించడానికే పుడతారు.ఓడి పోవడానికి కాదు. –హెన్రీ డేవిడ్‌ థోరో, కవి, తత్వవేత్తఅతడి హృదయం సముద్రంలాంటిది.అందులో తుఫానులు ఉంటాయి. ఆటు పోట్లు ఉంటాయి.దాని లోతుల్లో ముత్యాలు కూడా ఉంటాయి.– విన్సెంట్‌ వాన్‌ గోహ్, చిత్రకారుడువన్స్‌ అపాన్‌ ఏ టైమ్‌⇒ పురుష పాఠకులను దృష్టిలో పెట్టుకొని లండన్‌ కేంద్రంగా జనవరి 1731లో ‘ది జెంటిల్‌మ్యాన్స్‌’ మ్యాగజైన్‌ మొదలైంది. ‘మ్యాగజైన్‌’ అనే మాటను తొలిసారిగా ఉపయోగించిన పత్రిక ఇది.⇒ స్త్రీ పాత్రలు లేని సినిమాలను ఊహించడం కష్టం. అయితే గతంలోకి వెళితే... కేవలం పురుషులు మాత్రమే నటించిన హాలీవుడ్‌ సినిమాలు ఎన్నో ఉన్నాయి. అలాంటి ఒక సినిమా... 12 యంగ్రీ మెన్‌. ‘లైఫ్‌ ఈజ్‌ ఇన్‌ దెయిర్‌ హ్యాండ్స్,...డెత్‌ ఈజ్‌ ఆన్‌ దెయిర్‌ మైండ్స్‌’ కాప్షన్‌తో 1957లో విడుదలైంది.మ్యాన్‌ ఆఫ్‌ ది వరల్డ్‌గత సంవత్సరం ఫిలిప్పీన్స్‌లో జరిగిన ‘మ్యాన్‌ ఆఫ్‌ ది వరల్డ్‌’ పోటీలో ‘ఉత్తమ జాతీయ కాస్ట్యూమ్‌’ అవార్డ్‌ను అందుకున్న తొలి భారతీయుడిగా వేద్‌ ప్రత్యేకత నిలుపుకున్నాడు. పుణేకు చెందిన వేద్‌ మన జాతీయ పక్షి నెమలిని స్ఫూర్తిగా తీసుకుని కాస్ట్యూమ్‌ డిజైన్‌ చేశాడు. ఇన్‌స్టాగ్రామ్‌లోని అతడి క్యాట్‌వాక్‌ ఫుటేజ్‌ 19 మిలియన్‌లకు పైగా వ్యూస్‌తో వైరల్‌ అయింది.తల్లికి తనయుడిగా... భార్యకు భర్తగా...చెల్లికి అన్నగా... అక్కకు తమ్ముడిగా...బిడ్డకు తండ్రిగా.. కుటుంబానికి గొడుగుగా..చెలిమికి తోడుగా.. స్నేహానికి వారధిగాఅన్నింటా తానే అయి కొవ్వొత్తిలా కరిగి పోతూసమాజానికి వెలుగులా తనను తాను సమర్పించుకునే పురుషోత్తములకు అంతర్జాతీయ పురుషుల దినోత్సవ శుభాకాంక్షలు.

