చెస్‌లో ఒంగోలు విద్యార్థిని సత్తా

చెస్‌లో ఒంగోలు విద్యార్థిని సత్తా

ఒంగోలు సబర్బన్‌: స్థానిక పీవీఆర్‌ బాలికల హైస్కూల్లో 9వ తరగతి చదువుతున్న విద్యార్థిని గుంటక ఆముక్త జర్మనీలో నిర్వహించిన అంతర్జాతీయ చెస్‌ టోర్నమెంట్‌లో సత్తా చాటింది. తన తొలి ఓపెన్‌ మహిళా ఇంటర్నేషనల్‌ మాస్టర్‌ (డబ్ల్యూఐఎం) నార్మ్‌ సాధించింది. ఈ సందర్భంగా ఆముక్తను శనివారం కలెక్టర్‌ రాజాబాబు తన చాంబర్‌లో సత్కరించి ప్రత్యేకంగా అభినందించారు. ఆముక్త తాజా అంతర్జాతీయ విజయంతో కేవలం 13 ఏళ్ల వయసులోనే 2208 ఫైడే ఎలో రేటింగ్‌తో మహిళా ఫైడే మాస్టర్‌ (డబ్ల్యూఎఫ్‌ఎం) టైటిల్‌ కై వసం చేసుకుంది. జర్మనీలో జరిగిన బలమైన అంతర్జాతీయ టోర్నమెంట్‌లో దేశ విదేశాల నుంచి పాల్గొన్న శక్తివంతమైన క్రీడాకారిణుల మధ్య అత్యుత్తమ ప్రదర్శన చేసి తన మొదటి మహిళా ఇంటర్నేషనల్‌ మాస్టర్‌ నార్మ్‌ సాధించింది. ఇది ఆమెను భవిష్యత్‌లో మహిళా ఇంటర్నేషనల్‌ మాస్టర్‌ మాత్రమే కాకుండా మహిళా గ్రాండ్‌మాస్టర్‌ దిశగా ముందుకు నడిపించే మైలురాయిగా నిలిచిందని కలెక్టర్‌ అభినందించారు. ప్రధాన అంతర్జాతీయ విజయాలలో ఆముక్త నిలిచిందన్నారు.

ఇప్పటికే పలు పతకాలు...

2025లో తజికిస్థాన్‌లో జరిగిన వెస్ట్రన్‌ ఆసియా యువ చెస్‌ చాంపియన్‌షిప్‌లో భారత జట్టుకు ఆముక్త ప్రాతినిధ్యం వహిస్తూ ర్యాపిడ్‌ విభాగంలో స్వర్ణ పతకం, అలాగే ర్యాపిడ్‌, బ్లిట్జ్‌, స్టాండర్డ్‌ విభాగాల్లో పలు పతకాలు సాధించి దేశానికి గౌరవం తీసుకొచ్చింది. అంతర్జాతీయ స్థాయిలో వివిధ వర్గాలలో ఆముక్త స్థిరంగా పాయింట్లు సాధిస్తూ కఠినమైన పోటీల్లోనూ తన ప్రతిభను నిరూపించుకుంటూ వచ్చింది. జాతీయ స్థాయిలో అండర్‌–11, అండర్‌–13, అండర్‌–15 వయో విభాగాలలో, అలాగే జట్టు ఫార్మాట్‌లలో భారతస్థాయి చాంపియన్‌షిప్‌లలో ఆముక్త అనేక సార్లు అగ్రస్థానాల్లో నిలిచింది. 2025లో నేషనల్‌ అమేచ్యూర్‌ (బి–2300 మహిళల విభాగం) బోధ్‌గయాలో నిర్వహించిన టోర్నమెంట్‌లో 9 రౌండ్లలో 6 పాయింట్లు సాధించి మొత్తంగా మూడో స్థానం దక్కించుకోవడం ఆమె స్థిరమైన ఫార్మ్‌కు నిదర్శనం.

రాష్ట్ర స్థాయి విజయాలు...

ఆంధ్రప్రదేశ్‌ రాష్ట్ర స్థాయి పోటీల్లో ఆముక్త ఇప్పటికే తనదైన ముద్ర వేసింది. 2024లో రాష్ట్ర అండర్‌–17 బాలికల చెస్‌ చాంపియన్‌షిప్‌లో విజేతగా నిలవడంతో పాటు 2023లో అండర్‌–11 బాలికల రాష్ట్ర చాంపియన్‌షిప్‌లో రన్నరప్‌గా నిలిచింది. ప్రకాశం జిల్లాలో అండర్‌–17 బాలికల సెలెక్షన్‌ టోర్నమెంట్‌ వంటి అనేక జిల్లా స్థాయి టోర్నమెంట్‌లలో అగ్రస్థానాలు సాధిస్తూ రాష్ట్ర చెస్‌ రంగంలో తన స్థానాన్ని బలంగా స్థిరపరుచుకుంది.

అంతర్జాతీయ స్థాయి టోర్నమెంట్‌లో విజేతగా పీవీఆర్‌ బాలికల హైస్కూల్‌ విద్యార్థిని ఆముక్త

ప్రత్యేకంగా అభినందించిన కలెక్టర్‌ రాజాబాబు