● కౌంటింగ్‌ పూర్తయ్యేంత వరకు జిల్లాలో 144 సెక్షన్‌ చిత్తూరు అర్బన్‌: ఈవీఎంలను భద్రపరచిన స్ట్రాంగ్‌ రూమ్‌లను చిత్తూరు ఎస్పీ మణికంఠ బుధవారం తనిఖీ చేశారు. చిత్తూరు సమీపంలోని ఎస్వీ–సెట్‌ కళాశాల ప్రాంగణంలో ఉన్న ఈవీఎంల ప్రాంగణాన్ని ఆయన అధికారులతో కలిసి పరిశీలించారు. ఆయన మాట్లాడుతూ ఇక్కడ మూడంచెల భద్రత వ్యవస్థ కల్పించామని, ఎక్కడా కూడా లోటుపాట్లకు తావివ్వరాదని ఆదేశించారు. 24 గంటలు విధుల్లో ఉన్న పోలీసులు అప్రమత్తంగా ఉండాలన్నారు. చిన్నపాటి ఘటనలు మినహా, పోలింగ్‌ ప్రశాంతంగా నిర్వహించిన పోలీసు అధికారులను, కేంద్ర సాయుధ బలగాలను ఎస్పీ అభినందించారు. ఇదే స్ఫూర్తితో కౌంటింగ్‌ అయ్యేంత వరకు శాంతిభద్రతలను పర్యవేక్షించాలన్నారు. ఇక జిల్లా వ్యాప్తంగా బుధవారం నుంచి ఎన్నికల కౌంటింగ్‌ పూర్తయ్యేంత వరకు సెక్షన్‌ 144 అమలులో ఉంటుందన్నారు. ఎక్కడగానీ గుంపులుగా ఉండకూడదని, సభలు, సమావేశాలు నిర్వహించకూడదన్నారు. నిబంధనలు ఉల్లంఘిస్తే చట్టరీత్యా చర్యలు తీసుకుంటామని హెచ్చరించారు. ఎస్పీ వెంట ఏఎస్పీ ఆరీఫుల్లా, డీఎస్పీలు రాజగోపాల్‌రెడ్డి, మహబూబ్‌బాషా, సీఐలు సుదర్శన్‌ ప్రసాద్‌, ఆర్‌ఐ నీలకంఠేశ్వరరెడ్డి తదితరులు ఉన్నారు.

● నియోజకవర్గాల వారీగా ఈవీఎంలు భద్రత చిత్తూరు కలెక్టరేట్‌ : జిల్లా వ్యాప్తంగా ఏడు నియోజకవర్గాల ఈవీఎంలు జిల్లా కేంద్రానికి సరిహద్దులో ఉన్న ఎస్వీసెట్‌ ఇంజనీరింగ్‌ కళాశాల కౌంటింగ్‌ కేంద్రానికి చేరుకున్నాయి. 13 వ తేదీ నుంచి విడతల వారీగా వచ్చిన ఈవీఎంలను పకడ్బందీగా పరిశీలించి వాటిని స్ట్రాంగ్‌రూంలో భద్రపరిచారు. కుప్పం నియోజకవర్గానికి సంబంధించి మొదట అక్కడ ఏర్పాటు చేసిన తాత్కాలిక గోడౌన్‌లో ఈవీఎంలను భద్రపరిచారు. అనంతరం వాటిని కౌంటింగ్‌ కేంద్రానికి గట్టి బందోబస్తు నడుమ వాటిని తరలించారు. అబ్జర్వర్‌లు, ఏజెంట్ల సమక్షంలో అన్ని నియోజకవర్గాల ఈవీఎంలను భద్రపరిచారు. ప్రతి స్ట్రాంగ్‌ రూం వద్ద సీసీ కెమెరాలను, కేంద్ర బలగాలను విధుల్లో పెట్టారు. ఐడీ కార్డు ఉన్న వారు మాత్రమే కౌంటింగ్‌ కేంద్రంలోకి అనుమతిస్తున్నారు. బయటి వ్యక్తులు లోనికి ప్రవేశించకుండా జిల్లా యంత్రాంగం చర్యలు తీసుకుంది. భక్తులతో కాణిపాకం కిటకిటకాణిపాకం: కాణిపాకంలోని శ్రీవరసిద్ధి వినాయకస్వామి దేవస్థానం బుధవారం భక్తులతో కిటకిటలాడింది. వేసవి సెలవులు, ఎన్నికలు ముగియడంతో ఆలయానికి భక్తుల తాకిడి మరింత పెరిగింది. ఆలయ క్యూలో భక్తులు బారులు తీరారు. అధికారులు భక్తులు