అందచందాలను కాపాడుకోవడంలో పురుషులు ఏమీ తీసిపోవడం లేదు. సౌందర్య సాధనాల ఖర్చులోను, సౌందర్య పరిరక్షణ సేవల కోసం చేసే ఖర్చులోను మహిళలతో పోటీ పడుతున్నారు. పురుషుల సౌందర్య సాధనాల మార్కెట్‌ అంతర్జాతీయంగా వేగంగా విస్తరిస్తోంది. ఎప్పటికప్పుడు మార్కెట్‌ను ముంచెత్తుతున్న కొత్త కొత్త సౌందర్య సాధనాలను కొనుగోలు చేయడంలో పురుషులు ముందంజలో ఉంటున్నారు. అలాగే, అందానికి తగిన అలంకరణ చేసుకోవడంలోను, ఎప్పటికప్పుడు మార్కెట్‌లోకి కొత్తగా వచ్చే ఫ్యాషన్‌ దుస్తులను ధరించడంలోనూ ‘తగ్గేదే లే’ అంటున్నారు. పురుషుల సౌందర్య పోషణాభిలాష, ఫ్యాషన్‌ స్పృహ మార్కెట్‌లో సిరులు కురిపిస్తున్నాయి.అందచందాలను కాపాడుకోవడంలో మహిళలకు కొంత ఎక్కువ శ్రద్ధ ఉండే సంగతి వాస్తవమే అయినా, ఇటీవలి కాలంలో ఈ విషయంలో పురుషులు తామేమీ తీసిపోవడం లేదంటూ నిరూపిస్తున్నారు. నఖ శిఖ పర్యంతం అందంగా కనిపించడానికి తాపత్రయపడుతున్నారు. కేశ సంరక్షణ ఉత్పత్తులకు, చర్మ సంరక్షణ ఉత్పత్తులకు, ఫ్యాషన్‌ దుస్తులకు భారీగా ఖర్చుపెడుతున్నారు. పురుషుల్లో సౌందర్య స్పృహ పెరగడం గమనించిన సౌందర్య ఉత్పత్తుల తయారీ సంస్థలు కొత్త కొత్త ఉత్పత్తులతో ముందుకొస్తున్నాయి. పురుషుల అలంకరణ వస్తువుల తయారీ సంస్థలు, ఫ్యాషన్‌ దుస్తుల తయారీ సంస్థలు కూడా పురుషుల అందచందాలను ఇనుమడింపజేయడానికి ఇతోధికంగా పాటుపడుతున్నాయి. ఇటీవలి కాలంలో పురుషుల్లో పెరిగిన సౌందర్య స్పృహకు మార్కెట్‌ గణాంకాలే అద్దం పడుతున్నాయి.అంతర్జాతీయ గణాంకాల ప్రకారం 2023లో పురుషులు అలంకరణ వస్తువుల కోసం 53.46 బిలియన్‌ డాలర్లు (రూ.4.50 లక్షల కోట్లు) ఖర్చు చేశారు. ఈ ఖర్చు 2032 నాటికి 85.53 బిలియన్‌ డాలర్లకు (రూ.7.20 లక్షల కోట్లు) చేరుకోగలదని అంచనా. చర్మ సంరక్షణ వస్తువుల కోసం 13.56 బిలియన్‌ డాలర్లు (రూ.1.14 లక్షల కోట్లు) ఖర్చు చేశారు. ఈ ఖర్చు 2032 నాటికి 29.61 బిలియన్‌ డాలర్లకు (రూ.2.49 లక్షల కోట్లు) చేరుకోగలదని అంచనా. కేశసంరక్షణ వస్తువుల కోసం 32.90 బిలియన్‌ డాలర్లు (రూ.2.77 లక్షల కోట్లు) ఖర్చు చేశారు. ఈ ఖర్చు 2032 నాటికి 67.20 బిలియన్‌ డాలర్లకు (5.65 లక్షల కోట్లు) చేరుకోగలదని అంచనా. పురుషుల సౌందర్య సాధనాల మార్కెట్‌లో అమెరికా, జర్మనీ, ఇటలీ, ఫ్రాన్స్, బ్రిటన్‌ చాలాకాలంగా ముందంజలో ఉంటున్నాయి. ఈ దేశాల్లో మార్కెట్‌ నిలకడగా వృద్ధి చెందుతోంది. ఇటీవలి కాలంలో ఆసియా–పసిఫిక్‌ దేశాల్లో పురుషుల సౌందర్య ఉత్పత్తుల మార్కెట్‌ శరవేగంగా వృద్ధి చెందుతోంది. చైనా, భారత్, జపాన్, దక్షిణ కొరియా, బ్రెజిల్, దక్షిణాఫ్రికా దేశాలు సౌందర్య ఉత్పత్తుల వినియోగంలో అగ్రరాజ్యాలతో పోటీ పడే స్థాయికి చేరుకుంటున్నాయి.మన దేశంలో పురుషుల అలంకరణ, కేశసంరక్షణ, చర్మసంరక్షణ ఉత్పత్తుల విక్రయాలు 2023లో రూ.17,696 కోట్లుగా నమోదయ్యాయి. ఈ అమ్మకాలు 2032 నాటికి రూ.34,550 కోట్లకు చేరుకోగలవని మార్కెట్‌ వర్గాల అంచనా. భారత్‌లో పురుషుల సౌందర్య సాధనాల మార్కెట్‌లో ఏటా సగటున 7.2 శాతం వృద్ధి నమోదవుతోంది. ఈ వృద్ధి ఎలక్ట్రానిక్స్‌ వస్తువుల మార్కెట్‌ కంటే ఎక్కువగా ఉండటం విశేషం. మన దేశంలో ఎలక్ట్రానిక్స్‌ వస్తువుల మార్కెట్‌ వార్షిక సగటు వృద్ధి 6.8 శాతం వరకు నమోదవుతోంది. రానున్న కాలంలో మన దేశంలో పురుషుల సౌందర్య సాధనాల మార్కెట్‌ వృద్ధి మరింత వేగాన్ని పుంజుకుని, 12.1 శాతానికి చేరుకోగలదని నిపుణులు చెబుతున్నారు.నవతరం కొత్తపోకడలుతర తరానికీ పురుషుల సౌందర్య సాధనాల వినియోగంలోను, ఫ్యాషన్లలోను మార్పులు సర్వసాధారణం. ఇదివరకటి రోజులతో పోల్చుకుంటే, ఇప్పటి నవతరం యువకులు సౌందర్య సాధనాలు, ఫ్యాషన్లలోను మరింత దూకుడు ప్రదర్శిస్తున్నారు. మహిళలకు పోటీగా సామాజిక మాధ్యమాల్లో ఫొటోలు పెడుతున్నారు. ప్రస్తుత కాలంలో మార్కెట్‌ను ప్రభావితం చేస్తున్న నవతరాన్ని ‘జెన్‌ ఆల్ఫా’గా పిలుచుకుంటున్నారు. ఈ శతాబ్ది తొలినాళ్లలో పుట్టిన ఈ యువతరం ‘టిక్‌టాక్‌’ వంటి సామాజిక మాధ్యమాల ద్వారా ‘లుక్‌ మ్యాక్స్‌’ ట్రెండ్‌ ప్రారంభించారు. ఇందులో భాగంగా ఎప్పటికప్పుడు కొత్త కొత్త ముఖాలంకరణలు, వస్త్రాలంకరణలో ఫొటోలు, వీడియోలు పోస్ట్‌ చేస్తున్నారు. ‘టిక్‌టాక్‌’లోనే ‘గెట్‌ రెడీ విత్‌ మీ’ అనే ట్రెండ్‌ కూడా నడుస్తోంది. ఇందులో భాగంగా నవతరం యువకులు చక్కగా ముస్తాబైన ఫొటోలు, వీడియోలు పోస్ట్‌ చేస్తూ, తమకు దీటుగా తయారవగలరా? తమ ఫాలోవర్లకు చాలెంజ్‌ విసురుతున్నారు. ఇదివరకటి కాలంలో పురుషులు వాడే సౌందర్య సాధనాలు చాలా పరిమితంగా ఉండేవి. సబ్బు, పౌడర్, షేవింగ్‌ రేజర్, షేవింగ్‌ క్రీమ్‌ ఉంటే చాలనుకునేవారు. ఆఫ్టర్‌షేవ్‌ లోషన్లు వాడేవాళ్ల సంఖ్య చాలా తక్కువగా ఉండేది. ఇటీవలి యువకులు రకరకాల హెయిర్‌ స్టైల్స్‌ మారుస్తున్నారు. గడ్డం పెంచేవాళ్లు గడ్డాన్ని ఎప్పటికప్పుడు తీరుగా ట్రిమ్‌ చేయించుకోవడం, గడ్డానికి పోషణ అందించడానికి బీయర్డ్‌ వ్యాక్స్‌ పట్టించుకోవడం వంటివి చేస్తున్నారు. ఇదివరకు జుట్టు నెరిసినవాళ్లు మాత్రమే జుట్టుకు రంగు వేసుకునేవాళ్లు. ఇటీవలికాలంలో జుట్టు నెరవకపోయినా, జుట్టుకు రకరకాల రంగులు వేసుకుంటున్నారు. శరీరమంతా నిగనిగలాడుతూ మెరిసిపోయేలా చూసుకునేందుకు పెడిక్యూర్, మ్యానిక్యూర్, వ్యాక్సింగ్, బ్లీచింగ్‌ వంటి సౌందర్యసేవలను పొందడానికి వెనుకాడటం లేదు. పురుషుల సౌందర్య సాధనాల జాబితాలో ఎప్పటికప్పుడు కొత్త కొత్త వస్తువులు వచ్చి చేరుతున్నాయి. హెయిర్‌ జెల్, సన్‌స్క్రీన్‌ లోషన్, ఫేస్‌వాష్‌ క్రీమ్, డియాడరెంట్స్, ఫేస్‌ క్రీమ్, మాయిశ్చరైజర్‌ వంటివి పురుషుల సౌందర్య సాధనాలలో తప్పనిసరి వస్తువులుగా మారుతున్నాయి. ఈ వస్తువులను కూడా ఎంపిక చేసుకోవడంలో ఇప్పటి యువకులు అమిత శ్రద్ధ తీసుకుంటున్నారు. అల్యూమినియం ఫ్రీ డియాడరెంట్, ఆర్గానిక్‌ ఫేస్‌వాష్‌ క్రీమ్, నేచురల్‌ హెయిర్‌ కలర్‌ వంటి వాటిని ఎంపిక చేసుకుంటున్నారు. వీటి ఖరీదు ఎక్కువైనా ఖర్చుకు వెనుకాడటం లేదు. ఫ్యాషన్లపై పెరుగుతున్న శ్రద్ధశరీరాన్ని నిగనిగలాడేలా చూసుకోవడమే కాదు, శరీరానికి తగిన దుస్తులు ధరించడంలోను, వాటికి తగినట్లుగా ఇతర అలంకరణలను ధరించడంలోను ఈ తరం పురుషులు అమిత శ్రద్ధ చూపుతున్నారు. సమయానికి, సందర్భానికి, కాలానికి తగిన ఫ్యాషన్లతో ఆకర్షణీయంగా