మరికల్‌ (నారాయణపేట): మండలంలోని కన్మనూర్‌కు చెందిన అనంతమ్మ (68) ఇంటి గోడ కూలి మరణించింది. మధ్యాహ్నం 12గంటలకు భోజనం చేసిన అనంతరం ఇంటిముందు ఉన్న శిథిలావస్థకు చేరిన గోడ సమీపంలో కూర్చొంది. అకస్మాత్తుగా గోడ కూలడంతో వృద్ధురాలు దుర్మరణం చెందినట్లు కుటుంబసభ్యులు తెలిపారు. మృతురాలికి ఇద్దరు కూతుళ్లు ఉన్నారు. ఈ మేరకు కేసు నమోదు చేసినట్లు ఎస్‌ఐ నాసర్‌ తెలిపారు.   కుడికిళ్లలో..  కొల్లాపూర్‌ రూరల్‌: మండలంలోని కుడికిళ్లకు చెందిన సంకె దేవమ్మ(65) మంగళవారం అర్ధరాత్రి ఇంట్లో నిద్రిస్తుండగా మట్టి మిద్దె కూలి మరణించింది. భారీగా వర్షం కురిసే సమయంలో ఈ ఘటన జరిగినట్లు కుటుంబసభ్యులు తెలిపారు. ఆమెకు ముగ్గురు కుమారులు, ఇద్దరు కూతుళ్లు ఉన్నారు. ఈ విషయం తెలుసుకున్న బీజేపీ జిల్లా అధ్యక్షుడు ఎల్లేని సుధాకర్‌రావు సంఘటనా స్థలానికి వెళ్లి మృతదేహాన్ని పరిశీలించి కుటుంబసభ్యులకు సానుభూతి తెలిపారు. ఈ మేరకు పోలీసులు కేసు నమోదు చేసుకుని మృతదేహాన్ని పోస్టుమార్టం నిమిత్తం ఆస్పత్రికి తరలించారు.   ధన్వాడ: మండలకేంద్రంలోని ఎస్సీ కాలనీకి చెందిన గ్రామ పంచాయతీ పారుశుద్ధ్య కార్మికుడు తిరుమలేష్‌ పెద్ద కుమారుడు గౌతం(3) బుధవారం మట్టి మిద్దె కూలి అక్కడికక్కడే మృతి చెందాడు. స్థానికులు తెలిపిన వివరాలు ఇలా ఉన్నాయి. ఉదయం 11గంటలకు వర్షం తగ్గడంతో పిల్లాడి తల్లి పల్లవి  గౌతంకు అన్నం తినిపించి వంట రూంలోని మంచంపై పడుకోపెట్టి బట్టలు ఉతికేందుకు బయటకు వచ్చింది. 5నిమిషాలకే మిద్దెకూలి భారీ శబ్ధం రావడంతో అక్కడే ఉన్న తిరుమలేష్‌తో పాటు చుట్టు పక్కలవారు వచ్చి మట్టిని తొలగించి చిన్నారిని బయటకు తీశారు. వెంటనే జిల్లాకేంద్రంలోని ఆస్పత్రికి తరలించారు. వైద్యులు చిన్నారిని పరీక్షించి అప్పటికే మరణించినట్లు ధ్రువీకరించడంతో తల్లితండ్రులు కన్నీరుమున్నీరుగా విలపించారు. ఈ విషయం తెలుసుకున్న తహసీల్దార్, పోలీసులు సంఘటనా స్థలానికి చేరుకుని వివరాలు సేకరించారు. గ్రామంలో మట్టి మిద్దెలు ఉన్న వారు జాగ్రత్తగా ఉండాలని చాటింపు వేయించారు.   మూడేళ్లకే నూరేళ్లు నిండాయ్‌.. మంగళవారం రాత్రి మూడోఏట పుట్టినరోజు వేడుకలు జరుపుకున్నాడు. ఉదయం చుట్టుపక్కల పిల్లలతో సరదాగా ఆడుకున్నాడు. ఈ సమయంలో అమ్మచేతి గోరు ముద్దలు తిన్నాడు. నిద్ర వస్తుందనో లేక మృత్యువు పిలిచిందో తెలియదు కాని ఇంట్లోకి వెళ్లాడు. పిల్లాడిని చూసిన అమ్మ దగ్గరికి పిలుచుకుని మంచంపై పడుకోబెట్టి బయటకు పనులు చూసుకునేందుకు వెళ్లింది. బయటకు వెళ్లినా నిమిషాల్లో మట్టి మిద్దె ఉన్నపాటుగా కుప్పకూలింది. ఈ హృదయ విషాదకర ఘటన గ్రామస్తులను కలిచివేసింది.  

