వరిలో సస్యరక్షణ చర్యలు

వరిలో సస్యరక్షణ చర్యలు

● అధిక వర్షాలకు

అప్రమత్తంగా ఉండాలి

కోస్గి: ఈ ఏడాది జిల్లాలో పలు ప్రాంతాల్లో వరి పంట అధిక మొత్తంలో సాగు చేశారు. అయితే ఇటీవల కురిసిన భారీ వర్షాలకు పంట పొలాల్లో నీరు నిల్వ ఉండటంతో చీడపీడలు, పురుగుల ఉధృతి పెరిగే ప్రమాదం ఉండటంతో రైతులు ఆందోళన వ్యక్తం చేస్తున్నారు. ఈ నేపథ్యంలో తెగుళ్లు, వివిధ రకాల పురుగులు ఆశించకుండా చేపట్టాల్సిన జాగ్రత్తలపై జిల్లా వ్యవసాయ శాఖ అధికారి జాన్‌ సుధాకర్‌ పలు సూచనలు వివరించారు.

తెగుళ్ల యాజమాన్యం

అగ్గి తెగులు: ఆకులపై నూలు కండె ఆకారంలో గోధుమరంగు మచ్చలు ఏర్పడి చివరి ఆకుల వరకు పూర్తిగా ఎండినట్లు కనిపిస్తాయి. పైరు పూతదశలో ఉన్నప్పుడు వెన్ను, మెడ భాగంలో తెగులు ఆశిస్తే వరికొమ్మ మెడ ఇరిగి తాలు గింజలు ఏర్పడతాయి.

నివారణ: కేజీ విత్తనానికి 4 గ్రాముల కార్బెండిజ్‌ కలిపి విత్తనశుద్ధి చేయాలి. ట్రై సైక్లోజోల్‌ 75 శాతం మందును 6 గ్రాములు లేదా ఎడిఫెన్‌ఫాస్‌ 1 మి.లీ. లీటర్‌ నీటిలో కలిపి పంటపై పిచికారి చేయాలి.

కాండం కుళ్లు తెగులు: కాండ ఏర్పడే దశ నుంచి పంట పాలు పోసుకునే వరకు వ్యాప్తి చెందే అవకాశం ఉంటుంది.

నివారణ: తెగులు సోకిన పొలంలో పరిశుభ్రత పాటించాలి. విత్తనశుద్ధి చేయాలి. తెగులు లక్షణాలను గుర్తిస్తే వాలిడామైసిన్‌ 2 మి.లీ. లేదా హెక్సాకోనోజల్‌ 2 మి.లీ. మోతాదులో లీటరు నీటికి కలిపి 15 రోజుకోసారి రెండుసార్లు పిచికారీ చేయాలి.

ఎండాకు తెగులు: తెగులు సోకిన పంటలో ఆకు అంచుల వెంబడి పసుపు రంగు మచ్చలు ప్రారంభమై చివరకు ఆకులు పూర్తిగా ఎండిపోతాయి.

నివారణ: ప్రాపికోనోజల్‌ 1 మి.లీ. లేదా హెక్సాకోనోజల్‌ 2 మి.లీ. లేదా వాలిడామైసిన్‌ 2 మి.లీ. మోతాదులో ఏదేని మందును లీటరు నీటిలో కలిపి పొలంలో నీరు మొత్తం తీసివేసి మొదళ్ల వద్ద తడిచేటట్లు పిచికారీ చేయాలి.

పొడ తెగులు, మానిపండు తెగులు: పంట పుష్పించే దశలో ఆశిస్తుంది. అండాశయం ఆకుపచ్చ రంగు ముద్దగా మారిన తర్వాత గింజలన్ని పసుపు రంగు ఉండల్లాగా మారి దిగుబడి తగ్గుతుంది.

నివారణ: హెక్సాకోనోజల్‌ 2 మి.లీ. లేదా ప్రాపికోనోజల్‌ 1 మి.లీ. లేదా వాలిడామైసిన్‌ 2 మి.లీ. మోతాదులో లీటరు నీటికి కలిపి పిచికారీ చేయాలి. అలాగే మోనోక్రోటోఫాస్‌ 2 మి.లీ. మోతాదులో లీటర్‌ నీటికి కలిపి పిచికారీ చేయాలి.

పురుగులు.. నివారణ చర్యలు

కాండం తొలిచే పురుగు: ఈ పురుగు సొకితే పిలకలు చనిపోతాయి. వెన్నులు తెల్ల కంకులుగా మారుతాయి. 5 శాతం పువ్వులు చనిపోయినట్లు గుర్తించిన వెంటనే సస్యరక్షణ చేపట్టాలి.

నివారణ క్లోరోఫైరిపాస్‌ 2.5 మి.లీ. లేదా మోనో క్రోటోపాస్‌ 1.6 మి.లీ. లేదా ఎసిఫెట్‌ 1.5 గ్రాములు లీటరు నీటికి కలిపి పిచికారీ చేయాలి.

ఉల్లికోడు: ఈ పురుగు సోకకముందే వరి పంట నాటిన 10 నుంచి 15 రోజుల వ్యవధి లో ఎకరాకు 10 కేజీల కార్బోప్యూరాన్‌ లేదా 6 కేజీల ఫోరేట్‌ గుళికల మందు వేయాలి.

సుడిదోమ/దోమపోటు: వరిలో దోమపోటు నివారణకు నారు నాటే సమయంలో ప్రతి 2 మీటర్లకు 20 సెం.మీ. బాటలు వదిలి నాటు వేసుకోవాలి. దోమపోటు, సుడిదోమ గుర్తించిన వెంటనే ఎసిఫేట్‌ 1.5 గ్రాములు లేదా ఇమిడాక్లోప్రైడ్‌ 2.2 మి.లీ. మోతాదులో లీటరు నీటికి కలిపి పిచికారీ చేయాలి.

పాడి–పంట ,జిల్లా వ్యవసాయాధికారి,

జాన్‌ సుధాకర్‌