కనిపించడానికి ప్రయత్నిస్తున్నారు. ప్రపంచవ్యాప్తంగా పురుషుల ఫ్యాషన్‌ దుస్తుల మార్కెట్‌ వ్యాపారం 2023లో 537.31 బిలియన్‌ డాలర్లు (రూ.45.31 లక్షల కోట్లు) నమోదైంది. ఈ వ్యాపారం 2032 నాటికి 988.24 బిలియన్‌ డాలర్లకు (రూ.83.33 లక్షల కోట్లు) చేరుకోగల అవకాశాలు ఉన్నాయని మార్కెట్‌ వర్గాల అంచనా. భారత్‌లో పురుషుల ఫ్యాషన్‌ దుస్తుల మార్కెట్‌ వ్యాపారం 2023లో రూ.2.24 లక్షల కోట్లుగా నమోదైంది. ఈ వ్యాపారం 2028 నాటికి రూ.3.30 లక్షల కోట్లకు చేరుకోగలదని మార్కెట్‌ నిపుణుల అంచనా. దుస్తులు, బెల్టులు, షూస్‌ వంటివి కొనాలంటే దుకాణాలకు వెళ్లేవారు. ఆన్‌లైన్‌ మార్కెట్లు అందుబాటులోకి వచ్చాక చాలామంది ఆన్‌లైన్‌లోనే కొనుగోళ్లు సాగిస్తున్నారు. మన దేశంలో ఫ్యాషన్‌ దుస్తులు, వస్తువుల ఆన్‌లైన్‌ కొనుగోళ్లలో మహిళల కంటే పురుషులే దూకుడు ప్రదర్శిస్తున్నారు. మహిళలతో పోల్చుకుంటే పురుషులు ఆన్‌లైన్‌లో ఫ్యాషన్‌ దుస్తులు, ఇతర వస్తువుల కొనుగోళ్ల కోసం 36 శాతం ఎక్కువగా ఖర్చు చేస్తున్నట్లు అహ్మదాబాద్‌లోని ఇండియన్‌ ఇన్‌స్టిట్యూట్‌ ఆఫ్‌ మేనేజ్‌మెంట్‌ (ఐఐఎం–ఏ) గత ఏడాది చేపట్టిన అధ్యయనంలో తేలింది. ఈ కొనుగోళ్ల కోసం పురుషులు సగటున రూ. 2.484 మేరకు ఖర్చు చేస్తే, మహిళలు సగటున రూ.1,830 మేరకు ఖర్చు చేసినట్లు ఈ అధ్యయనంలో వెల్లడైంది. మరో విశేషం ఏమిటంటే, ఈ కొనుగోళ్లలో మెట్రో నగరాల్లో కంటే, రెండో తరగతి, మూడో తరగతి, నాలుగో తరగతి చిన్న నగరాల్లోని పురుషులే ముందంజలో ఉంటున్నారు. మెట్రో నగరాల్లోని పురుషులు ఫ్యాషన్‌ దుస్తులు, వస్తువుల ఆన్‌లైన్‌ కొనుగోళ్ల కోసం గత ఏడాది సగటున రూ.1,119 ఖర్చు చేస్తే, రెండో తరగతి నగరాల్లో రూ.1,870, మూడో తరగతి నగరాల్లో రూ.1,448, నాలుగో తరగతి నగరాల్లో 2,034 మేరకు ఖర్చు చేసినట్లుగా ఐఐఎం–ఏ అధ్యయనంలో వెల్లడైంది. పురుషుల సౌందర్య చరిత్రపురుషుల సౌందర్య చరిత్ర ఆధునిక యుగం నుంచి ప్రారంభమైందనుకుంటే పొరపాటే! పురాతన నాగరికతల కాలంలోనే పురుషులు తమ సౌందర్యాన్ని కాపాడుకునేందుకు ప్రయత్నించేవారు. ముఖంపైన, శరీరంపైన రోమాలను తొలగించుకోవడానికి, గోళ్లను కత్తిరించుకోవడానికి కంచు వంటి లోహాలతో తయారు చేసిన రేజర్లు, ట్వీజర్లు, కత్తెరలు, సన్నని చురకత్తులు వంటి పరికరాలను ఉపయోగించేవారు. శిరోజాలంకరణ కోసం రకరకాల సుగంధ తైలాలను, లేపనాలను ఉపయోగించేవారు. ముఖానికి, శరీరానికి చందనం వంటి చెట్ల బెరళ్లతో తయారు చేసిన చూర్ణాలను పూసుకునేవారు. ప్రాచీన ఈజిప్షియన్, రోమన్, గ్రీకు నాగరికతల ప్రజలు అలంకరణపై ప్రత్యేక శ్రద్ధ చూపేవారు.పురుషులు కూడా కళ్లకు రకరకాల వర్ణ లేపనాలను ఉపయోగించేవారు. కొందరు మీసాలు, గడ్డాలు ఏపుగా పెంచుకుని, వాటిని తీర్చిదిద్దినట్లుగా కత్తిరించుకునేవారు. మధ్యయుగాల కాలంలో కూడా పురుషులు మీసాలు, గడ్డాలు తీర్చిదిద్దినట్లుగా కత్తిరించుకునే పద్ధతి ఉన్నా, మీసాలు, గడ్డాలు నున్నగా గొరిగించుకునే వారి సంఖ్య బాగా పెరిగింది. ముఖ్యంగా సైన్యంలో పనిచేసే యోధులు, రక్షణ విధులు నిర్వర్తించేవారు ఎక్కువగా మీసాలు, గడ్డాలను పూర్తిగా తొలగించుకునేవారు. అయితే, కళాకారులు, తత్త్వవేత్తలు, మేధావులు వంటి వర్గాల వారు మాత్రం మీసాలు, గడ్డాలు ఏపుగా పెంచుకుని కనిపించేవారు. బారెడు గడ్డం పెంచుకోవడాన్ని మేధావితనానికి చిహ్నంగా భావించేవారు. గడ్డానికి, మేధావితనానికి ఎలాంటి సంబంధం లేదనే సంగతి ఇప్పటి జనాలకు బాగా తెలిసినా, గడ్డాలు పెంచుకోవడం, వాటి పోషణకు నానా జాగ్రత్తలు తీసుకోవడం ఇప్పటికీ ఫ్యాషన్‌ రంగాన్ని ప్రభావితం చేస్తుండటం విశేషం. గడ్డాల విషయానికొస్తే, విక్టోరియన్‌ కాలాన్ని స్వర్ణయుగంగా చెప్పుకోవచ్చు. విక్టోరియన్‌ కాలంలో ఇంగ్లండ్‌లో పురుషులకు గడ్డాల పోటీలు జరిగేవి. అందమైన గడ్డాన్ని పెంచుకునేవాళ్లకు ఖరీదైన బహుమతులు ఇచ్చి ప్రోత్సహించేవారు. గడ్డాలు, మీసాలు పెంచుకోవడం, శరీరానికి రకరకాల లేపనాలు పూసుకోవడం వంటివాటితో పాటు పురుషులు ఎప్పటికప్పుడు కొత్త కొత్త పద్ధతుల్లో దుస్తులు ధరించేవారు. రకరకాల టోపీలు, తలపాగాలు ధరించేవారు. నాగరికతల తొలినాళ్ల నుంచి మధ్యయుగాల చివరికాలం వరకు శరీర అలంకరణల్లోను, దుస్తుల ఫ్యాషన్లలోను మహిళలకు ఏమీ తీసిపోకుండా ఉండేవారు. అయితే, ఇరవయ్యో శతాబ్దం నుంచి ఈ ధోరణి మారింది. ఈ శతాబ్దంలో రెండు ప్రపంచ యుద్ధాలు జరిగాయి. ఆర్థిక మాంద్యం ఏర్పడింది. ఫలితంగా పురుషుల సౌందర్య సాధనాలు కనీస స్థాయికి చేరుకున్నాయి. సమాజంలోని ఉన్నతవర్గాల పురుషులు తప్ప సామాన్యులు ఫ్యాషన్లలో మార్పులను పెద్దగా పట్టించుకునేవారు కాదు. ఇరవయ్యో శతాబ్ది ప్రథమార్ధం అంతా ఇలాగే గడిచింది. సినిమాలు పెరిగి, యుద్ధాలు సద్దుమణిగిన తర్వాత అగ్రరాజ్యాల్లోని ఫ్యాషన్‌ ప్రపంచంలో నెమ్మదిగా మార్పులు మొదలయ్యాయి. పురుషుల దుస్తుల ఫ్యాషన్లలో ఈ మార్పులు ప్రస్ఫుటంగా కనిపించసాగాయి. ఈ శతాబ్ది తొలినాళ్ల నుంచి పురుషుల సౌందర్య పోషణ, ఫ్యాషన్‌ రంగాలు బాగా వేగాన్ని పుంజుకున్నాయి. స్పాలు.. సెలూన్లకు పెరుగుతున్న గిరాకీమహిళలకు ప్రత్యేకంగా బ్యూటీపార్లర్లు చాలాకాలంగా ఉన్నాయి గాని, పురుషుల కోసం హెయిర్‌ సెలూన్లు తప్ప వేరేవేమీ ఉండేవి కాదు. ఇటీవలి కాలంలో పురుషుల కోసం ప్రత్యేకంగా స్పాలు, బ్యూటీ సెలూన్లు పెరుగుతున్నాయి. పెద్దపెద్ద నగరాల్లోనే కాకుండా, చిన్న పట్టణాల్లోనూ వీటికి ఆదరణ పెరుగుతోంది. ‘కోవిడ్‌’ మహమ్మారి తర్వాత పురుషుల స్పా సేవలకు గిరాకీ విపరీతంగా పెరిగింది. ‘స్పాబ్రేక్స్‌’ సర్వే ప్రకారం 2019–23 మధ్య కాలంలో పురుషుల స్పా సేవలకు ప్రపంచవ్యాప్తంగా ఏకంగా 346 శాతం మేరకు గిరాకీ పెరిగింది. పురుషుల సౌందర్య ఉత్పత్తులకు సెలబ్రిటీలు ప్రచారం చేయడం, సెలబ్రిటీలే స్వయంగా సొంత బ్రాండ్స్‌ ప్రారంభించడం వంటి పరిణామాలు కూడా ఈ వ్యాపారంలో అనూహ్యమైన వృద్ధికి కారణమవుతున్నట్లు మార్కెట్‌ నిపుణులు చెబుతున్నారు. మన దేశంలో పురుషుల బ్యూటీ సెలూన్లు, స్పాల వ్యాపారం 2023లో రూ.88,800 కోట్ల మేరకు నమోదైంది. ఈ వ్యాపారం 2032 నాటికి రూ1.86 లక్షల కోట్లకు చేరుకోగలదని మార్కెట్‌ వర్గాల అంచనా. భారత్‌లో పురుషుల స్పా, సెలూన్ల వ్యాపారం కనీసం 7.85 శాతం వార్షిక వృద్ధి సాధించగలదని మార్కెట్‌ నిపుణులు చెబుతున్నారు.

