టీడీపీ నాయకులు చెబితేనే కొంటాం..

గుర్ల: రైతులు ఆరుగాలం పండించిన పంటను అమ్ముకోవడానికి కూడా చంద్రబాబు ప్రభుత్వంలో ఇబ్బంది పడాల్సి వస్తోంది. పండించిన పంటను మిల్లులకు తరలించాలన్న టీడీపీ నాయకుల అనుమతి ఉండాలని అధికారులు చెబుతుండడంపై అన్నదాతలు నివ్వెరబోతున్నారు. వివరాల్లోకి వెళితే.. మండలంలోని చింతలపేటకు చెందిన సంచాన గౌరినాయుడు, యడ్ల ఉమామహేశ్వరి, పతివాడ శ్రీనువాసరావు, పతివాడ రమణ, పతివాడ పద్మ, తదితరులు కోతలు పూర్తి చేసి ధాన్యాన్ని కళ్లాల్లో ఉంచారు. రైతుసేవా కేంద్రానికి వెళ్లి ధాన్యం మిల్లుకు తరలించాలని వీఏఏను కోరారు. దీంతో ఆమె గురువారం షెడ్యూల్‌ ఇచ్చి గూడెం సొసైటీ సిబ్బంది నియమించిన టీఏ, డీఈఈల వద్దకు పంపించింది. రైతులు టీఏ, డీఈఈలను సంప్రదించి ధాన్యం తరలింపునుకు సంబంధించి ఽట్రక్‌షీట్‌ జనరేట్‌ చేయాలని కోరారు. అయితే ధాన్యం కొనుగోలు ప్రక్రియ చేయాలంటే తప్పనిసరిగా గ్రామ టీడీపీ నాయకుడు, గూడెం సొసైటీ చైర్మన్‌ను కలవాలని.. అతను చెబితే కొనుగోలు ప్రారంభిస్తామని సొసైటీ నియమించిన సిబ్బంది తెలిపారు.

రెండు రోజులుగా నిలిచిన లారీలు

చింతలపేటలో ఐదుగురు రైతులకు చెందిన 1100 బస్తాల ధాన్యం రెండు లారీలకు లోడ్‌ చేశారు. ధాన్యం లోడ్‌ చేసి రెండు రోజులవుతున్న సొసైటీ సిబ్బంది మాత్రం ట్రక్‌షీట్‌ జనరేట్‌ చేయలేదు. దీంతో రైతులు జిల్లా అధికారులకు ఫిర్యాదు చేశారు. జిల్లా అధికారులు ట్రక్‌షీట్‌ జనరేట్‌ చేయాలని చెప్పినా శనివారం సాయంత్రం వరకు జనరేట్‌ చేయలేదు. దీంతో అధికారులు గ్రామానికి వచ్చి ట్రక్‌షీట్‌ జనరేట్‌ చేయించారు.

మండిపడుతున్న అన్నదాతలు..

ధాన్యం కొనుగోలుకు సంబంధించి ప్రారంభంలోనే టీడీపీ నాయకుల తీరు ఇలా ఉంటే.. రానున్న రోజుల్లో ఇంకెంత దారుణంగా వ్యవహరిస్తారోనని అన్నదాతలు ఆందోళన చెందుతున్నారు. టీడీపీ నాయకుల చుట్టూ తిరిగితే ధాన్యం కొంటారా అంటూ మండిపడుతున్నారు.

ధాన్యం లోడ్‌ చేసి రెండు రోజులవుతున్నా ట్రక్‌షీట్‌ జనరేట్‌ చేయని వైనం

గూడెం సొసైటీ సిబ్బంది నిర్వాకం

అధికారుల ఆగ్రహించడంతో మిల్లుకు తరలింపు