బీఆర్‌ఎస్‌ అభ్యర్థులు కొలిక్కి..!

● అభ్యర్థుల ఎంపికలో ప్రధానంగా పార్టీ, తమ కుటుంబంపై విశ్వాసం చూపుతున్న నాయకులకు ప్రాధాన్యం ఇవ్వాలనే ఆలోచనలో ఎమ్మెల్యే సంజయ్‌ ఉన్నట్లు తెలిసింది. ఇందులో భాగంగా పార్టీకి చెందిన పలువురు తాజామాజీలకు తిరిగి మరోసారి అవకాశం ఇవ్వాలని నిర్ణయించినట్లు సమాచారం. ● వీరిలో మార్గం లక్ష్మీ (ఒకటో వార్డు), అంగడి పురుషోత్తం(నాలుగో వార్డు), కిషోర్‌ (ఆరో వార్డు), మోరెపు గంగాధర్‌ (తొమ్మిదో వార్డు), కొమొరెడ్డి జ్యోతి(11వవార్డు), ఎనగందుల వనజ(17వార్డు), వుజ్జగిరి లక్ష్మీ(20వార్డు), భీమనాతి భవాని(21), ఒజ్జెల బుచ్చిరెడ్డి(23వార్డు) ఉన్నట్లు పార్టీ వర్గాలు చెబుతున్నాయి. ● తాజామాజీలైనా వీరి స్థానంలో రిజర్వేషన్లను పరిగణనలోకి తీసుకొని తిరిగి వారినిగానీ, వారి కుటుంబ సభ్యులనుగాని బరిలోకి దించనున్నట్లు తెలిసింది. ● గత ఎన్నికల్లో 4వార్డు (ఎస్టీ స్థానం) నుంచి గెలుపొందిన అంగడి పురుషోత్తంకు ఈసారి అక్కడ రిజర్వేషన్‌ కలిసి రాలేదు. దీంతో ఎస్టీకి కేటాయించిన 22వార్డు నుంచి పోటీ చేయనున్నట్లు సమాచారం. ● తాజామాజీలు కాకుండా 19వార్డు నుంచి ఆకుల ప్రవీణ్‌, 24వార్డు నుంచి మార్కెట్‌ కమిటీ మాజీ వైస్‌చైర్మన్‌ పూదరి సుధాకర్‌గౌడ్‌ కుటుంబానికి టికెట్లను ఖరారు చేసినట్లు తెలిసింది. ● గతంలో బీఆర్‌ఎస్‌ నుంచి కౌన్సిలర్లుగా గెలిచిన పిప్పెర లతరాజేశ్‌, చెట్లపల్లి లక్ష్మీరాజేశ్వర్‌గౌడ్‌, మర్రి సహాదేవ్‌ అసెంబ్లీ ఎన్నికల తర్వాత కాంగ్రెస్‌ తీర్థం పుచ్చుకున్నారు. ధ్యావనపల్లి వరలక్ష్మీ భర్త, పద్మశాలీ సంఘం పట్టణాధ్యక్షుడు రాజారాం ఇటీవల హస్తం గూటికి చేరారు. ● వారి వార్డులపై ప్రత్యేక దృష్టి పెట్టిన ఎమ్మెల్యే.. వాటిల్లో బీఆర్‌ఎస్‌ ఎలాగైనా గెలవాలనే పట్టుదలతో ఉన్నారు. ఈ నేపథ్యంలో ఆయా వార్డుల్లో బలమైన అభ్యర్థుల కోసం తీవ్ర కసరత్తు జరుపుతున్నారు. ● పార్టీలో చేరికల విషయంలోనూ ఆచీతూచి వ్యవహరిస్తున్నారు. వార్డుల్లో క్లీన్‌ ఇమేజ్‌ ఉన్న వారికే ‘కారు’లో ఎక్కడానికి అవకాశం ఇస్తున్నారు. ● 12వార్డు నుంచి ఓ ప్రైవేట్‌ కళాశాల కరస్పాండెంట్‌ అయినా రాజేశ్వర్‌గౌడ్‌, హారిక దంపతులు ఆదివారం ఎమ్మెల్యే సమక్షంలో బీఆర్‌ఎస్‌ తీర్థం పుచ్చుకున్నారు. ఆ వార్డు నుంచి హారికకు టికెట్‌ ఇవ్వనున్నట్లు తెలిసింది.