● ఎలక్షన్‌ కమిషన్‌ విశ్వసనీయతనే తప్పుపడుతున్న వైనం ● ఏయూలో ఈవీఎంలు భద్రపరచొద్దంటూ ఈసీకి లేఖ ● ఈవీఎంలు ట్యాంపర్‌ చేస్తారంటూ అర్థంపర్థంలేని ఆరోపణలు ● ఏ ఎన్నికలైనా ఈవీఎంలు ఏయూలోనే.. ● ఈవీఎంల రక్షణ వలయం గురించి తెలియకుండా అవాకులుసాక్షి, విశాఖపట్నం : విద్యావంతుడినంటూ గొప్పలు చెప్పుకుంటున్న టీడీపీ విశాఖ ఎంపీ అభ్యర్థి శ్రీభరత్‌.. ఎన్నికల్లో గెలవలేనని తెలిసి రోజురోజుకీ దిగజారిపోతున్నారు. అక్రమాలకు కేరాఫ్‌గా మారిన దివంగత తాత అడుగు జాడల్లోనే నడుస్తూ.. తన సొంత వర్సిటీ కోసం దేవాలయంలాంటి ఆంధ్ర విశ్వవిద్యాలయంపై ఇష్టం వచ్చినట్లు మాట్లాడుతున్నారు. దశాబ్దాలుగా జరుగుతున్న ఎన్నికలకు సంబంధించి ఓట్ల లెక్కింపునకు కేంద్రంగా మారిన ఏయూలో ఈవీఎంలు భద్రపరచొద్దంటూ ఎన్నికల కమిషన్‌కు లేఖ రాయడం అందరినీ ఆగ్రహానికి గురిచేస్తోంది. ఈవీఎంల రక్షణ వలయం గురించి తెలియకుండా నోటికొచ్చినట్లు మాట్లాడుతూ ఎన్నికల కమిషన్‌ విశ్వసనీయతనే తప్పుపడుతున్న ఆయన వైఖరిపై విమర్శలు వెల్లువెత్తుతున్నాయి. ఏయూపై ఈసీకి లేఖతో కలకలం తాజాగా రిటర్నింగ్‌ అధికారికి రాసిన ఒక లేఖ భరత్‌ బేలతనాన్ని, అవివేకాన్ని, తేటతెల్లం చేస్తుంది. భారత ఎన్నికల సంఘంపై కానీ, భారతదేశ ఎన్నికల ప్రక్రియపై కానీ భరత్‌కు ఎలాంటి నమ్మకం, విశ్వాసం లేదనే విషయం స్పష్టమవుతోంది. ఆంధ్ర యూనివర్సిటీలో ఈవీఎంలను భద్రపరిస్తే వాటిని ట్యాంపరింగ్‌ చేస్తారని, వైఎస్సార్‌సీపీకి అనుకూలంగా ఈవీఎంలను మార్పు చేసేస్తారంటూ ఏకంగా రిటర్నింగ్‌ అధికారికి లేఖ రాయడం కలకలం రేపుతోంది. ఈ విషయం తెలుసా ? అసలు పూర్వాపరాలేవీ తెలియకుండా ఇష్టంవచ్చినట్లు మాట్లాడటం భరత్‌కు వారసత్వంగా వచ్చినట్లుందని అందరూ నవ్వుతున్నారు. వాస్తవానికి ఈనెల 13న జరిగే ఎన్నికల తరువాత ఈవీఎంలను ఏయూలో భద్రపరచాలని ఎన్నికల అధికారులు నిర్ణయించారు. దీనికోసం ఏయూ ప్రాంగణాన్ని వారు తమ ఆధీనంలోకి తీసుకున్నారు. ఈవీఎంల భద్రపరిచే భవనంలోకి ఈగ కూడా చొరబడే వీలు లేకుండా అవసరమైన అన్ని చర్యలను దాదాపు నెల రోజుల నుంచి ఎన్నికల అధికారులు పకడ్బందీగా నిర్వహించారు. ప్రతి సార్వత్రిక ఎన్నికల్లో విశాఖ జిల్లాకు సంబంధించి బ్యాలెట్‌ బాక్సులు, ఈవీఎంలు ఏయూలోనే భద్రపరుస్తున్నారు. ఓట్ల లెక్కింపు ప్రక్రియ కూడా అక్కడే సజావుగా నిర్వహిస్తున్నారు. ఇన్ని దశాబ్దాలుగా ఎప్పుడూ ఏ ఒక్క ఓటు గానీ, ఈవీఎం, బ్యాలెట్‌ బాక్సు కానీ ట్యాంపరింగ్‌ జరగలేదు. అందుకే ఎన్నికల కమిషన్‌ ఎప్పుడూ ఏయూనే ఎంపిక చేస్తుందన్న విషయం తెలియకుండా చేసిన ఆరోపణలతో భరత్‌ ఎందుకిలా ప్రవర్తిస్తున్నారో అర్థం కావడం లేదన్న అనుమానాలు వ్యక్తమవుతున్నాయి. ఈసీపై విశ్వాసం లేదా..? ఎన్నికల సంఘాన్ని దాని విశ్వసనీయతను దెబ్బతీసే విధంగా శ్రీ భరత్‌ లేఖ రాశారు. ఈవీఎంల భద్రతకు పటిష్టమైన రక్షణ వలయంలో చుట్టూ సీసీ కెమెరాల నిఘా కూడా ఉంటుంది. ఈవీఎంలు భద్రపరిచిన ప్రాంతం.. రాష్ట్ర ప్రభుత్వ ఆధీనంలో కానీ, రాష్ట్ర పోలీసు వ్యవస్థ ఆధీనంలో కానీ ఉండవు. కేంద్ర ఎన్నికల సంఘం ఆదేశాలకు అనుగుణంగా, రాష్ట్ర ఎన్నికల సంఘం అధికారులు, రిటర్నింగ్‌ అధికారులు, ప్రత్యేక బలగాల ఆధ్వర్యంలో ఈవీఎంలను భద్రపరుస్తారు. వీటి జోలికి వెళ్లడం గానీ, వాటిని చూడడం కానీ, వాటిని ముట్టుకోవడం కానీ, వాటిని ట్యాంపరింగ్‌ చేయడం కానీ ఎవరి వల్ల సాధ్యం కాదు. ఇంత చిన్న విషయం కూడా తెలియకుండా.. ఎంపీ బరిలో రెండో సారి ఎలా పోటీ చేస్తున్నారంటూ విశాఖ వాసులు, విద్యావంతులు ఆశ్చర్యపోతున్నారు. ఇలాంటి వారికి ఓటేస్తే తమ ఓటు వృథాగా మారినట్లేనని భావిస్తున్నారు. భరత్‌ రాసిన లేఖపై టీడీపీ నాయకులే మండిపడుతున్నారు. టీచర్లనీ మార్చేయ్యాలంట.? ఒక ఇంటర్వ్యూలో మాట్లాడుతూ ప్రభుత్వ పాఠశాలల్ని మారిస్తే సరిపోదు అక్కడ పనిచేస్తున్న ఉపాధ్యాయుల్ని కూడా మార్చేయాలి అని భరత్‌ వ్యాఖ్యలు చేశారు. రాష్ట్రంలో పనిచేస్తున్న టీచర్లందరినీ కించపరిచేవిధంగా మాట్లాడటం కూడా భరత్‌ దిగజారుడు తనానికి నిదర్శమని చెప్పవచ్చు. మరో విషయం ఏమిటంటే.. గీతం విద్యా సంస్థల్లో పనిచేస్తున్న ఆచార్యులను భరత్‌ బలవంతంగా భీమిలి, విశాఖ తూర్పు, గాజువాక నియోజకవర్గాల్లో ఇంటింటికీ వెళ్లి ప్రచారం చేయాలంటూ హుకుం జారీ చేశారు. దీంతో పాఠాలు చెప్పుకునే మమ్మల్ని ఇలా ప్రచారానికి తిప్పడంపై వారంతా ఆవేదన వ్యక్తం చేస్తున్నారు.

