నాన్నా... నీ మనసే వెన్న

నాన్నా... నీ మనసే వెన్న

ఫాదర్స్‌ డే రోజునే ఉద్యోగంలోకి..

కపిలేశ్వరపురం మండలం అచ్యుతాపురం గ్రామానికి చెందిన పాలచర్ల అమ్మిరాజు స్థానిక వ్యవసాయ సహకార సంఘంలో చిరుద్యోగి. తన భార్య సునీతతో కలసి తన ఇద్దరు పిల్లలను ప్రణాళికాబద్ధంగా చదివించారు. రోజూ న్యూస్‌ పేపర్‌లో ప్రచురితమైన విజయం సాధించిన వారి కథనాలను పిల్లలతో చదివించేవారు. అంచెలంచెలుగా పిల్లలు ఎదుగుతూ పెద్ద ప్యాకేజీలతో గూగుల్‌లో ఉద్యోగులయ్యారు. పెద్ద కుమారుడు శ్రీవినోద్‌ ఎంసెట్‌లో 289వ ర్యాంకు, గేట్‌లో 240వ ఆల్‌ ఇండియా ర్యాంక్‌ సాధించాడు. ఐఐటీ చైన్నెలో ఎంటెక్‌ కంప్యూటర్‌ సైన్స్‌ పూర్తి చేసి, అక్కడే క్యాంపస్‌ ప్లేస్‌మెంట్‌లో సామ్‌సంగ్‌ రీసెర్చ్‌ బెంగళూరుకు ఎంపికై రెండేళ్లపాటు రూ.22 లక్షల ఏడాది ప్యాకేజీలో ఉద్యోగం చేశాడు. 2023 సెప్టెంబర్‌లో గూగుల్‌ సంస్థలో రూ.50 లక్షల ప్యాకేజీకి ఎంపికై ఉద్యోగం చేస్తున్నాడు. చిన్న కుమారుడు శ్రీసత్యనవీన్‌ జేఈ మెయిన్స్‌లో 1924వ ఆల్‌ ఇండియా ర్యాంక్‌ సాధించాడు. మ్యాథ్స్‌, ఫిజిక్స్‌లలో 100కి 100 మార్కులు రావడం అతని ప్రత్యేకత. మెయిన్స్‌ ఆధారంగా ఎన్‌ఐటీ వరంగల్‌లో బీటెక్‌ కంప్యూటర్‌ సైన్స్‌ పూర్తి చేశాడు. అక్కడే క్యాంపస్‌ ప్లేసమెంట్‌లో గూగుల్‌కి ఎంపికై రూ. 44 లక్షల ఏడాది ప్యాకేజీకి ఎంపికయ్యాడు. తండ్రి ప్రోత్సాహంతో ఉన్నత స్థితికి చేరుకున్న శ్రీసత్యనవీన్‌ ఫాదర్స్‌ డే రోజునే గూగుల్‌లో ఉద్యోగంలో చేరుతుండటం విశేషం. తాము ఇలా స్థిరపడడానికి తన తండ్రి బాటలు వేశారని ఆ కుమారులు అంటున్నారు.

ఫ నడిపించే దైవం ఆయనే

ఫ కుటుంబానికి వెలుగునిచ్చే సారథి

ఫ నేడు ఫాదర్స్‌ డే

కపిలేశ్వరపురం/ బిక్కవోలు: వారధి లేకుండా నదిని దాటలేం... సారథి లేకుండా రథం నడపలేం.. ప్రతి కుటుంబానికి ఆ వారధి, సారథి నాన్నే. పిల్లలు తప్పటడుగులు వేసే వయసు నుంచి వారి వేలు పట్టుకుని నడక నేర్పి లోకాన్ని చూపే ప్రతి అడుగులోనూ నీడలా ఉండే దైవం నాన్న. అలాంటి నాన్న కన్నీటి కష్టాన్ని కనురెప్పల మాటున దాచుకుంటాడు. తాను చిరిగిన చొక్కా అయినా వేసుకోవడానికి ఇష్టం పడతాడు కానీ తన పిల్లలకు మంచి దుస్తులు కొని ఇవ్వాలని ఆరాటపడుతుంటాడు. గుండెల్లో పెట్టుకుని పెంచి పెద్ద చేసి తన పిల్లలను ఉన్నత స్థాయికి చేర్చే త్యాగశీలుడు. మాట కాస్తా కటువుగా ఉన్నా మనసు వెన్నే.. శనివారం అంతర్జాతీయ తండ్రుల దినోత్సవం సందర్భంగా, చిన్నారులు, నేటి యువతకు తమ తండ్రి పట్ల ఉండే అనుబంధం గురించి సాక్షి ప్రత్యేక కథనం ఇది.