కమాండో బందోబస్త్‌

సూర్య

మలయాళ నటుడు మోహన్‌లాల్‌కు బందోబస్త్‌ ఏర్పాటు చేశారట హీరో సూర్య. కన్‌ఫ్యూజ్‌ కావొద్దు. ఇదంతా తమిళ సినిమా ‘కాప్పాన్‌’ గురించే. ‘వీడొక్కడే, బ్రదర్స్‌’ వంటి చిత్రాల తర్వాత సూర్య హీరోగా కేవీ ఆనంద్‌ దర్శకత్వంలో తెరకెక్కిన తమిళం చిత్రం ‘కాప్పాన్‌’. ఈ చిత్రంలో సాయేషా కథానాయికగా నటించారు. లైకా ప్రొడక్షన్స్‌ పతాకంపై సుభాస్కరన్‌ నిర్మించారు. ఈ సినిమాకు తెలుగులో ‘బందోబస్త్‌’ అనే టైటిల్‌ను ఖరారు చేశారు. ప్రముఖ దర్శకుడు రాజమౌళి శుక్రవారం ఈ టైటిల్‌ని అనౌన్స్‌ చేశారు. సూర్య, సముద్రఖని ఈ సినిమాలో ఎన్‌ఎస్‌జీ కమాండోలుగా నటించారు. మోహన్‌లాల్‌ ప్రధానమంత్రి పాత్రలో నటించారని తెలిసింది. బొమన్‌ ఇరానీ, ఆర్య, నాగినీడు, పూర్ణ తదితరులు నటించిన ఈ సినిమా ఈ ఏడాది ఆగస్టులో విడుదల కానుంది.