బహిరంగ ప్రదేశాల్లో బయోవ్యర్థాలు

● నిబంధనలు పాటించని నిర్వాహకులు ● ప్రజల ప్రాణాలతో చెలగాటం ● పట్టించుకోని అధికారులు ● ఆస్పత్రులు, ఫస్ట్‌ ఎయిడ్‌ క్లినిక్‌ల్లో వినియోగించిన సిరంజీలు, సూదులు, మాస్క్‌లు, చేతి గ్లౌజులు, సైలెన్‌ బాటిళ్లు, గాయాలకు డ్రెస్సింగ్‌ చేసిన దూది, తొలగించిన అవయవాలు తదితర వాటిని బయో వ్యర్థాలుగా పరిగణిస్తారు. ● వీటిని బహిరంగ ప్రదేశాల్లో పడేయకుండా ఉండడానికి కాలుష్య నియంత్రణ మండలి ప్రత్యేకంగా ఏర్పాటు చేసిన బయో వేస్ట్‌ మేనేజ్‌మెంట్‌ సంస్థలకు అప్పగించాల్సి ఉంటుంది. ● ఇందుకు ఆ సంస్థకు ఆస్పత్రుల స్థాయిని బట్టి ఫీజును చెల్లించాల్సి ఉంటుంది. ● ఫీజు చెల్లించే ఆసుపత్రుల నుంచి సదరు సంస్థ వాహనాల ద్వారా వ్యర్థాలను సేకరిస్తుంది. అ తర్వాత వాటిని కాల్చి భూమిలో పాతి పెడుతుంది. ఈ ప్రక్రియ వల్ల ప్రజల ప్రాణాలకు ముప్పు కలిగే అవకాశముండదు. ● పట్టణంలో ఉన్న ప్రైవేట్‌ ఆస్పత్రులు చాలా వరకు వ్యర్థాలను బయో వేస్ట్‌ మేనేజ్‌మెంట్‌ సంస్థకే అందిస్తుండగా.. ఫస్డ్‌ ఎయిడ్‌ క్లినిక్‌లు నిర్వహిస్తున్న ఆర్‌ఎంపీలు మాత్రం ఇందుకు భిన్నంగా వ్యవహరిస్తున్నారు. ● వ్యర్థాలను మున్సిపల్‌ ఆటోల్లో గానీ, బహిరంగ ప్రదేశాల్లో గానీ పడేస్తున్నారు. ● ఆటోల్లో వేసే వ్యర్థాలు శివారులో ఉన్న డంపింగ్‌ యార్డుకు చేరుతాయి. ● బహిరంగ ప్రదేశాల్లో ఈ వ్యర్థాలను వేయడం ద్వారా పలు రకాల వైరస్‌లు వ్యాప్తి చెంది ప్రజలు వ్యాధుల బారిన పడే అవకాశముంటుంది. ● దీనిని దృష్టిలో పెట్టుకుని వ్యర్థాలను బహిరంగ ప్రదేశాల్లో పడేయకుండా కాలుష్య నియంత్రణ మండలి, మున్సిపల్‌ అధికారులు తగిన చర్యలు తీసుకోవాల్సి ఉంటుంది. ● అయితే ఈ రెండు శాఖల అధికారులు ఈ విషయంలో నిర్లక్ష్యంగా వ్యవహరిస్తుండడంతో బయో వ్యర్థాలను విచ్చలవిడిగా పడేస్తున్నారు. ● ఆయా శాఖల అధికారులు స్పందించి బయో వ్యర్థాలపై నిబంధనలు పాటించని వారిపై కఠిన చర్యలు తీసుకోవాలని ప్రజలు కోరుతున్నారు.