అసౌకర్యానికి గురికాకుండా పర్యవేక్షించారు. స్వామివారి దర్శనభాగ్యం కల్పించారు. జిల్లాకు చేరిన పోస్టల్‌ బ్యాలెట్లు చిత్తూరు కలెక్టరేట్‌ : రాష్ట్రంలోని ఇతర జిల్లాల్లో పనిచేస్తున్న చిత్తూరు జిల్లాకు చెందిన ఉద్యోగుల పోస్టల్‌ బ్యాలెట్‌ ఓట్లు బుధవారం జిల్లాకు చేరాయి. జిల్లాకు చెందిన ఉద్యోగులు వివిధ జిల్లాల్లో విధులు నిర్వహిస్తుంటారు. వారందరూ ఎన్నికల సంఘం కల్పించిన పోస్టల్‌ బ్యాలెట్‌ను ఆయా ఫెసిలిటేషన్‌ సెంటర్లలో సద్వినియోగం చేసుకున్నారు. ఆ పోస్టల్‌ బ్యాలెట్లను రాష్ట్రంలోని అన్ని జిల్లాల్లోని రిటర్నింగ్‌ అధికారులు చిత్తూరు జిల్లాకు పంపారు. ఆ పోస్టల్‌ బ్యాలెట్‌ ఓట్లను పకడ్బందీ బందోబస్తు నడుమ కలెక్టరేట్‌లో నియోజకవర్గాల వారీగా వేరుచేసే కార్యక్రమం బుధవారం నిర్వహించారు. తర్వాత ఏడు నియోజకవర్గాలకు చెందిన పోస్టల్‌ బ్యాలెట్లను ప్రత్యేక బాక్సులలో భద్రపరిచారు. ఈ కసరత్తు మొత్తం నిఘా నీడలో నిర్వహించారు. అనంతరం ఆ బాక్సులకు సీల్‌ వేసి ఎస్వీ సెట్‌లోని కౌంటింగ్‌ సెంటర్‌కు తరలించి ప్రత్యేక స్ట్రాంగ్‌ రూంలో భద్రపరిచారు. ఈ కసరత్తును జిల్లా ఎన్నికల అధికారి షణ్మోహన్‌ పర్యవేక్షించారు.

● ఏడు నియోజకవర్గాల్లో 2,01,903 మంది ఓటుకు దూరం ● ఓటు వేయని పురుష ఓటర్లు 95,700 మంది చిత్తూరు కలెక్టరేట్‌ : జిల్లా వ్యాప్తంగా ప్రస్తుతం నిర్వహించిన సార్వత్రిక ఎన్నికల్లో ఓటు హక్కును పలువురు సద్వినియోగం చేసుకోలేదు. జిల్లాలోని ఏడు అసెంబ్లీ నియోజకవర్గాల్లో ఓటుకు డుమ్మా కొట్టారు. గత ఎన్నికల కంటే జిల్లాలో పోలింగ్‌ శాతం ఎక్కువగా నమోదైనప్పటికీ ఈసారి ఏడు అసెంబ్లీ నియోజకవర్గాల్లో 2,01,903 మంది ఓటర్లు ఓటు వేయలేదు. వాస్తవానికి ఓటు హక్కు ప్రాధాన్యతపై జిల్లా యంత్రాంగం విస్తృత స్థాయిలో అవగాహన కార్యక్రమాలు నిర్వహించింది. ఓటు విలువను తెలియజేసింది. రాజ్యాంగం కల్పించిన ఓటు హక్కును తప్పనిసరిగా సద్వినియోగం చేసుకోవాలని జిల్లా యంత్రాంగం ఓటర్లకు అవగాహన కల్పించింది. అయినప్పటికీ కొందరు ఓటింగ్‌కు రాలేదు. ఎగువ మధ్య తరగతి, ఉన్నత తరగతికి చెందిన వారు వీరిలో అధికంగా ఉన్నట్టు తెలుస్తోంది. చిత్తూరులోనే అత్యధికం చిత్తూరు నియోజకవర్గంలో అత్యధికంగా 38,062 మంది ఓటు హక్కును వినియోగించుకోలేదు. జిల్లా కేంద్రంలోని చిత్తూరు అర్బన్‌, చిత్తూరు రూరల్‌, గుడిపాల మండలాల్లో ఓటు హక్కు వినియోగించుకోకుండా అలసత్వం చూపారు. అలాగే పుంగనూరు, నగరి, జీడీ నెల్లూరు, పూతలపట్టు, పలమనేరు, కుప్పం