తిమ్మాపురం గొంతు మూగబోయింది. మిద్దె పైకప్పు కూలి భార్యా పిల్లలు మృతి చెందడం, యజమాని తీవ్రగాయాలతో ఆస్పత్రిపాలవడం అందరినీ కలచివేస్తోంది. ఎంతో అన్యోన్యంగా సాగుతున్న వారి జీవితం ఇలా అర్ధంతరంగా ముగియడం ప్రతి ఒక్కరినీ కంటతడి పెట్టించింది.   అనంతపురం, కంబదూరు: కంబదూరు మండలం తిమ్మాపురానికి చెందిన వడ్డే సుబ్బరాయుడు, తిమ్మక్క (30) దంపతులు. వీరికి ఇద్దరు పిల్లలు. కుమారుడు రవి (11) ఆరో తరగతి, కుమార్తె మహాలక్ష్మి (8) నాలుగో తరగతి చదువుతున్నారు. దంపతులు కూలి పనులు చేసుకుంటూ పిల్లలను పోషించుకునేవారు. అలా సాఫీగా సాగిపోతున్న సమయంలో మూడు నెలల కిందట ఇంట్లోకి కాకి దూరింది. ఇంటికి అరిష్టం జరిగిందని, ఇక్కడే ఉంటూ తమకూ ఏదో ఒకటి జరుగుతుందనే మూఢనమ్మకంతో సుబ్బరాయుడు కుటుంబం సొంతింటిని వదిలి గ్రామంలోని పాత మిద్దెలో అద్దెకు వెళ్లారు. మంగళవారం రాత్రి కుటుంబ సభ్యులందరూ పాత మిద్దెలో నిద్రిస్తున్నారు. అర్థరాత్రి సమయంలో మిద్దె దూలం విరిగా పడటంతో తిమ్మక్కతో పాటు కుమారుడు రవి, కుమార్తె మహాలక్ష్మి దుర్మరణం చెందారు. సుబ్బరాయుడు తీవ్ర గాయాలతో బయట పడ్డాడు. రెండు రోజుల్లో సొంతింటికి రంగు వేయించి వెళ్లాలనుకున్న సమయంలో ఇలాంటి దుర్ఘటన జరిగింది.  బుధవారం ఉదయం కళ్యాణదుర్గం ఆస్పత్రిలో మృతదేహాలకు పోస్టుమార్టం పూర్తి చేశారు. సాయంత్రం అంత్యక్రియలు జరిగాయి. విషాదఛాయలు మిద్దె కూలి ఒకే ఇంటిలో ముగ్గురు మృతి చెందడంలో తిమ్మాపురంలో విషాద ఛాయలు అలుముకున్నాయి. మృతుల్లో ఇద్దరు చిన్నారులు ఉండడంతో బంధువులు, గ్రామస్తులందరూ ‘అయ్యోపాపం.. అప్పుడే నూరేళ్లు నిండాయా’ అంటూ కన్నీటిపర్యంతమయ్యారు. ఇల్లు మారకుండా ఉండి ఉంటే ప్రాణాలైనా దక్కేవని, మూఢనమ్మకాలు పట్టించుకోకుండా ఇల్లు శుభ్రం చేసుకుని ఉండి ఉంటే బాగుండేదని చర్చించుకున్నారు. ఎమ్మెల్యేపై స్థానికుల ఆగ్రహం మిద్దె కూలి ముగ్గురు మృతి చెందితే ఎమ్మెల్యే ఉన్నం హనుమంతరాయచౌదరి చూసేందుకు కూడా రాకపోతే ఎలా అంటూ స్థానికులు ఆగ్రహించారు. తహసీల్దార్‌ మసూద్‌వలి ఆలస్యంగా సంఘటన స్థలానికి చేరుకోవడంపై కూడా స్థానికులు మండిపడ్డారు.   