IPL 2022: లక్నో సూపర్‌ జెయింట్స్‌పై ఆర్‌సీబీ ఘన విజయం

ఐపీఎల్‌ 2022లో ఆర్‌సీబీ అదరగొడుతుంది. లక్నో సూపర్‌ జెయింట్స్‌తో జరిగిన మ్యాచ్‌లో ఆర్‌సీబీ 18 పరుగుల తేడాతో ఘన విజయాన్ని సాధించింది. 182 పరుగుల లక్ష్యంతో బరిలోకి దిగిన లక్నో సూపర్‌ జెయింట్స్‌ నిర్ణీత 20 ఓవర్లలో ఎనిమిది వికెట్లు కోల్పోయి 163 పరుగులు మాత్రమే చేయగలిగింది. కృనాల్‌ పాండ్యా 42 పరుగులతో టాప్‌ స్కోరర్‌ కాగా.. కేఎల్‌ రాహుల్‌ 30, స్టోయినిస్‌ 24 పరుగులు చేశారు. ఆర్‌సీబీ బౌలర్లలో హాజిల్‌వుడ్‌ 4, హర్షల్‌ పటేల్‌ 2, సిరాజ్‌, మ్యాక్స్‌వెల్‌ చెరొక ఒక​ వికెట్‌ తీశారు.

ఆర్‌సీబీతో మ్యాచ్‌లో లక్నో సూపర్‌ జెయింట్స్‌ ఓటమి దిశగా పయనిస్తోంది. ప్రస్తుతం 7 వికెట్ల నష్టానికి 148 పరుగులు చేసిన లక్నో మ్యాచ్‌ గెలవాలంటే 10 బంతుల్లో 34 పరుగులు చేయాల్సి ఉంది.

11 ఓవర్లు ముగిసేసరికి లక్నో సూపర్‌ జెయింట్స్‌ 3 వికెట్ల నష్టానికి 88 పరుగులు చేసింది. కృనాల్‌ పాండ్యా 32, దీపక్‌ హుడా 9 పరుగులతో ఆడుతున్నారు. అంతకముందు 30 పరుగులు చేసిన కెప్టెన్‌ కేఎల్‌ రాహుల్‌ హర్షల్‌ పటేల్‌ బౌలింగ్‌లో కీపర్‌ కార్తిక్‌కు క్యాచ్‌ ఇచ్చి వెనుదిరిగాడు.

182 పరుగుల లక్ష్యంతో బరిలోకి దిగిన లక్నో సూపర్‌ జెయింట్స్‌ రెండో వికెట్‌ కోల్పోయింది. 6 పరుగులు చేసిన మనీష్‌ పాండే హాజిల్‌వుడ్‌ బౌలింగ్‌లో హర్షల్‌ పటేల్‌కు క్యాచ్‌ ఇచ్చి వెనుదిరిగాడు. ప్రస్తుతం 5 ఓవర్లో రెండు వికెట్ల నష్టానికి 33 పరుగులు చేసింది. అంతకముందు డికాక్‌ రూపంలో తొలి వికెట్‌ కోల్పోయింది.

లక్నో సూపర్‌ జెయింట్స్‌తో మ్యాచ్‌లో ఆర్‌సీబీ నిర్ణీత 20 ఓవర్లలో 6 వికెట్ల నష్టానికి 181 పరుగులు చేసింది, కెప్టెన్‌ డుప్లెసిస్‌ 96 పరుగులతో టాప్‌ స్కోరర్‌గా నిలవగా.. మ్యాక్స్‌వెల్‌ 23, షాబాజ్‌ అహ్మద్‌ 26 పరుగులు చేశారు. చివర్లో కార్తిక్‌ 8 బంతుల్లో 13 నాటౌట్‌గా మిగిలాడు. కాగా నాలుగు పరుగుల తేడాతో డుప్లెసిస్‌ సెంచరీ మిస్‌ చేసుకున్నాడు. లక్నో బౌలర్లలో దుశ్మంత చమీర, జాసన్‌ హోల్డర్‌ చెరో రెండు వికెట్లు తీయగా.. కృనాల్‌ పాండ్యా ఒక వికెట్‌ తీశాడు.