నియోజకవర్గాల్లోనూ వేల సంఖ్యలో ఓటు హక్కును వినియోగించుకోలేదు. ఓటు వేయని మహిళా ఓటర్లు 1,06,163 మంది జిల్లా వ్యాప్తంగా ఈ సార్వత్రిక ఎన్నికలకు సంబంధించి ఏడు నియోజకవర్గాల్లో ఓటు హక్కుకు నమోదు చేసుకున్న వారిలో మహిళలే అత్యధికంగా ఉన్నారు. మొత్తం 7,93,682 మంది ఓటు హక్కుకు దరఖాస్తు చేసుకోగా ఎన్నికల్లో 6,87,519 మంది మాత్రమే ఓటు వేశారు. 1,06,163 మంది ఓటు హక్కును వినియోగించుకోలేకపోయారు. అలాగే పురుషులు 7,70,154 మంది ఓటు హక్కును పొందారు. ఇందులో 6,74,454 మంది ఓటు వేయగా 95,700 మంది ఓటు వేయలేకపోయారు. ఇతరుల్లో 75 మందికి గాను 35 మంది ఓటు వేయగా 40 ఓటు హక్కును వినియోగించుకోలేదు. జిల్లాలో నియోజకవర్గాల వారీగా ఓటు వేయని వారు నియోజకవర్గం ఓటు వేయనివారు పుంగనూరు 31,952 నగరి 26,175 జీడీ నెల్లూరు 23,170 చిత్తూరు 38,062 పూతలపట్టు 27,269 పలమనేరు 32,420 కుప్పం 22,855 మొత్తం 2,01,903

● ఎన్నికల్లో పెరిగిన ఓటింగ్‌ శాతం ● పురుషుల కంటే మహిళల ఓట్లే పోలింగ్‌లో అధికం ● మహిళల చేతుల్లో అభ్యర్థుల గెలుపు ● ఎవరి అంచనాలు ఫలిస్తాయో? కుప్పం: ఈ సార్వత్రిక ఎన్నికల్లో జరిగిన పోలింగ్‌ సరళిని పరిశీలిస్తే అధికార పార్టీ వైఎస్సార్‌ సీపీకి కుప్పం నియోజకవర్గంలో ఆదరణ పెరిగింది. 90 శాతం ఓటర్లు తమ ఓటు హక్కును వినియోగించుకున్నారు. అందులో మహిళా ఓటర్లే అధికం కావడంతో ఇప్పుడు ఫలితాలపై ఆసక్తి రేపింది. ఎక్కడ చూసినా కుప్పంలో గెలుపెవరిదోనంటూ చర్చకు తావిస్తోంది. వైఎస్సార్‌సీపీ విజయానికి పరిస్థితులు అనుకూలంగా ఉన్నాయని, ఈ ఎన్నికల్లో వైఎస్సార్‌ సీపీ ప్రచార శైలి, ప్రజా స్పందన, పోలింగ్‌ రోజున మహిళలు పెద్ద ఎత్తున తరలిరావడం వంటివి తమకు సానుకూల పరిణామాలని ఆ పార్టీ శ్రేణులు పేర్కొంటున్నాయి. బాబు కోటకు బీటలు 1989లో తొలిసారి కుప్పం నియోజకవర్గంలో టీడీపీ ఎమ్మెల్యే అభ్యర్థిగా చంద్రబాబు అడుగుపెట్టారు. అప్పటి నుంచి 2019 వరకు వరుస విజయాలతో కొనసాగుతున్నారు. దీంతో పాటు 1996 నుంచి 2004 వరకు ఉమ్మడి రాష్ట్రానికి ముఖ్యమంత్రిగా పనిచేశారు. అప్పటి నుంచి కుప్పం ఎమ్మెల్యేగా చంద్రబాబును గెలిపిస్తే ముఖ్యమంత్రి అవుతారని, ఇతరులను గెలిపిస్తే సాధారణ ఎమ్మెల్యేగానే ఉంటారని ప్రజల్లో ఒక అభిప్రాయం నాటుకుంది. 2014 ఎన్నికల్లో చంద్రబాబు అధికారంలోకి వచ్చాక హామీలు నెరవేర్చక, ఉద్యోగ వ్యతిరేక విధానాలు అవలంబిస్తుండడంతో ఆయనపై ప్రజల్లో ఆదరణ తగ్గిపోసాగింది. అలాగే చంద్రబాబుకు కుప్పంలో వ్యతిరేకత మొదలైంది. 