జెంటిల్‌మన్‌ అనగా ఎవరు? కొండను పిండి చేసి ఆ పిండితో వేడివేడి రొట్టెలు తయారుచేసేవారా? సూపర్‌మెన్‌లా గాలిలో ఎగిరి దూకేవాళ్లా? కానే కాదు అంటుంది ప్రముఖ మెన్స్‌ గ్రూమింగ్‌ బ్రాండ్‌ ‘ది మ్యాన్‌ కంపెనీ’. జెంటిల్‌మన్‌ ఎక్కడి నుంచైనా రావచ్చు...దేశాలు, ప్రాంతాలు, వర్గాలు, వర్ణాలు ఏవీ అడ్డుకావు అంటుంది. ‘మెన్స్‌ డే’ను పురస్కరించుకొని ‘తుమి తో హో’ క్యాంపెయిన్‌ మొదలుపెట్టింది. దీనికి సంబంధించి ఆకట్టుకునే వీడియోను ఇంగ్లీష్, హిందీ, తెలుగు, తమిళ్, కన్నడ, గుజరాతీ...భాషల్లో యూట్యూబ్‌లో విడుదల చేసింది. ఇంతకీ జెంటిల్‌మన్‌ ఎవరు? ఎవరైతే నిరాశావాదాన్ని చెంతకు రానివ్వరో, ఎవరైతే నిత్యసంతోషంతో వెన్నెల నవ్వులతో వెలిగిపోతారో, ఎవరైతే మంచిని చెలిమి చేసుకుంటారో, సమాజానికి మంచి చేస్తారో, ఎవరైతే కొండంత ఆత్మవిశ్వాసంతో ఉట్టిపడతారో, కష్టాల్లో ఉన్నవారికి కొండంత అండగా నిలుస్తారో...వారే జెంటిల్‌మన్‌. 2019 ‘మెన్స్‌ డే’ సందర్భంగా వచ్చిన ‘జెంటిల్మన్‌ కైసే కెహ్తే హై’కు ఈ క్యాంపెయిన్‌ కొనసాగింపు. ‘మనం రోజూ ఎంతోమంది జెంటిల్మన్‌లను చూస్తుంటాం. ఎందుకోగానీ వారి జెంటిల్‌నెస్‌ మనకు కనిపించదు. వారి అంతర్, బహిర్‌ సౌందర్యాన్ని కవిత, పాటల్లోకి తీసుకురావాల్సిన అవసరం ఉంది’ అంటుంది మ్యాన్‌ కంపెనీ. అంతే కదా మరీ!  చదవండి: Science Facts: చీమల రక్తం అందుకే ఎర్రగా ఉండదట..!