మధురవాడ: భీమిలి నియోజకవర్గం జీవీఎంసీ 5, 7 వార్డుల్లో టీడీపీ నాయకులు, కార్యకర్తలు గురువారం మధ్యాహ్నం విచ్చల విడిగా డబ్బులు పంపిణీ చేశారు. ప్రియదర్శిని కాలనీ దోభీ ఖానా వద్ద ఉన్న ఓ అపార్ట్‌మెంట్‌లో 7వ వార్డుకు చెందిన టీడీపీ ముఖ్యనేతతో పాటు 5వ వార్డు ముఖ్యనాయకులు, గంటా నియమించిన పర్యవేక్షకుల ఆధ్వర్యంలో డబ్బులు పంపిణీ చేశారు. వాటర్‌ ట్యాంక్‌, స్వతంత్రనగర్‌ పార్కు సమీపంలోని సచివాలయం ఎదురు ప్రాంతాల్లో టీడీపీ నాయకులు స్లిప్పులు తనిఖీలు చేసి మరీ డబ్బులు పంపిణీ చేశారు. పట్ట పగలు అడ్డూ.. ఆపూ లేకుండా టీడీపీ నాయకులు డబ్బులు పంపిణీ చేయడంపై పలువురు విస్మయం వ్యక్తం చేశారు. ఇంత జరగుతున్నా ఎన్నికలు అధికారులు ఇటు వైపు కన్నెత్తి చూడలేదనే విమర్శలు వినిపిస్తున్నాయి. విచ్చలవిడిగా డబ్బుల పంపిణీ

8లోఓట్ల పండక్కి ఆహ్వానం మహారాణిపేట: ఎన్నికల పండగలో ఓటర్లు భాగస్వాములు కావాలని కలెక్టర్‌ డాక్టర్‌ ఎ.మల్లికార్జున పిలుపునిచ్చారు. ఈ నెల 13న ఓటరు మహాశయులంతా వచ్చి ఓటు హక్కు వినియోగించుకోవాలని ఈ మేరకు ఆహ్వాన పత్రికను ప్రచురించారు. ప్రజాస్వామ్య పద్ధతిలో జరిగే ఈ ఎన్నికల్లో నచ్చిన అభ్యర్థులను ఎన్నుకోవాలని అభ్యర్థించారు. సోమవారం ఉదయం 7 గంటల నుంచి సాయంత్రం 6 గంటల వరకు పోలింగ్‌ జరుగుతుందన్నారు. ఈ సారి జిల్లాలో పోలింగ్‌ శాతం పెంచేందుకు కలెక్టర్‌ ఆధ్వర్యంలో జిల్లా యంత్రాంగం పలు పద్ధతుల్లో ఓటర్లకు అవగాహన కల్పించింది. అసెంబ్లీ నియోజకవర్గాల వారీగా అవగాహన సదస్సులు, 5కె రన్‌, కరపత్రాల పంపిణీ, స్వీప్‌ పేరిట పలు కార్యక్రమాలు నిర్వహించింది.

