ఉమ్మడిగా పర్యాటకం

సాక్షి, హైదరాబాద్: దక్షిణాదిలో పర్యాటకాభివృద్ధి లక్ష్యంగా రూపుదిద్దుకున్న ‘దక్షిణాది రాష్ట్రాల పర్యాటక సలహా మండలి’ తొలి భేటీ శనివారం హైదరాబాద్‌లో ప్రారంభమైంది. కేంద్ర పర్యాటక శాఖ మంత్రి చిరంజీవి దీన్ని ప్రారంభించారు. ఆంధ్రప్రదేశ్, కర్ణాటక, తమిళనాడు, కేరళ రాష్ట్రాలతోపాటు పాండిచ్చేరికి చెందిన పర్యాటక శాఖ ఉన్నతాధికారులు, కేంద్ర పర్యాటకశాఖ అధికారులు ఇందులో పాల్గొన్నారు. పర్యాటకులు ఎలాంటి అడ్డంకులు లేకుండా ఆయా రాష్ట్రాల్లో పర్యటించటం, వారికి సహాయంగా రాష్ట్రాల మధ్య ఇచ్చిపుచ్చుకునే ధోరణి, రాష్ట్రాల మధ్య భిన్నంగా ఉన్న పన్నులను ఏకీకృతం చేయటం, ప్రభుత్వ నిబంధనలను సరళీకృతం చేయటం, పర్యాటకులకు వసతుల కల్పన.. తదితర అంశాలపై ఇందులో చర్చించారు.  దక్షిణాది రాష్ట్రాలు కలిసి ముందుకు సాగితే ఈ ప్రాంతంలోని ఎన్నో పర్యాటక స్థలాలు అభివృద్ధి చెందుతాయని కేంద్ర మంత్రి చిరంజీవి అభిప్రాయపడ్డారు. పర్యాటక ప్రాంతాల్లో పరిసరాల పరిశుభ్రత చాలా ముఖ్యమని, అలాగే పర్యాటకులకు రక్షణ కల్పించే అంశం కూడా చాలా కీలకమని ఆయన అన్నారు.