 ఏం తక్కువైంది ఈ మగమహారాజులకు?!
  ఏం మునిగిందని వీళ్లకో ‘ఇంటర్నేషనల్ మెన్స్‌డే’?!
  జెంట్స్ సీట్లో కూర్చొని, లేడీస్ ఎవరైనా లేవట్లేదా?
  ఆఫీస్‌లో ‘ముద్దారగా నేర్పిస్తాం’ అని చెప్పి...
  ఫిమేల్ స్టాఫ్ వచ్చి మీద మీద పడుతున్నారా?!
  క్యాబ్స్‌లో ప్రయాణిస్తున్న మగవాళ్లపై...
  లేట్ నైట్ అఘాయిత్యాలు జరుగుతున్నాయా?!
  ఆడవాళ్లకు ‘మహిళా దినోత్సవం’ ఉన్నట్లే...
  మగవాళ్లకు ‘మెన్స్‌డే’ ఉండడాన్ని ఎలా అర్థం చేసుకోవాలి?
  దీనిపై మన స్త్రీవాదులు, మానవవాదులు ఏమంటున్నారు?
  ఇదే ఈవారం మన ‘ప్రజాంశం’
 
   నేడు అంతర్జాతీయ పురుషుల దినోత్సవం. 1999లో ట్రినిడాడ్ టొబాగో దేశంలో మొదటిసారి అంతర్జాతీయ పురుషుల దినోత్సవం జరుపుకున్నారు. ప్రస్తుతం ప్రపంచవ్యాప్తంగా అరవై దేశాల్లో ఈ దినోత్సవాన్ని ఘనంగా జరుపుకుంటున్నారు. ఈ సందర్భంగా స్త్రీల హక్కుల కోసం పోరాడుతున్న కొందరు సుప్రసిద్ధ మహిళల అభిప్రాయాలివి.
  
