సాధారణంగా చెట్టెక్కే టాలెంట్ చిరుతపులికే సొంతం. కానీ ఇక్కడ సింహానికి ఆ టాలెంట్‌ను చూపించాల్సిన పరిస్థితి వచ్చింది. ఎందుకంటే.. దిగితే దున్నలు దున్నేస్తాయని భయం. కెన్యాలోని మాసాయి మరా జాతీయ పార్కులో ఈ మృగరాజు మాంచి ఆకలి మీద వేటకు బయల్దేరింది. దారిలో అడవి దున్నలు కనిపించాయి. దూడ వాటికి కాస్త దూరంగా ఉండటంతో దాన్ని లటుక్కున పట్టుకుని చటుక్కున పారిపోదామనుకుంది.
 
 కానీ సీన్ రివర్సైంది. అడవి దున్నలన్నీ సింహం వైపు దూసుకొచ్చాయి. సింహం దౌడ్ అంటూ పరుగు తీసింది. దున్నలు వదిలితేగా.. దీంతో చేసేది లేక.. చివరికి ఇలా చెట్టెక్కెంది. ఎంతైనా అది చిరుతపులి కాదు కదా.. దీంతో ఎక్కువసేపు ఉండలేక.. కిందకు దూకి.. కాళ్లకు పనిచెప్పింది. ఈ దృశ్యాలను చార్లెస్ కొమిన్ అనే మాజీ సైనికాధికారి తన కెమెరాలో బంధించారు.


 ఈ ఫొటోలో ఎలాంటి ట్రిక్కూ లేదు. మీరు చూస్తున్నది నిజమే. సాధారణంగా చిరుత ఎదురైతే ఏ జంతువైనా కాళ్లకు బుద్ధి చెప్పడం ఖాయం. కానీ ఇక్కడ సీన్ రివర్స్ అయింది. ఓ అడవి మృగాల గుంపుపై దాడికి దిగిన ఈ చిరుతను చూసి ఇతర జంతువులన్నీ పారిపోయాయి. కానీ ఈ దుప్పి మాత్రం ఊరుకోలేదు.
  
 వెంటనే ఎదురు దాడికి దిగింది. తన కొమ్ములతో చిరుతను కుమ్మేయడానికి దూసుకెళ్లింది. దీంతో కంగుతిన్న చిరుత..వెంటనే పలాయనం చిత్తగించింది. ఈ అరుదైన దృశ్యం కెన్యాలోని మసాయ్ మారా నేషనల్ రిజర్వ్ పార్కులో కనిపించింది. ఈ దృశ్యాలను మనోజ్ షా అనే వన్యప్రాణి ఫోటో గ్రాఫర్ తన కెమెరాలో బంధించారు.