శాకంబరిగా బాల చాముండేశ్వరి

Jul 11 2025 6:27 AM | Updated on Jul 11 2025 6:27 AM

అమరావతి: ప్రసిద్ధ పుణ్యక్షేత్రమైన అమరావతి బాల చాముండికా సమేత అమరేశ్వర స్వామి వారి దేవస్థానంలో గురువారం బాల చాముండేశ్వరి దేవి భక్తులకు శాకంబరిగా దర్శనమిచ్చారు. ఆషాఢ పౌర్ణమి పర్వదినాన్ని పురస్కరించుకుని అమ్మవారిని కూరగాయలతో ఆకర్షణీయంగా అలంకరించారు. లోక కల్యాణార్థం అమ్మవారిని కూరగాయలతో అలంకరించామని ఆలయ స్థానాచార్యుడు చంద్రశేఖరశర్మ తెలిపారు. ఆలయంలోని జ్వాలాముఖి దేవికి కూడా శాకంబరిగా అలంకరించి, ప్రత్యేక పూజలు నిర్వహించారు. అమ్మ వారిని భక్తులు పెద్ద సంఖ్యలో దర్శించుకున్నారు.

పెరుగుతున్న సాగర్‌ నీటిమట్టం

విజయపురి సౌత్‌: నాగార్జునసాగర్‌ నీటిమట్టం క్రమంగా పెరుగుతోంది. గురువారం సాయంత్రం ఆరు గంటలకు 541.20 అడుగులకు చేరింది. కాగా, ఇది 190.8366 టీఎంసీలకు సమానం. సాగర్‌ జలాశయం నుంచి ప్రధాన జలవిద్యుత్‌ కేంద్రం ద్వారా 4,204, ఎడమ కాలువకు 3,202, ఎస్‌ఎల్‌బీసీకి 1,500 క్యూసెక్కులు విడుదల అవుతోంది. సాగర్‌ జలాశయం నుంచి మొత్తం 8,906 క్యూసెక్కులు విడుదల చేస్తున్నారు. శ్రీశైలం నుంచి సాగర్‌ జలాశయానికి 1,16,833 క్యూసెక్కులు వచ్చి చేరుతోంది.

కందులు కొనుగోలు చేయండి

నరసరావుపేట: కందుల ధరలు తగ్గుతున్న నేపథ్యంలో జిల్లా రైతుల నుంచి కొనుగోలు చేయాలని దాల్‌ మిల్లర్లను జిల్లా కలెక్టర్‌ పి.అరుణ్‌బాబు కోరారు. గురువారం కలెక్టరేట్‌లో దాల్‌ మిల్లర్లతో సమావేశం నిర్వహించారు. వినుకొండ, దాచేపల్లి మండలాల్లో రైతుల వద్ద ఉన్న కందులను మెరుగైన ధరకు కొనాలన్నారు. ఈ వారంలోగా ధరను మిల్లర్స్‌ అసోసియేషన్‌ ద్వారా నిర్ణయించి కొనుగోళ్లు ప్రారంభించాలని సూచించారు. జాయింట్‌ కలెక్టర్‌ సూరజ్‌ గనోరే, జిల్లా వ్యవసాయ అధికారి జె.జగ్గారావు, ఆర్డీవోలు కె.మధులత, రమణాకాంత్‌రెడ్డి, మురళీకృష్ణ పాల్గొన్నారు.

ధాన్యం కొనుగోలు బకాయిల చెల్లింపు పూర్తి

నరసరావుపేట: జిల్లాలో గురువారం ధాన్యం కొనుగోలు బకాయిల్లో రూ.6.29 కోట్లు చెల్లింపులు ప్రధాన కార్యాలయ నుంచి రైతుల అకౌంట్లకు జమ చేశామని, దీంతో మొత్తం బకాయిలు రూ.11.36 కోట్ల చెల్లింపులు పూర్తి చేసినట్లు జాయింట్‌ కలెక్టర్‌ సూరజ్‌ గనోరే వెల్లడించారు. ఈ మేరకు ఒక ప్రకటన విడుదల చేశారు. 2024–25 రబీ సీజన్‌లో 68 రైతుసేవా కేంద్రాల ఆధ్వర్యంలో 37 కొనుగోలు కేంద్రాల ద్వారా 550 మంది రైతుల నుంచి రూ.11.36 కోట్ల విలువైన 4,904 మెట్రిక్‌ టన్నులు కొనుగోలు చేశామన్నారు. ఈ ఏడాది జూన్‌ 30 వరకు రూ.4.07 కోట్లు చెల్లింపులు జరిగాయన్నారు. జూలై ఒకటో తేదీన మరో రూ. కోటి రైతుల అకౌంట్లకు వేశామన్నారు.

నాణ్యతతో కూడిన

విద్యుత్‌ సరఫరాకు చర్యలు

ఏపీసీపీడీసీఎల్‌ సీఎండీ పుల్లారెడ్డి

నరసరావుపేట: నాణ్యతతో కూడిన విద్యుత్‌ సరఫరా చేసేందుకు తగిన చర్యలు చేపట్టినట్లు ఏపీసీపీడీసీఎల్‌ సీఎండీ డి.పుల్లారెడ్డి చెప్పారు. గురువారం ఆయన బరంపేట విద్యుత్‌ కార్యాలయంలో పల్నాడు జిల్లా సర్కిళ్లపై సమీక్ష నిర్వహించారు. అనంతరం మీడియాతో మాట్లాడుతూ ఆర్‌డీఎస్‌ఎస్‌ పనులు, రెవెన్యూ కలెక్షన్లు పెంపుదల, పీఎం సూర్య ఘర్‌లపై సమీక్ష చేసి లక్ష్యాలు నిర్దేశించామన్నారు. వ్యవసాయ పంపు సెంట్ల కనెక్షన్ల కోసం రెండు వేల దరఖాస్తులు పెండింగ్‌లో ఉన్నాయని, వచ్చే మూడు నెలల వ్యవధిలో రైతులందరికి ఆ సర్వీసులు అందజేయాలని అధికారులను ఆదేశించామని చెప్పారు. లో ఓల్టేజ్‌, అధిక లోడులు ఉన్న ప్రాంతాల్లో బేస్‌మెంట్లు వేసి అధిక ట్రాన్స్‌ఫార్మర్ల ఏర్పాటుకు చర్యలు తీసుకుంటున్నట్లు తెలిపారు జిల్లా విద్యుత్‌ శాఖాధికారి పి.విజయకుమార్‌, ఈఈ సీహెచ్‌ రాంబొట్లు పాల్గొన్నారు.