ఐపీఎల్‌ ఫైనల్‌ ‘ఫిక్స్‌’ చేశారా?

సాక్షి, ముంబై: ఇండియన్‌ ప‍్రీమియర్‌ లీగ్‌(ఐపీఎల్‌) తాజా సీజన్‌లో ఫైనల్‌లో చైన్నై సూపర్‌కింగ్స్‌- కోల్‌కతా నైట్‌ రైడర్స్‌ ఢీకొట్టబోతున్నాయి.. అదేంటీ కోల్‌కతా నైట్‌రైడర్‌ ఎపుడు, ఎలా ఫైనల్‌కి వెళ్లిందనుకుంటున్నారా? హాట్‌ స్టార్‌ రూపొందించిన ఓ వీడియో ఇపుడు సోషల్‌ మీడియాలో వైరల్‌ అవుతోంది. ఆ వీడియో చూస్తే ఇదే సందేహం వస్తుంది. ఇంతకీ సదరు వీడియోలో ఏముందంటే.. ఈ ఏడాది ఐపీఎల్‌ ఫైనల్లో చెన్నై సూపర్‌కింగ్స్‌, కోల్‌కతా నైట్‌రైడర్స్‌ తలపడుతున్నట్టు రూపొందించారు. 

క్వాలిఫయర్‌-1లో విజయం సాధించిన చెన్నై సూపర్‌కింగ్స్‌ జట్టు మాత్రమే ఇప్పటి వరకు ఫైనల్‌ చేరుకుంది. శుక్రవారం కోల్‌కతా నైట్‌రైడర్స్‌- సన్‌రైజర్స్‌ హైదరాబాద్‌ జట్ల మధ్య క్వాలిఫయర్‌-2 మ్యాచ్‌ జరుగనుంది. ఈ మ్యాచ్‌లో గెలిచిన జట్టు ఫైనల్స్‌కు చేరుకుని.. వాంఖేడే స్టేడియంలో ఆదివారం జరిగే ఫైనల్లో చెన్నై సూపర్‌ కింగ్స్‌తో తలపడనుంది. అలాంటపుడు క్వాలిఫయర్‌-2 మ్యాచ్‌ జరగకుండానే హాట్‌స్టార్‌ కోల్‌కతా జట్టు  ఫైనల్‌ చేరినట్లు వీడియో రూపొందించడంపై సన్‌రైజర్స్‌ హైదరాబాద్‌ అభిమానులతో పాటు నెటిజన్లు మండిపడుతున్నారు. రెండవ ఫైనలిస్ట్‌ కోల్‌కతా అని ఎలా చెబుతారని, ఇదంతా మ్యాచ్‌ ఫిక్సింగ్‌ అని విపరీతంగా కామెంట్లు పెడుతూ విమర్శలు చేస్తున్నారు.