వైద్యాధికారిపై విచారణ

చీపురుపల్లి రూరల్‌ (గరివిడి): గరివిడి మండలంలోని కోనూరు పీహెచ్‌సీ వైద్యాధికారి వెంకటరమణమ్మపై జిల్లా వైద్యశాఖాధికారులు శనివారం విచారణ చేపట్టారు. వెంకటరమణమ్మ విధులకు సక్రమంగా హాజరుకావడం లేదని, సకాలంలో అందుబాటులో ఉండడం లేదంటూ కోనూరు, గొలగాం గ్రామాలకు చెందిన నాయకులు మాజీ సర్పంచ్‌ వెంపడాపు రమణమూర్తి, ఎం.అప్పలనాయుడు, వై.రమణ, ఎం. రాము, తదితరులు ఇటీవల కలెక్టర్‌, డీఎంహెచ్‌ఓలకు ఫిర్యాదు చేశారు. ఈ మేరకు డీఎంహెచ్‌ఓ జీవనరాణి ఆదేశాల మేరకు జిల్లా వైద్యారోగ్యశాఖ ప్రొగ్రాం అధికారి సుబ్రహ్మణ్యం స్థానిక పీహెచ్‌సీలో ఫిర్యాదుదారుల సమక్షంలో విచారణ చేశారు. ఆరోగ్య కేంద్రానికి సకాలంలో విధులకు హాజరు కావటం లేదని, ప్రతీరోజు 11, 12 గంటలకు పీహెచ్‌సీకి వచ్చి వెంటనే వెళ్లిపోతున్నారని.. ఆస్పత్రిలో ప్రసవాలు జరిపించడం లేదంటూ ఫిర్యాదుదారులు అధికారులకు తెలియజేశారు. ఇదే పీహెచ్‌సీ పరిధిలో గల గుర్ల మండలం తాటిపూడి సచివాలయంలో పనిచేస్తున్న ఎంఎల్‌హెచ్‌పీ కస్తూరి సక్రమంగా విధలకు హాజరుకావడం లేదని గొలగాం గ్రామానికి చెందిన సర్పంచ్‌ కలిశెట్టి అప్పలరాజు విచారణాధికారులకు తెలియజేశారు. విచారణ నివేదికను ఉన్నతాధికారులకు తెలియజేస్తామని అధికారులు తెలిపారు.