బాధ్యతగా విధులు నిర్వర్తించండి

రాయచూరు రూరల్‌: ప్రజా సమస్యలపై ఎప్పటికప్పుడు స్పందిస్తూ.. బాధ్యతగా విధులు నిర్వర్తించాలని ధార్వాడా జిల్లా అధికారి ఆర్‌.స్నేహల్‌ సూచించారు. ఆదివారం జిల్లా అధికారి కార్యాలయంలో అధికారులతో సమావేశం నిర్వహించారు. ఈ సందర్భంగా ఆమె మాట్లాడుతూ.. విధి నిర్వహణలో అలసత్వం తగదన్నారు. సమయపాలన పాటిస్తూ సేవలు అందించాలని సూచించారు. ధార్వాడా జిల్లా కళలు, సాహిత్యం, సంగీతం, విద్య, చిత్రకళల్లో ప్రసిద్ధి చెందిందన్నారు. జిల్లా అభివృద్ధికి తోడు జిల్లా గౌరవాన్ని పెంపొందించాలని సూచించారు. వ్యక్తిగత కారణాలతో ప్రజలను నిరక్ష్యం చేయడం తగదన్నారు. ప్రజా సమస్యలపై త్వరితగతిన స్పందించాలని పేర్కొన్నారు. ప్రభుత్వ సంక్షేమ పథకాలను ప్రజలకు అందేలా చర్యలు తీసుకోవాలని ఆదేశించారు.

జానపద వాహిని

ఊరేగింపు

హొసపేటె: హంపీ ఉత్సవాల్లో చివరి రోజైన ఆదివారం సాయంత్రం ఉద్దాన వీరభద్రేశ్వర ఆలయం వరకు జానపద వాహిని ఊరేగింపు జరిగింది. శోభాయాత్రలో ఎమ్మెల్యే హెచ్‌ఆర్‌ గవియప్ప జిల్లా కలెక్టర్‌ కవితా ఎస్‌ మన్నికేరితో పాటు ప్రముఖులు పాల్గొని నాదదేవి భువనేశ్వరి దేవిని దర్శించుకుని పూజలు చేశారు. జానపద వాహిని కళా బృందాల ఊరేగింపు దేశంలోని గ్రామీణ ప్రాంతాల సాంస్కృతిక వైభవాన్ని చాటిచెప్పింది. మా భువనేశ్వరి దేవిని జానపద కళా రూపాల్లో ఊరేగించారు. ఈ ఊరేగింపులో వుడ్‌విండ్స్‌, వీరోచిత నృత్యం, పగటిపూట వేషధారణ, సింథోల్‌ నృత్యం, నంది జెండా, ట్రంపెట్‌ వాయించడం, హక్కిపిక్కి నృత్యం, ఎలుగుబంటి పండుగ, పురవంటికే, పూజ నృత్యం, నగరి లంబానీ సర్కిల్‌, కంసాలే, చందేవాద్య, సోమన నృత్యం, గొరవర నృత్యం, కళా బృందాలు ఉన్నాయి. కార్యక్రమంలో సబ్‌ డివిజనల్‌ ఆఫీసర్‌ వివేక్‌, తహసీల్దార్‌ శృతి, స్థానిక నాయకులు పాల్గొన్నారు.

సరళంగా

కవిత్వ రచన

హొసపేటె: ‘ఆధునిక యుగపు యువ కవులు సామాన్యుల సమస్యలను వినిపించే గొంతుకగా మారాలి. సాహిత్య వారసత్వంలో నమోదు కాని వీధి కార్మికుల జీవితాలను కవితల్లో వ్యక్తీకరించాలి. వారి కథలను చెప్పాలి’ అని సీనియర్‌ రచయిత ఏఎం మదారి సూచించారు. హంపీ ఉత్సవాల్లో భాగంగా ఆదివారం విరుపాక్షేశ్వర వేదికలో యువకవి సమ్మేళనం నిర్వహించారు. ఈ సందర్భంగా ఆయన మాట్లాడుతూ.. కవిత్వ రచనకు అర్థవంతమైన భాష, శైలి, అలంకారిక భాష ముఖ్యమని తెలిపారు. యువ కవులు వీటిని విస్మరించకూడదని సూచించారు. కవిత్వం మనస్సు భారాన్ని తగ్గించుకోవడానికి, మానసిక ఆరోగ్యాన్ని కాపాడుకోవడానికి ఒక మార్గమని అభిప్రాయపడ్డారు. కవులు, కళాకారులు, రచయితలు ఆత్మగౌరవంతో జీవించాలని తెలిపారు. అధికారంలో ఉన్నవారి తప్పులను ప్రశ్నించే నైతికతను కలిగి ఉండాలన్నారు.

పూజకు యత్నించిన

పలువురు అరెస్ట్‌

హుబ్లీ: కలబుర్గి బహుమని కోట ఆవరణలోని ఆలయంలో మహాశివరాత్రి సందర్భంగా పూజకు అనుమతి తీసుకోకుండా సదరు కోటలో ప్రవేశించి పూజ చేయడానికి ప్రయత్నించారు. ఎస్‌ఐ నియామకాల అక్రమ సూత్రాధారి దివ్య ఆగరిగితో పాటు పలువురిని పోలీసులు అదుపులోకి తీసుకుని పోలీస్‌ స్టేషన్‌కు తరలించారు. పూచీకత్తు తీసుకున్న అనంతరం విడుదల చేశారు.

బాధ్యతగా విధులు నిర్వర్తించండి

బాధ్యతగా విధులు నిర్వర్తించండి

బాధ్యతగా విధులు నిర్వర్తించండి