ఐడీఎల్ ఘటనలో మరొకరి మృతి

హైదరాబాద్‌సిటీ: బాలానగర్‌లోని గల్ఫ్ ఆయిల్ కార్పొరేషన్ (పాత ఐడీఎల్)లో ఈనెల 23న జరిగిన పేలుడులో గాయపడ్డ మరో వ్యక్తి చికిత్స పొందుతూ శుక్రవారం మృతి చెందాడు. ఖైరతాబాద్ డివిజన్ న్యూసీఐబీ క్వార్టర్స్‌లో నివాసముండే కృష్ణస్వామి (59) ఆ రోజు జరిగి ప్రమాదంలో తీవ్రంగా గాయపడగా కంచన్‌బాగ్‌లోని డీఆర్‌డీఎల్ అపోలో ఆసుపత్రికి తరలించారు.

80 శాతం కాలిన గాయాలతో చికిత్స పొందుతున్న కృష్ణస్వామి ఆరోగ్య పరిస్థితి విషమించడంతో శుక్రవారం సాయంత్రం మృతి చెందాడు. ఈ విషయం తెలిసి ఖైరతాబాద్‌లోని న్యూసీఐబీ క్వార్టర్స్ పరిసరాల్లో విషాదఛాయలు అలుముకున్నాయి. మృతునికి భార్య లక్ష్మీబాయి, ఇద్దరు కుమారులు, ఒక కుమార్తె ఉన్నారు. కాగా, కృష్ణస్వామి మృతితో గల్ఫ్ ఆయిల్’ ప్రమాదంలో గాయపడి మృతి చెందిన వారి సంఖ్య నాలుగుకు చేరింది.