2004 నుంచి వరుసగా జరిగిన ఎన్నికల్లో మెజార్టీ తగ్గుముఖం పట్టడం దీనికి నిదర్శనంగా ఉంటోంది. 2004లో 58,588 మెజార్టీ, 2009లో 46,066, 2014లో 47,114 అనంతరం 2019లో 30,674 మెజార్టీ సాధించారు. 2014లో అధికారం ఉన్నప్పుడు టీడీపీ పాలనలో స్థానిక నాయకులు ఆగడాలు, దౌర్జన్యాలు, అవకతవకలకు కుప్పం ప్రజలు విసిగివేసారిపోయారు. దీంతో వైఎస్సార్‌ సీపీ వైపు యువత మొగ్గుచూపింది. దీంతో 2019 ఎన్నికల్లో చంద్రబాబు 30 వేలకు మెజార్టీ పడిపోయింది. అధికారంలోకి వచ్చిన వైఎస్సార్‌ సీపీ కుప్పం నియోజకవర్గంలో బలపడింది. వైఎస్సార్‌ నియోజకవర్గ ఇన్‌చార్జిగా భరత్‌ రంగ ప్రవేశం చేశాక నియోజకవర్గంలో పట్టు సాధించారు. ఈ క్రమంలో స్థానిక సంస్థల ఎన్నికల్లో నాలుగు ఎంపీపీ స్థానాలు, నాలుగు జెడ్పీటీసీ స్థానాలను వైఎస్సార్‌ సీపీ కై వసం చేసుకుంది. దీంతో 74 పంచాయతీ, 56 ఎంపీటీసీ సెగ్మెంట్లలో వైఎస్సార్‌సీపీ గెలిచి బలం పెంచుకుంది. దీంతో క్షేత్రస్థాయిలో వైఎస్సార్‌ కేడర్‌ పెంచుకుని బలోపేతమైంది. గెలుపుపై ఎవరి ధీమా వారిదే.. సార్వత్రిక ఎన్నికల్లో కుప్పం అసెంబ్లీ స్థానాన్ని వైఎస్సార్‌ సీపీ గెలుపు సై దీమా ఉంది. ఈ సారి పోలింగ్‌ సరళీ , మహిళల ఓటింగ్‌ పట్ల వైఎస్సార్‌ సీపీ పార్టీ వర్గాలు సానుకూలంగా ఉన్నారు. ఈ ఐదేళ్లపాటు ఎమ్మెల్యే అభ్యర్థి భరత్‌ నియోజకవర్గంలో గడప గడపకూ తిరిగి అందరికీ సుపరిచితులయ్యారు. ఎమ్మెల్సీగా నియోజకవర్గం అభివృద్ధికి, ప్రజా సమస్యల పరిష్కారానికి శక్తివంచన లేకుండా కృషి చేసి ప్రజల అభిమానం చూరగొన్నారు. ఇక సతీమణి దుర్గా పద్మిని సైతం ప్రతి ఇంటి తలుపునూ తట్టి పలకరించారు. నియోజకవర్గంలో 79వేల కుటుంబాలను ఆమె కలిశారు. వారితో మమేకయ్యారు. అదే చంద్రబాబుగానీ, ఆయన కుటుంబ సభ్యులు గానీ ఇన్నేళ్ల చరిత్రలో ఏరోజూ నియోజకవర్గ ప్రజలను భరత్‌ దంపతుల తరహాలో కలిసిన దాఖలాలు లేవు. ఇదే వారికి ప్లస్‌ పాయింట్‌ అయ్యిందని, ప్రజలు కూడా వారి గురించి, వైఎస్సార్‌ సీపీ ప్రభుత్వం చేసిన మేలు గురించి ఆలోచించారని ఆ పార్టీ శ్రేణులు చెబుతున్నాయి. ఆ అభిమానమే పోలింగ్‌ రోజున మహిళలు పెద్ద సంఖ్యలో ఓటింగ్‌కు వచ్చారని, ఇదంతా వైఎస్సార్‌ సీపీకి కలిసొచ్చిన అంశాలని ధీమాగా చెబుతున్నాయి. ఇక, టీడీపీ శ్రేణులు మాత్రం చంద్రబాబును కుప్పం ఎన్నటికీ ఆయన్ను విస్మరించదని, ప్రత్యర్థితో నిమిత్తం లేకుండా ఆయన్ను గెలిపిస్తుందని టీడీపీ నేతలు ఆశావాదంతో ఉంటున్నారు.

