రియల్‌ అండ్‌ రీల్‌ హీరోస్‌..

రియల్‌ అండ్‌ రీల్‌ హీరోస్‌..

ఇల్లెందు/కారేపల్లి/పాల్వంచ: ఇల్లెందు ఎమ్మెల్యేగా ఐదుసార్లు గెలిచినా అతి సాధారణ జీవనం గడుపుతున్న గుమ్మడి నర్సయ్య జీవిత చరిత్ర ఆధారంగా సినిమా రూపుదిద్దుకోనుంది. ‘గుమ్మడి నర్సయ్య’ పేరుతో ప్రవల్లిక ఆర్ట్స్‌ క్రియేషన్స్‌ ఆధ్వర్యాన నల్లా సురేష్‌రెడ్డి నిర్మాతగా కామారెడ్డికి చెందిన పరమేశ్వర హివ్రాలె దర్శకత్వంలో సినిమా చిత్రీకరించనున్నారు. సినిమా షూటింగ్‌ పాల్వంచలో శనివారం మొదలుకానుండగా.. గుమ్మడి నర్సయ్య పాత్ర పోషిస్తున్న కన్నడ సూపర్‌స్టార్‌ డాక్టర్‌ శివరాజ్‌కుమార్‌ శుక్రవారం జిల్లాకు చేరుకున్నారు. ఈ సందర్భంగా గుమ్మడి స్వగ్రామమైన ఖమ్మం జిల్లా కారేపల్లి మండలం టేకులగూడేనికి శివరాజ్‌కుమార్‌ – గీత దంపతులు వచ్చారు. ఆయనతో సమావేశమైన శివరాజ్‌కుమార్‌.. గుమ్మడి జీవనశైలి, ఎన్నికల వేళ అవలంబించిన విధానాలు, ప్రజల్లో అభిమానం తదితర వివరాలు తెలుసుకున్నారు. కాగా చిత్ర నిర్మాత నల్లా సురేష్‌రెడ్డి పాల్వంచలో, మాస్‌లైన్‌ రాష్ట్ర నాయకురాలు చండ్ర అరుణ ఇల్లెందులో సమావేశం నిర్వహించి చిత్ర విశేషాలు వెల్లడించారు. సమావేశాల్లో సినిమా దర్శకుడు పరమేశ్వర హివ్రాలెతో పాటు, మాస్‌లైన్‌ రాష్ట్ర కార్యదర్శిపోటు రంగారావు, యాకుబ్‌షావలీ, మల్లెల వెంకటేశ్వర్లు, పిల్లి మల్లేష్‌, వేముల గురునాథం, కొత్తపల్లి రఘు, నరేష్‌, సందుపట్ల శ్రీనివాసరెడ్డి, రామకృష్ణారెడ్డి, వెంకటరెడ్డి, మెట్టు శ్రీనివాసరెడ్డి, శ్రీను, నర్సింహారెడ్డి, ప్రశాంత్‌ తదితరులు పాల్గొన్నారు.