 ఇద్దరూ అభివృద్ధి చేతి పావులే
  
 ప్రకృతిపరంగా ఆడ, మగ తేడాలేమీ ఉండవు. జీవులన్నీ ఒక్కటే. సమాజంలో మనుషులు కృత్రిమంగా సృష్టించిన అంతరాలలో కులం, వర్గం, జాతి, మతం వంటి అణచివేతల్లో జెండర్ కూడా ఒకటి. ఆడ, మగ అనే జెండర్ వ్యత్యాసం కూడా నిర్మాణాత్మకమైనదే. స్త్రీలు, బలహీన పురుషులు బలమైన పురుషాహంకార బాధితులే. ఎక్కువ క్రూరంగా ఉండమని రాజ్యాల్ని, మరింత మగవాడిగా ఉండమని పురుషుల్ని అభివృద్ధి నిర్దేశిస్తుంది. ఆర్థిక వ్యవస్థ, రాజకీయ వ్యవస్థ, ప్రపంచీకరణ, కులస్వామ్యాలన్నీ పురుషస్వామ్య రక్తమాంసాలతో నిర్మిస్తున్నవే. ఈ నిర్మాణాలు స్త్రీలనే కాదు రాజకీయంగా, ఆర్థికంగా, సామాజికంగా బలహీనులైన మగవాళ్లను కూడా నిర్ధేశిస్తున్నాయి.
 ఐక్యరాజ్యసమితి నుంచి రాజకీయ ఎన్‌జీవోల వరకూ స్త్రీల సాధికారం కోసం ఎన్ని ప్రయత్నాలు చేసినా... మహిళలు మానవహక్కులు లేకుండా విధ్వంసమవుతున్నారంటే పితృస్వామ్యంలో నిజాయితీ లేకపోవడం వల్లనే. పురుషుల్లో మార్పు రావాలి. ఇంటి పని, వంట పని, పిల్లల పెంపకంలో మగవారి పాత్ర పెరగాలి. ఆధునిక ఉత్పాదక రంగంలో, వ్యవసాయక రంగంలో, రాజకీయాల్లో మహిళల నాయకత్వాన్ని అంగీకరించాలి. వాళ్ల ప్రాతినిధ్యాన్ని, ప్రవేశాల్ని ప్రోత్సహించాలి. మన దేశంలో 22 నిమిషాలకొక లైంగికదాడి జరుగుతోంది. ఇది మానవ నాగరికతకు సిగ్గుచేటు. కాని... ప్రతి 22 గంటలకూ కనీసం 22 రోజులకు ఒక బాలికను పాఠశాలలో చేర్పించగలిగితే, ఒక మహిళకు ఉపాధి అవకాశాన్ని అందించగలిగితే ఈ దేశంలోనే సమానత్వం సిద్ధిస్తుంది.
  - జూపాక సుభద్ర,  రచయిత్రి
  
  రెండు దినోత్సవాలెందుకు?
  
  ‘మగవాళ్లు’ అనగానే పురుషులందు పుణ్యపురుషులు వేరయా అన్న వేమన గుర్తుకొస్తాడు నాకు. నిజంగానే పురుషులు అనేకరకాలు. నా మటుకు నాకు కొందరిని చూస్తే గౌరవం, కొందరిని తలుచుకుంటేనే అసహ్యం, కొందరిని చూస్తే జాలి, ఇంకా కొందరంటే ఇష్టం. ఏమైనా... ఈ రోజుల్లో పురుషులు కొంత అయోమయంలో ఉన్నారనిపిస్తుంది. వాళ్లకు పాత తరాలవారి కంటే తాము ఉన్నతం (వారి భాషలో ఆదర్శప్రాయం) గా ఉండాలని ఉంటుంది. కానీ తరతరాలుగా నరనరాల్లో జీర్ణించుకుపోయిన పురుషత్వం ఆ ఉదాత్తతను నీరుగార్చేస్తుంటుంది. ఈ రెండింటి మధ్య ఇరుక్కుని నేటి పురుషులు (20 -50 మధ్య వయస్కులు) తికమకపడిపోతున్నారు. తను స్త్రీలను గౌరవంగా, తనతో సమానంగా చూస్తే గౌరవించబడతాడో లేక చులకనకు గురౌతాడో సగటు పురుషుడికి అర్థం కావడం లేదు. మొత్తానికి ఈనాటి స్త్రీలకు తమ వ్యక్తిత్వాల పట్ల, జీవనవిధానం పట్ల, పురుషులతో సంబంధాల పట్ల ఉన్నంత స్పష్టత ఇంకా ఈనాటి పురుషులకు రాలేదు. అంతేనా, పురుషులు అబలలు. (వ్యాకరణం మాట చిన్నయసూరి ఎరుగు) - ఎందుకంటే స్త్రీల కంటే ఎక్కువగా వాళ్లు సమాజానికి భయపడతారు. సంప్రదాయానికి వెరుస్తారు. స్త్రీ పురుష సంబంధాల్లో తెగింపు అన్నది ఎప్పుడైనా మనకు కనిపిస్తే అది స్త్రీ చొరవ తీసుకున్నప్పుడే, స్త్రీ సమాజాన్ని లెక్కచేయనపుడే సాధ్యం. మగవాళ్లకు సంబంధించి ప్రచారంలో ఉన్న సామెత ‘ఏడ్చే మగవాడిని నమ్మకు’ అన్నదాన్ని నేను నమ్మను. మగవాళ్లకు కూడా ఏడ్చే హక్కు ఉంది. దొంగ ఏడుపు అంటారా? అది ఆడవాళ్లు కూడా ఏడవగలరు కనక, కన్నీళ్లలోని నిజాయితీని గుర్తించాలి తప్ప, ఏడ్చింది పురుషుడా, స్త్రీనా అన్నది కాదు.
 
