రైతుల ఆందోళన..

● కోటపల్లి మండల కేంద్రంలోని పీఏసీఎస్‌లో యూరియా బస్తాలు పంపిణీ చేస్తున్నారనే విషయం తెలుసుకుని సోమవారం వేకువజాము నుంచే రెండు వేల మంది బారులు తీరారు. అధికారులు ఒక వ్యక్తి ఒకే బస్తా చొప్పున 600 మందికి పంపిణీ చేయగా.. మిగతా వారు తీవ్ర నిరాశతో వెనుదిరిగారు. ఎస్సై రాజేందర్‌ బందోబస్తు నిర్వహించారు. ● భీమారం మండల కేంద్రంలోని ఫర్టిలైజర్‌ దుకాణం వద్ద సోమవారం యూరియా కోసం రైతులు బారులు తీరారు. 444బస్తాలతో లారీ రాగా.. ఒక్కో రైతుకు ఒక్కో బస్తా మాత్రమే పంపిణీ చేయడంపై ఆగ్రహం వ్యక్తం చేశారు. చాలామంది రైతులకు యూరియా లభించలేదు. మండలంలోని కాజిపల్లి, భీమారానికి కలిపి 30టన్నుల యూరియా వచ్చిందని, ఇంకా రావాల్సి ఉందని మండల వ్యవసాయ అధికారి సుధాకర్‌ తెలిపారు. ● వేమనపల్లి మండలం సుంపుటం, ముల్కలపేట గ్రామాల్లో రైతులు యూరియా కోసం వేచి చూశారు. కొందరికే యూరియా బస్తాలు అందజేయగా మరికొందరు వెనుదిరిగారు. అవసరమైన సమయంలో యూరియా లేదంటూ అధికారులపై ఆగ్రహం వ్యక్తం చేశారు. ● దండేపల్లి మండలం గూడెంలో సోమవారం సహకార సంఘం తెరువక ముందే యూరియా కోసం వచ్చిన రైతులు పట్టాపాస్‌బుక్‌ల జిరాక్స్‌ ప్రతులు వరుసలో ఉంచారు. నెల్కివెంకటాపూర్‌ సహకార సంఘం వద్ద 200 బస్తాలు స్టాకు ఉండడంతో రైతులు బారులు తీరారు. రెండు గంటల్లో అయిపోవడంతో మూసివేశారు. సోమవారం సాయంత్రంకల్లా మరో 30 టన్నుల స్టాకును అందుబాటులో ఉంచినట్లు ఏవో అంజిత్‌కుమార్‌ తెలిపారు. ద్వారక, ముత్యంపేట రైతువేదికల వద్ద మంగళవారం మధ్యాహ్నం యూరియా అందుబాటులో ఉంటుందని పేర్కొన్నారు.