మూఢ నమ్మకాలతోనే ఇల్లు మార్చాడు కాకి దూరిన ఇంటిలో ఉండటం మంచిది కాదనే మూఢనమ్మకాలతోనే సుబ్బరాయుడు కుటుంబం సొంత ఇంటిని వదలి ఆద్దె ఇంటిలోకి కాపురాన్ని మార్చాడు. గతంలో కూడా గ్రామంలో కొంత మంది ఇళ్లలోకి కాకులు ప్రవేశించాయని, మూడు నెలల పాటు వేరే ఇళ్లలోకి కాపురాలు పెట్టిన సంఘటనలు ఉన్నాయి. ఇలాంటివి పూర్వం నుంచి కొనసాగుతున్నాయి.–హరినాథ్, మాజీ సర్పంచ్‌ ఉద్విఘ్న క్షణాలు మిద్దె పైకప్పు కూలిన సమయంలో తీవ్రంగా గాయపడి అపస్మారకస్థితికి చేరుకున్న సుబ్బరాయుడును అనంతపురంలోని ప్రైవేటు ఆస్పత్రిలో చేర్చారు. బుధవారం ఉదయం కాస్త స్పృహలోకి వచ్చాక రాత్రి జరిగిన ప్రమాదం గుర్తొచ్చింది. భార్యా పిల్లలు ఏమయ్యారో తెలుసుకోవాలనుకున్నాడు. తన వద్ద ఉన్న బంధువులను ఆతృతగా అడిగాడు. వారు బాగున్నారని.. నీవు టెన్షన్‌ పడవద్దని ధైర్యం చెప్పారు. అయినప్పటికీ అతని ధ్యాస కుటుంబ సభ్యులపైనే ఉంది. వారిని చూస్తే కానీ నమ్మే పరిస్థితి లేకపోవడంతో బంధువులపై ఒత్తిడి తెచ్చాడు. అయితే వారు అతడి ఆరోగ్యం దృష్ట్యా అసలు విషయం చెప్పలేదు. ప్రమాదంలో మృతి చెందిన భార్యా, కుమారుడు, కుమార్తెల అంత్యక్రియలకు సాయంత్రం స్వగ్రామంలో ఏర్పాట్లు సిద్ధం చేశారు. గత్యంతరం లేని పరిస్థితుల్లో సుబ్బరాయుడును ఆస్పత్రి నుంచి వాహనంలో తిమ్మాపురం తీసుకొచ్చారు. అప్పటికే జనం అంతా గుమికూడి ఉండటంతో ఏదో జరిగిందని భావించాడు. ఇక చివరికి భార్యా,పిల్లలు చనిపోయిన విషయాన్ని తెలిపారు. అంతే ఒక్కసారిగా సుబ్బరాయుడు భావోద్వేగానికి లోనయ్యాడు. గట్టిగా రోదిస్తుండటంతో కడసారి చూపు చూపించిన అనంతరం అతడిని తిరిగి ఆస్పత్రికి తీసుకెళ్లారు.  