సీతమ్మధార(విశాఖ ఉత్తర): సమాజ్‌ వాది పార్టీ ఉత్తర నియోజకవర్గ ఎమ్మెల్యే అభ్యర్థి జి.శరత్‌బాబు గురువారం వైఎస్సార్‌సీపీలో చేరారు. బాలయ్యశాస్త్రి లేఅవుట్‌లోని పార్టీ కార్యాలయంలో ఆయనకు వైఎస్సార్‌సీపీ ఉత్తర ఎమ్మెల్యే అభ్యర్థి కె.కె.రాజు సమక్షంలో రాజ్యసభ సభ్యుడు గొల్ల బాబూరావు కండువా వేసి పార్టీలోకి ఆహ్వానించారు. ఈ సందర్భంగా బాబూరావు మాట్లాడుతూ ముఖ్యమంత్రి వైఎస్‌ జగన్‌ ప్రజల ముంగిటకే అనేక సంక్షేమ పథకాలు అందిస్తున్నారన్నారు. రాజ్యసభ నిధులు వెచ్చించి ఉత్తరను అభివృద్ధి చేస్తానని చెప్పారు. కె.కె.రాజు మాట్లాడుతూ సీఎం వైఎస్‌ జగన్‌ సహకారంతో ఉత్తర నియోజకవర్గంలో రూ.435 కోట్లతో అభివృద్ధి కార్యక్రమాలు చేపట్టినట్లు తెలిపారు. శరత్‌బాబు మాట్లాడుతూ ముఖ్యమంత్రి వైఎస్‌ జగన్‌మోహన్‌రెడ్డి చేపడుతున్న సంక్షేమ, అభివృద్ధి కార్యక్రమాలకు ఆకర్షితుడినై తమ పార్టీ కార్యకర్తలతో కలిసి వైఎస్సార్‌సీపీలో చేరానన్నారు. జగనన్నతోనే ప్రజలకు న్యాయం జరుగుతుందని చెప్పారు. కార్యక్రమంలో పార్టీ ఉత్తర ఎన్నికల పరిశీలకుడు చొక్కాకుల వెంకటరావు, వీఎంఆర్‌డీఏ చైర్మన్‌ సనపల చంద్రమౌళి, కె.వి.బాబా, పార్టీ నాయకులు పాల్గొన్నారు.

కంచరపాలెం: వైఎస్సార్‌సీపీ విశాఖ ఎంపీ, ఉత్తర నియోజకవర్గ ఎమ్మెల్యే అభ్యర్థులు బొత్స ఝాన్సీ, కె.కె.రాజులను భారీ మెజారిటీతో గెలిపించాలని మాదిగ మహాసేన అధ్యక్షుడు కొరిటిపాటి ప్రేమ్‌కుమార్‌ కోరారు. రాష్ట్రవ్యాప్త పర్యటనలో భాగంగా గురువారం 54వ వార్డు కంచరపాలెం, 104 ఏరియా, మర్రిపాలెం ప్రాంతాల్లో ఎన్నికల ప్రచారం నిర్వహించారు. స్థానిక మాదిగ మహాసేనకు సంఘీభావం తెలిపారు. వైఎస్సార్‌సీపీ అభ్యర్థుల విజయానికి మాదిగల సమావేశం ఏర్పాటు చేశామన్నారు. రాష్ట్రంలోని మాదిగలందరూ సీఎం వైఎస్‌ జగన్‌మోహన్‌రెడ్డి వల్లే మంచి స్థాయిలో ఉన్నారని తెలిపారు. విద్య, వైద్యం అనేక రంగాల్లో మెరుగైన పాలన జగన్‌ చూపించారన్నారు. రాష్ట్రంలోనే ఎన్నడూ లేని విధంగా మంత్రుల కోటలో తొలిసారిగా ఒక మాదిగ మహిళకు హోంశాఖ ఇచ్చారని ప్రశంసించారు. కార్యక్రమంలో వైఎస్సార్‌సీపీ వార్డు అధ్యక్షుడు చల్లా ఈశ్వరరావు, జిల్లా అధ్యక్షుడు ముప్పిడి నర్సింగరావు, అచ్యుతరావు, చిరంజీవి, ప్రసాద్‌, దుర్గారావు, శివప్రసాద్‌, రమేష్‌, శ్రీను, గోపి, వినయ్‌, ఎలమంద, పలు జిల్లాల నుంచి మాదిగ సంఘాల నాయకులు, కార్యకర్తలు పాల్గొన్నారు. మాదిగ మహాసేన అధ్యక్షుడు ప్రేమ్‌కుమార్‌