  పురుషుల దినోత్సవం సందర్భంగా తోటి పురుషులకు చిన్న సూచన: స్త్రీలను మీతో సరిసమానంగా చూడడం వల్ల మీ ఔన్నత్యం పెరుగుతుందే తప్ప, తరగదు. స్త్రీపురుషుల మధ్య అధికార సంబంధాల వల్ల స్త్రీలు మాత్రమే కాదు నష్టపోయేది, పురుషులు కూడ ఎంతో జీవితానందాన్ని కోల్పోతున్నారు. ఎందుకంటే అసమ సంబంధాల్లో ఇరుపక్షాలూ బాధే తప్ప ఆనందాన్ని పొందలేవు. ఆ స్పష్టత స్త్రీపురుషులిద్దరిలోనూ వస్తే, ఇక స్త్రీల దినోత్సవాలూ, పురుష దినోత్సవాలూ అని రెండూ వేర్వేరుగా జరుపుకోవలసిన అవసరం ఉండదు.
  - ప్రొఫెసర్ మృణాళిని,
  కేంద్రసాహిత్య అకాడెమీ జనరల్ కౌన్సెల్ సభ్యురాలు
  
  అర్థం చేసుకొనేలా ఎదగాలి
  అంతర్జాతీయ పురుష దినోత్సవం సందర్భంగా వారిలో మానవ త్వం మేలుకోవాల ని కోరుకుంటున్నా ను. మగవాళ్లకు తరతరాలుగా సమాజం ఇచ్చిన అనవసరమైన, అన్యాయమైన అహంకారాన్ని పెంచే అవకాశాలను వాళ్లు ఐచ్ఛికంగా వదులుకుని సమానత్వం వైపుగా అడుగులు వేయడం నేర్చుకోవాలని కోరుకుంటున్నాను.
 
  తమలో పేరుకుపోయిన వివక్షాపూరితమై న ఆలోచనలను, హింసాత్మక ఆచరణను అమానుష వైఖరిని కడిగి వేసుకుని స్త్రీల స్వేచ్ఛా కాంక్షను అర్థం చేసుకునేలా ఎదగాలని కాంక్షిస్తున్నాను. యుద్ధాన్ని వదిలి శాంతిని, ద్వేషాన్ని వదిలి స్నేహాన్ని మనసులో నింపుకుని ప్రపంచాన్ని... శాంతి, సమానత్వం దిశగా అభివృద్ధి చేయడంలో స్త్రీలతోపాటు భాగస్వామ్యం పంచుకోమని విజ్ఞప్తి చేస్తున్నాను. ఇప్పటికే ఈ పనులు చేస్తున్న సంస్కారవంతులైన కొందరు పురుషులకు నా అభినందనలు.
   - ఓల్గా, స్త్రీవాద రచయిత్రి
 Olga
  
  ఆధిపత్యం అడగడం లేదు
  
  అంతర్జాతీయ పురుషుల దినోత్సవం సందర్భంగా పురుషులకు కొన్ని విషయాలు చెప్పదలచుకున్నాను. స్త్రీపురుష వివక్ష మొదట్నించీ ఉన్నది కాదు. ఆదిమ వ్యవస్థలో ఆహారాన్ని కనిపెట్టింది స్త్రీ. కానీ సమాజం పురోగమనంలో మాతృస్వామిక వ్యవస్థ దాటి పితృస్వామిక వ్యవస్థ ఏర్పడింది. అప్పటినుంచి స్త్రీ అణచివేత ప్రారంభమైంది. తర్వాత నాగరిక సమాజంలో స్త్రీ, పురుష సమానత్వం ఒక హక్కుగా రాజ్యాంగం ఇచ్చింది. ఈనాటికీ ఆ సమానత్వాన్ని గుర్తించలేకపోవడం బాధాకరం. స్త్రీలు తమ హక్కుల గురించి మాట్లాడినప్పుడల్లా ఆధిపత్యం కోరుకుంటున్నట్లుగా భావిస్తున్నారు. కాని స్త్రీకి కావాల్సింది పురుషులపై ఆధిపత్యం కాదు, కేవలం సమానత్వం మాత్రమే. సమాజంలో పురుషాధిపత్య భావజాలం భారంగా మారితే పురుషులు కూడా బాధితులవుతారు.
 
