రూ.6.85 కోట్లు అక్కర్లేదా?

 చెన్నై, సాక్షి ప్రతినిధి:ఎన్నికల నేపథ్యంలో పట్టుబడిన రూ.6.85 కోట్లను తగిన ఆధారాలతో విడిపించుకునేందుకు ఎవ్వరూ రాలేదని రాష్ట్ర ఎన్నికల ప్రధానాధికారి ప్రవీణ్‌కుమార్ తెలిపారు. ఓటుకు నోటు విధానాన్ని అరికట్టేలా ప్రజల్లో చైతన్యం కలిగించేందుకు నటుడు కమల్‌హాసన్‌తో రూపొందించిన లఘుచిత్రాన్ని ఆయన శనివారం విడుదల చేశారు. మీడియా సమావేశంలో ఆయన మాట్లాడుతూ, ఎన్నికల తేదీ ప్రకటించిన నాటి నుంచి ఈనెల 14వ తేదీ వరకు వాహనాల తనిఖీలో రూ.6.85 కోట్ల నగదు పట్టుబడిందని తెలిపారు. ప్రభుత్వ అధికారులు, రాజకీయ పార్టీల నేతలు, ప్రజలు ఎవరైనా రూ.50 వేలకు మించి నగదు తీసుకెళుతుంటే తమ వెంట తగిన డాక్యుమెంట్లు తప్పనిసరిగా ఉంచుకోవాలని ఇప్పటికే అనేక సార్లు ప్రచారం చేశామని చెప్పారు. ఒక వేళ డబ్బు పట్టుబడినట్లయితే ఆ తరువాతైన తగిన డాక్యుమెంట్లు చూపి తిరిగి తీసుకెళ్లమని పదేపదే చెబుతున్నామని అన్నారు. అయితే ఇప్పటి వరకు పట్టుబడిన నగదును ఆధారాలు చూపి పట్టుకెళ్లేందుకు ఎవ్వరూ ముందుకురాలేదని తెలిపారు. ఓటుకు నోటు కూడదని పేర్కొం టూ ప్రముఖ క్రికెటర్ దినేష్ కార్తీక్, బాలీవుడ్ నటి దీపికా పదుకునేలతో లఘుచిత్రాలను ప్రదర్శిస్తున్నామని తెలిపారు.