● మొగిలిఘాట్‌ రోడ్డులో ఘోర రోడ్డు ప్రమాదం ● వరిగడ్డి ట్రాక్టర్‌ను ఢీకొన్న లారీ ● ఇద్దరు మృతి..ఐదుగురికి తీవ్రగాయాలు ● పశుగ్రాసం కోసం వెళ్లి వస్తూ మృత్యుఒడిలోకి.. ● ఇంటికి చేరేలోపు వెంటాడిన మృత్యువు ● ముగ్గురి పరిస్థితి విషమం బంగారుపాళ్యం: వారంతా రెక్కాడితేగానీ డొక్కాడని పరిస్థితి.. పాడిపై ఆధారపడి కుటుంబాలను పోషిస్తున్నారు. తమకు బతుకునిస్తున్న పశువులకు గ్రాసం కోసం పలమనేరు వెళ్లి, వరిగడ్డి లోడుతో తిరిగి వస్తుండగా ఇంటికి చేరేలోపు ఘోర రోడ్డు ప్రమాదానికి గురై ఇద్దరు మృత్యు ఒడికి చేరుకున్నారు. మరో ఐదుగురు తీవ్రంగా గాయపడ్డారు. ఈఘటన బంగారుపాళ్యం మండలం మొగిలి ఘాట్‌లో బుధవారం రాత్రి చోటు చేసుకుంది. వివరాలు.. మండలంలోని కీరమంద గ్రామానికి చెందిన నాగభూషణం(29), రాజయ్య(42), జయచంద్ర(49), రాజా(35), వేణు(60), బాబు(45) పలమనేరుకు పశుగ్రాసం కోసం ట్రాక్టర్‌లో వెళ్లారు. అక్కడ నుంచి వరిలోడుతో తిరుగు ప్రయాణమయ్యారు. మొగిలి ఘాట్‌ వద్ద ట్రాక్టర్‌ వెనుక వస్తున్న ఓ కట్టెల లారీ బ్రేక్‌ డౌన్‌ అయింది. దీంతో ఆ లారీ డివైడర్‌ను ఢీకొని..ట్రాక్టర్‌పై దూసుకెళ్లింది. ఆపై ట్రాక్టర్‌తో పాటు లారీ కూడా బోల్తా పడింది. దీంతో ట్రాక్టర్‌లో ఉన్న ఆరుగురు చెల్లాచెదురుగా పడిపోయారు. కట్టెల లారీ వెనుక వస్తున్న అట్టల లారీ కూడా బోల్తా పడి అదుపుతప్పిన లారీని బలంగా ఢీకొంది. ఈ ప్రమాదంలో భద్రాచలంకు చెందిన లారీ డ్రెవర్‌ రామారావుకు తీవ్రగాయాలయ్యాయి. స్థానికుల సమాచారం మేరకు పోలీసులు సంఘటన స్థలానికి చేరుకుని పరిశీలించారు. క్షత్రగాత్రులను బంగారుపాళ్యం ఆస్పత్రికి తరలిస్తుండగా మార్గమధ్యంలో రాజా మృతి చెందాడు. అలాగే పలమనేరు ఆస్పత్రిలో వేణు కూడా ప్రాణాలు కోల్పోయాడు. గాయపడ్డ వారిలో బాబు పలమనేరు ఆస్పత్రిలో చికిత్స పొందుతున్నాడు. అలాగే నాగభూషణం, జయచంద్ర, రాజయ్య, లారీ డ్రైవర్‌ రామారావును చికిత్స నిమిత్తం చిత్తూరు జిల్లా ఆస్పత్రికి తరలించగా జయచంద్ర, నాగభూషణం పరిస్థితి విషమంగా ఉండడంతో అక్కడి నుంచి తిరుపతికి రెఫర్‌ చేశారు. అయితే ట్రాక్టర్‌..లారీ ఢీకొనే సమయంలో ఓ ద్విచక్రవాహనం ట్రాక్టర్‌ను క్రాస్‌ చేసినట్లు తెలుస్తోంది. ఇంతకీ ఆవాహనదారుడి ఆచూకీ తెలియడం లేదు. దీంతో గ్రామంలో విషాద ఛాయాలు అలుముకున్నాయి. ఈ రోడ్డు ప్రమాదానికి మితిమీరిన వేగమే కారణమని స్థానికులు చెబుతున్నారు. డీజిల్‌ ఆదా చేసేందుకు న్యూట్రల్‌లో నడపడం వల్ల బ్రేక్‌ డౌన్‌ కావడంతో పాటు ప్రమాదానికి కారణమని పలువురు అంటున్నారు. ఇక సమాచారం అందుతున్న డీసీహెచ్‌ఎస్‌ రాజశేఖర్‌రెడ్డి క్షత్రగాత్రులను పరామర్శించారు. వారికి మెరుగైన వైద్యం అందేలా చర్యలు తీసుకున్నారు.