జాతీయ రహదారిపై విడిది కేంద్రాలు

పర్యాటక రంగానికి అధిక ప్రాధాన్యత 

ఏలూరు (మెట్రో) : జిల్లాలో పర్యాటక రంగానికి అధిక ప్రాముఖ్యతనిచ్చి పర్యాటకులకు ఆహ్లాదకరమైన వాతావరణం కల్పించటమే కాకుండా వారికి వసతి, బోటింగ్, ఇతర సదుపాయాలు కల్పిస్తున్నట్టు కలెక్టర్‌ కాటంనేని భాస్కర్‌ చెప్పారు. శనివారం కలెక్టరేట్‌లో జిల్లా పర్యాటకాభివృద్ధి కౌన్సిల్‌ సమావేశానికి కలెక్టర్‌  అధ్యక్షత వహించారు. ఈ సందర్భంగా ఆయన మాట్లాడుతూ కొల్లేరు, గుడివాకలంకలతో పాటు గోష్పాదక్షేత్రం, వలంధరరేవు, రామగుండంపార్కు, శంభుని పార్క్, ఇతర స్థలాలను పర్యాటకులు వచ్చి తిలకించడానికి వీలుగా అన్ని సౌకర్యాలు కల్పిస్తున్నట్టు చెప్పారు. మొదటి, రెండు, మూడు ఫేజ్‌లలో రూ.361.8 లక్షలకు పరిపాలనామోదం ఇచ్చినట్టు చెప్పారు. మొదటి ఫేజ్‌లో  రూ.155.78 లక్షలు, రెండో ఫేజ్‌లో రూ.158.40 లక్షలు, మూడో ఫేజ్‌లో రూ.47.5 లక్షలు వివిధ పనులకు ఇవ్వడం జరిగిందని కలెక్టర్‌ చెప్పారు. కొల్లేరు సరస్సులో పక్షులు కూర్చొవడానికి వీలుగా పొడవాటి దిమ్మెలకు, పర్యాటకులకు వసతి సౌకర్యాలు నిమిత్తం రూ.86 లక్షలు పనులను వెంటనే ప్రారంభించాలని అటవీశాఖ డీఎఫ్‌వోను కలెక్టరు ఆదేశించారు. చించినాడ బ్రిడ్జి దగ్గర బోటింగ్‌ సదుపాయం, ఆకివీడు దగ్గర చేనేత పరిశ్రమాభివృద్ధి, ఎమ్యూజ్‌మెంట్‌ పార్క్‌ తదితర కార్యక్రమాల అభివృద్ధి పనులను వేగవంతం చేయాలన్నారు. సమావేశంలో టూరిజం శాఖ ఎగ్జిక్యూటివ్‌ ఇంజినీర్‌ శ్రీనివాస్, సెట్‌వెల్‌ ఇన్‌ చార్జి సీఈవో, డీఆర్‌డీఏ పీడీ కె.శ్రీనివాసులు, ఇరిగేషన్‌  ఈఈ శ్రీనివాస్, డీఎఫ్‌ఓ ఎన్‌ .నాగేశ్వరరావు, టూరిజం అధికారి పట్టాభి పాల్గొన్నారు.