  చాలామంది ఒంటరిస్త్రీలు, వితంతువులు... భర్త తోడు లేకుండా కుటుంబాల్ని నెట్టుకొస్తున్నారు. ఎవరి అండా లేకుండానే పిల్లల్ని పెంచి ప్రయోజకుల్ని చేస్తున్నారు. పురుషులు ఆ పని చేయలేకపోతున్నారు, ఎవరో ఒకరిద్దరు తప్ప. స్త్రీ తోడు లేకుండా బతకగలిగే పురుషులెందరు? కనీసం ఈ వాస్తవాైన్నైనా ఎందుకు గుర్తించరు? సమాజంలో హింసలేని జీవితాన్ని మనుషులందరూ కోరుకుంటున్నారు. అది మానవహక్కు కూడా. కాని స్త్రీలు, పిల్లలు హింసలేని జీవితాన్ని తమ హక్కుగా గుర్తించలేకపోతున్నారు. సమాజంలో శాంతియుత కుటుంబాలు కావాలి. అది ఆధిపత్య సంబంధాలు రద్దయినపుడే సాధ్యమవుతాయి. ఆడవాళ్లయినా, మగవాళ్లయినా ఆధిపత్యం కోరుకోకూడదు. బాధ్యతాయుతమైన మానవ సంబంధాలు మాత్రమే ఉండాలి. మానవజాతి మనుగడ కోసం త్యాగాలు చేసిన పురుషులు, స్త్రీలు ఉన్నారు. పురుష వ్యతిరేకత కాకుండా పురుషాధిపత్య భావజాలాన్ని తొలగించినపుడు మిగిలేది స్త్రీ, పురుషులు. ఎక్కువ తక్కువలు కాదు.
  - సంధ్య,
  ప్రగతి శీల మహిళా సంఘం రాష్ట్ర అధ్యక్షురాలు
  Sandhya
  
  
  రెండుముఖాలు వద్దు
  
  అంతర్జాతీయ పురుషుల దినోత్సవం సందర్భంగా మనదేశంలోని పురుషులందరికీ నా అభినందనలు. ఈరోజైనా పురుషులందరూ ఒక ఆత్మపరిశీలన చేసుకోవాలి. ‘మీరూ మేము సగం సగం... మీరూ మేము సమం సమం’ అనే మహిళల మాటతో పురుషులందరూ గొంతు కలపాలని ఊరుకుంటే సరిపోదు, ఆచరించాలి. మన సమాజంలో రెండుముఖాలున్న మగవారి సంఖ్య బాగా ఎక్కువ.  కొందరు మగవాళ్లు  బయటికి స్త్రీవాద కబుర్లు చెప్పి ఇంటికెళ్లి భార్యల్ని హింసిస్తారు. మనసా వాచా మహిళల్ని గౌరవించే మగవారి సంఖ్య చాలా తక్కువ. దీనికి అనాదిగా వస్తున్న పురుష ప్రాధాన్య కట్టుబాట్లే కారణం కాదు, మహిళ తమని మించిపోతోందన్న అభద్రతా భావం కూడా. చదువుల్లో, ఉద్యోగాల్లో, తెలివితేటల్లో మహిళలు రోజురోజుకీ మెరుగవుతున్నారు. కాని మగవారి ఆలోచనలు మాత్రం ఏ కాలంలోనో ఆగిపోయాయి. మహిళల్లో వస్తున్న మార్పుకు తగ్గట్టు మగవారి ఆలోచనతీరు మెరుగవడం లేదు. కొందరిలో మైండ్‌సెట్ మారుతోంది కాని మనసు మారడం లేదు. బిడ్డగా స్త్రీ ఎదుగుదలను కోరుకుంటున్న మగవాళ్లే, భార్యగా ఎదిగితే మాత్రం అడ్డుపడుతున్నారు. మగవారి హృదయం మారడం లేదనడానికి ఇలాంటి ధోరణులే ఉదాహరణలు. వారి అభద్రతాభావం ఏస్థాయికి చేరిందంటే.. స్త్రీల కోసం కొత్త చట్టాలు వచ్చినప్పుడల్లా వాటిని పురుష వ్యతిరేక చట్టంగా భావిస్తున్నారు. అవి కేవలం స్త్రీలను రక్షించడానికి వచ్చిన చట్టాలు కాని పురుషుల్ని వ్యతిరేకించేవి కావు. ఆ మధ్య ఢిల్లీలో నిర్భయ ఘటన సందర్భంగా చాలామంది మగవాళ్లు ‘తాము మగవాళ్లుగా పుట్టినందుకు సిగ్గుపడుతున్నాం’ అంటూ తమ సానుభూతిని వ్యక్తం చేశారు. అలాంటి సందర్భాల్లో పురుషుల నుంచి స్త్రీలు ఆశించేది సానుభూతి కాదు, తిరుగుబాటు. పురుషుడిగా తోటి పురుషులలో మార్పు తేవాలి. దాని కోసం ఎంతటి పోరాటాలైనా చేయాలి. లేదంటే స్త్రీల రక్షణకోసం పోరాడుతున్నవారికి సాయంగానైనా ఉండాలి. దాన్నే సమానత్వం అంటారు. స్త్రీలకు అన్యాయం జరిగితే తోటి స్త్రీలు స్పందించడం, పురుషులకు అన్యాయం జరిగితే పురుషులు స్పందించడం సమానత్వంలోకి రాదు. దేశంలో ఎవరికి అన్యాయం జరిగినా లింగభేదం లేకుండా అంతా అండగా నిలబడాలి. అప్పుడే ఆడ, మగ అనే భేదం పోయి అందరం ఒక్కటేనన్న భావం వస్తుంది.
  - కొండవీటి సత్యవతి,
  కోఆర్డినేటర్ ‘భూమిక’ హెల్ప్‌లైన్
 Kondaveeti Satyavati