మరో గంటలో నిద్రలేవాల్సిన ఆ చిన్నారి శాశ్వత నిద్రలోకి వెళ్లింది. మూడేళ్లకే మృత్యువు కబళించుకుపోయింది. ఇంటి పైకప్పే ఆ చిన్నారిపాలిట యమపాశమైంది. నిద్రిస్తున్న చిన్నారిపై విరిగి పడడంతో నిద్రలోనే మృతిచెందింది. ఈ సంఘటన ధర్మపురిలో గురువారం జరిగింది. ధర్మపురి: ఉదయం తెల్లవారుతోంది. మరో అరగంటలో అమ్మా అంటూ ఆ చిన్నారి తల్లి ఒడికి చేరేది. ఇంతలోనే ఘోరం జరిగింది. ఇంటి పైకప్పు కూలి ఆ చిన్నారి నిద్రలోనే కన్నుమూసింది. ఈ ఘటన ధర్మపురిలో గురువారం జరిగింది. చిన్నారి మృతితో కుటుంబం విషాదంలో మునిగిపోయింది. కుటుంబ సభ్యుల వివరాల ప్రకారం.. ధర్మపురికి చెందిన చిటన్నోజ్‌ వెంకన్న ఆర్టీసీలో కండక్టర్‌ ఉద్యోగం చేస్తుంటాడు. వచ్చేజీతం తిండి, బట్టకు సరిపోవడంతో ఏళ్లకాలంగా పురాతన ఇంట్లో జీవనం సాగిస్తున్నాడు. ఒకగదిలో వెంకన్న దంపతులు, మరో గదిలో తన కొడుకు లింగస్వామి అతడి భార్య పావని పిల్లలు లోకేష్‌ (5), సాత్విక (3)తో ఉంటున్నారు. రెండేళ్లక్రితం లింగస్వామి ఉపాధినిమిత్తం సింగపూర్‌ వెళ్లాడు. పావని పిల్లలతో అదే గదిలో ఉంటోంది. ఇదీ జరిగింది.. రోజూలాగే బుధవారం రాత్రి పావని పిల్లలతో తన గదిలో నిద్రించింది. గురువారం ఆరు గంటలకు నిద్రలేచి బయటకు వచ్చింది. ఇంతలో భారీ శబ్ధంతో వారుంటున్న గది పైకప్పు కూలింది. పావని లబోదిబోమంటూ స్థానికులను పిలుచుకొచ్చింది. అప్పటికే బెడ్‌పై పడుకున్న సాత్విక, లోకేశ్‌ మట్టిలో కూరుకుపోయారు. ఎలాగోలా ఇద్దరిని బయటకు తీశారు. లోకేశ్‌ దుప్పటి కప్పుకోవడంతో ప్రమాదం తప్పింది. సాత్విక పూర్తిగా మట్టిలో కూరుకుపోవడంతో శ్వాస ఆడలేదు. వెంటనే జగిత్యాలకు తరలించారు. పరిస్థితి విషమంగా ఉండడంతో కరీంనగర్‌ తరలిస్తుండగా మార్గం మధ్య లో మృతిచెందింది. దీంతో చేసేదేమీ లేక సాత్విక మృతదేహాన్ని ఇంటికి తీసుకొచ్చారు. వారం రోజుల్లో తండ్రి ఇంటికి.. సింగాపూర్‌ వెళ్లిన లింగస్వామి మరో వారం రోజుల్లో ఇంటికి వచ్చేవాడు. తండ్రి రాకకోసం పిల్లలు ఎదురుచూస్తున్నారు. ఇంతలోనే సాత్విక ప్రమాదవశాత్తు మృతిచెందింది. విషయం తెలుసుకున్న లింగస్వామి సింగపూర్‌నుంచి బయల్దేరాడు. నేడు స్వగ్రామానికి చేరుకోనున్నాడు. ఆర్‌ఐ రంగారావు  పంచనామా చేశారు. ప్రభుత్వానికి నివేదిస్తామని తెలిపారు. ప్రభుత్వ చీఫ్‌విప్‌ కొప్పుల ఈశ్వర్‌ చిన్నారి కుటుంబ సభ్యులను పరామర్శించారు.


 కొత్తగూడెం: ఖమ్మం జిల్లా కొత్తగూడెంలోని మేదర బస్తీలో బుధవారం రాత్రి విషాదం చోటు చేసుకుంది. ఇంటి పైకప్పు కూలి ముగ్గురు మృతి చెందారు. తల్లితో సహా ఇద్దరు పిల్లలు ప్రాణాలు కోల్పోయారు. దాంతో ఈ ప్రాంతంలో విషాద ఛాయలు అలముకున్నాయి.