డుప్లెసిస్‌ పొరపాటు కారణంగా షాబాజ్‌ అహ్మద్‌(25) రనౌట్‌గా వెనుదిరగాల్సి వచ్చింది. ప్రస్తుతం ఆర్‌సీబీ 5 వికెట్ల నష్టానికి 138 పరుగులు చేసింది. డుప్లెసిస్‌ 68, దినేశ్‌ కార్తిక్‌ 1 పరుగుతో ఆడుతున్నారు.

10 ఓవర్లు ముగిసేసరికి ఆర్‌సీబీ 4 వికెట్ల నష్టానికి 87 పరుగులు చేసింది. డుప్లెసిస్‌ 31, షాబాజ్‌ అహ్మద్‌ 12 పరుగులతో ఆడుతున్నారు. అంతకముందు 10 పరుగులు చేసిన సుయాష్‌ ప్రభుదేశాయ్‌ కృనాల్‌ పాండ్యా బౌలింగ్‌లో హోల్డర్‌కు క్యాచ్‌ ఇచ్చి వెనుదిరిగాడు.

లక్నో సూపర్‌ జెయింట్స్‌తో మ్యాచ్‌లో ఆర్‌సీబీకి సరైన ఆరంభం లభించలేదు. 50 పరుగులకే మూడు వికెట్లు కోల్పోయింది. ఉన్నంతసేపు ధాటిగా ఆడిన మ్యాక్స్‌వెల్‌( 11 బంతుల్లో 23,3 ఫోర్లు, ఒక సిక్సర్‌) కృనాల్‌ పాండ్యా బౌలింగ్‌లో జాసన్‌ హోల్డర్‌కు క్యాచ్‌ ఇచ్చి వెనుదిరిగాడు. ప్రస్తుతం ఆర్‌సీబీ 7 ఓవర్లలో 3 వికెట్ల నష్టానికి 62 పరుగులు చేసింది. డుప్లెసిస్‌ 20, ప్రభుదేశాయ్‌ 10 పరుగులతో ఆడుతున్నారు.

ఆర్‌సీబీకి లక్నో సూపర్‌ జెయింట్స్‌ బౌలర్‌ దుశ్మంత చమీర తొలి ఓవర్లోనే గట్టిషాక్‌ ఇచ్చాడు. ఇన్నింగ్స్‌ తొలి ఓవర్‌ ఐదో బంతికి అనూజ్‌ రావత్‌(4)ను ఔట్‌ చేసి శుభారంభం ఇచ్చాడు. ఆ తర్వాత మరుసటి బంతికే కోహ్లిని గోల్డెన్‌ డక్‌గా పెవిలియన్‌ చేర్చాడు. ప్రస్తుతం 3 ఓవర్లలో రెండు వికెట్ల నష్టానికి 29 పరుగులు చేసింది. మ్యాక్స్‌వెల్‌ 16, డుప్లెసిస్‌ 6 పరుగులతో క్రీజులో ఉన్నారు.

ఐపీఎల్‌ 2022 సీజన్‌లో మంగళవారం ఆర్‌సీబీ, లక్నో సూపర్‌ జెయింట్స్‌ మధ్య ఆసక్తికర పోరు మొదలైంది. టాస్‌ గెలిచిన లక్నో సూపర్‌ జెయింట్స్‌ బౌలింగ్‌ ఎంచుకుంది. ఈ సీజన్‌లో ఇప్పటివరకు ఇరుజట్లు చెరో 6 మ్యాచ్‌లు ఆడి నాలుగు మ్యాచ్‌ల్లో గెలిచి సమానంగా ఉన్నాయి.

ఇరు జట్లు పాయింట్ల పరంగా (8) సమంగానే ఉన్నప్పటికీ మెరుగైన రన్‌రేట్‌ కారణంగా పాయింట్ల పట్టికలో ఆర్సీబీ (4వ స్థానం) కంటే లక్నోనే (3) ముందుంది.