హీట్‌కు హాట్ సొల్యూషన్: ఇదిగో కూల్ గ్యాడ్జెట్లు!

వేసవి వచ్చిందంటే బయట అడుగు పెడితే చాలు, సూర్యుడు తన వేడి గాలిని ముఖంపై కొడుతూ ‘ఇంట్లోనే ఉండు’ అని హెచ్చరిస్తూనే ఉంటాడు. కాని, టెక్నాలజీ తెచ్చిన ఈ చిన్న గ్యాడ్జెట్లు, సూర్యుడు తన వేడి ఎంత పెరిగినా ‘ఊఫ్‌’ నుంచి ‘ఆహా!’గా మార్చేస్తాయి.

ఫోనుకి బుజ్జి ఏసీ!
సమ్మర్‌లో గేమ్స్‌ ఆడుతున్నప్పుడు లేదా వీడియోలు చూస్తున్నప్పుడు మీ ఫోన్‌ వేడి పెనంలా మారిపోతుందా? అయితే మీ ఫోన్ చల్లబరచడానికి వచ్చేసింది ఈ మొబైల్‌ కూలింగ్‌ ప్యాడ్‌! ఇది మామూలు ఫ్యాన్‌ కాదు, ఇందులో ఉన్న అడ్వాన్స్డ్ సెమీ కండక్టర్‌ టెక్నాలజీ మీ ఫోన్‌ టెంపరేచర్‌ను కేవలం సెకన్లలోనే తగ్గించేస్తుంది. 

అంటే బయట ఎండలు మండిపోతున్నా, మీ ఫోన్‌ మాత్రం వింటర్‌ వాతావరణంలో ఉన్నట్టే చిల్‌ అవుతుంది! దీనికి ఉన్న ఎల్‌ఈడీ డిస్‌ప్లే ఫోన్‌ ఎంత చల్లగా ఉందో ఎప్పటికప్పుడు చూపిస్తుంది. పైగా ఇందులోని మ్యాగ్నెట్‌ ఫీచర్‌ వల్ల ఫోన్‌ వెనుక సులభంగా అతుక్కుపోతుంది, మీరు గంటల తరబడి గేమింగ్‌ చేసినా లేదా లైవ్‌ స్ట్రీమింగ్‌ చేసినా ఫోన్‌ హ్యాంగ్‌ అవ్వదు, బ్యాటరీ కూడా వేడెక్కదు. ఆండ్రాయిడ్‌ లేదా ఐఫోన్‌.. ఏదైనా సరే, సెట్‌ అయిపోతుంది. ధర రూ. 700 మాత్రమే!

మ్యాజిక్‌ గ్లాసెస్‌!
ఫోన్‌ చూసి చూసి మీ కళ్లు ‘ఫ్రై’ అయిపోతున్నాయా? బయటకి వెళ్దామంటే సూర్యుడు సెగలతో సినిమా చూపిస్తున్నాడా? ఇలా ఒకేసారి కళ్లకు రక్షణ, మైండ్‌కి రిలాక్సేషన్‌ ఇచ్చేందుకు వచ్చేసింది ఈ స్మార్ట్‌ బ్లూటూత్‌ గ్లాసెస్‌! ఇందులో ఇన్‌–బిల్ట్‌ స్పీకర్లు కూడా ఉన్నాయి. అంటే మీరు కళ్లజోడు పెట్టుకుంటే చాలు, పక్కన ఎవరికీ వినిపించకుండా మీ చెవుల్లో మ్యూజిక్‌ వినిపిస్తుంది.

ఫోన్‌ తీయకుండానే కాల్స్‌ కూడా మాట్లేడేయొచ్చు. సాంగ్స్‌ మార్చుకోవచ్చు. ఇక ఇందులో ఉన్న ఫోటోక్రోమిక్‌ లెన్సులు ఇంట్లో ఉన్నప్పుడు బ్లూ లైట్‌ నుంచి, అదే అడుగు బయట పెట్టగానే సెకన్లలో కూలింగ్‌ గ్లాసెస్‌లా మారి కళ్లకు రక్షణ ఇస్తాయి. పైగా వర్షం పడినా, చెమట పట్టినా ఏమీ కాకుండా దీనికి వాటర్‌ రెసిస్టెన్స్ కూడా ఉంది. ధర రూ. 1,200 మాత్రమే!

మంచు కురిపించే గొడుగు!
బయట ఎండలు మండిపోతుంటే.. గొడుగు పట్టుకున్నా సెగలు తగులుతూ చిరాగ్గా ఉందా? అయితే మీ పర్సనల్‌ ఏసీలాంటి ఈ బీఎన్‌ఎఫ్‌ సన్‌ అంబ్రెల్లాని చూస్తే మీరు ఫిదా అయిపోతారు! దీని లోపల ఒక బుజ్జి ఫ్యాన్‌ ఉండటమే కాకుండా, ఇది చల్లని నీటిని మంచులా చల్లుతుంది. అంటే ఎండలో వెళ్తున్నా, మీ గొడుగు కింద ఒక చిన్న మంచువాన కురుస్తుంది. కేవలం నాలుగు ఏఏ బ్యాటరీలు ఉంటే చాలు.. గాలికి తిరగబడని విండ్‌ప్రూఫ్‌ డిజైన్‌తో, అటు గాలిని.. ఇటు మంచు జల్లులను మీకు అందిస్తుంది. ఫ్రెండ్స్‌కి గిఫ్ట్‌ ఇవ్వడానికి కూడా ఇది ఒక అదిరిపోయే ఆప్షన్‌. ధర రూ. 5,900.